Amérika dölet mejlisi mexsus komissiye qurup, amérikidiki xitay téléfon alaqe shirketlirini tekshüridu

Amérika dölet mejlisi amérikida soda qilidighan xitay téléfon alaqe shirketlirini tekshürüp, ularning amérikigha tehdit séliwatqan - salmaywatqanliqi tekshüridighanliqini élan qildi.
Öz muxbirimiz erkin
2011-11-21
Élxet
Pikir
Share
Print
Xu'awéy shirkitining élanliridin bir körünüsh.
Xu'awéy shirkitining élanliridin bir körünüsh.
AFP
Amérika dölet mejlisi amérikida soda qilidighan xitay téléfon alaqe shirketlirini tekshürüp, ularning amérikigha tehdit séliwatqan - salmaywatqanliqi tekshüridighanliqini élan qildi.

Amérika dölet mejlisi awam palatasining bir komitéti yéqinda amérikidiki xitay téléfon alaqe shirketlirining pa'aliyitige munasiwetlik bir qarar chiqardi. Awam palata istixbarat komitéti ötken peyshenbe küni chiqarghan qararida awam palata mexsus komissiyisining tekshürüsh élip bérip, amérikidiki xitay téléfon alaqe shirketlirining amérika dölet bixeterlikige qandaq tehdit séliwatqanliqi, ularning xitay hökümiti bilen hemkarliship, uning jasusluq pa'aliyitige yardem qilghan - qilmighanliqi, amérikining achquchluq asasi eslihelirige peyda qilidighan tehditini éniqlaydighanliqini bildürgen. Qararda yene amérika hökümitining bu xil tehditke qarshi qandaq taqabil turush tedbirlirini alghanliqining tekshürülidighanliqi ilgiri sürülgen.

Jumhuriyetchi awam palata ezasi, istixbarat komitéti re'isi mayk rojérs mezkur qarar heqqide toxtilip: bizning achquchluq asasi eslihelirimizning bizge qarshi ishlitilish éhtimalliqidin ibaret bu pakit köngül bölidighan jiddiy mesile, dégen.

Xitayning amérikida meshghulat élip baridighan dunyawi uchur - alaqe téxnologiye karxaniliridin "Xu'awéy téxnologiye cheklik shirkiti" bilen uning "Jongshing uchur alaqe cheklik hessidarliq shirkiti" awam palata istixbarat komitéti teripidin tekshürülidighan nuqtiliq shirketlerdur.

Mayk rojérs amérika karxanilirini agahlandurup: biz pütkül asas esliheler duch kéliwatqan tehditni omumi yüzlük közdin kechürimiz. Xu'awéy shirkiti buning ichidiki eng chong mesile. Biraq tekshürüsh obyékti bashqa shirketlernimu öz ichige alidu. Men resmiy tekshürüsh bashlinish munasiwiti bilen, biz ularning meqsitini toluq éniqlap chiqishtin burun amérika soda sahesidikiler xu'awéy téxnologiye shirkiti bilen munasiwet qilghanda éhtiyat qilishi kérek, dégen meydanda turimen, dep eskertti.

Démokratik awam palata ezasi dach roppérsbérgér tekshürüsh meqsiti heqqide toxtilip: biz xitayning tor sistémimizgha ilgirilep hujum qilip, achquchluq asas eslihelirimizge tehdit séliwatqanliqi, amérika karxanilirining milyonlighan dollar qimmitidiki eqliy mülkini oghrilawatqanliqini bilimiz. Bu bizning dölet bixeterlikimizge buzghunchiliq qilip, amérikining dunya baziridiki riqabet küchige ziyan salmaqta, nurghun xizmet pursiting béshigha chiqmaqta. Lékin tor hujumi tehdit bolush bilen birge, uchur alaqe sana'itimizning ularning qattiq détaligha tayinishi bizning ajiz nuqtimiz. Mezkur tekshürüshning meqsiti xitay uchur alaqe shirketlirining dunyawi meshghulat kölimi, buning milliy we iqtisadi bixeterlikimizge élip kélidighan tehditini qandaq qilip azaytish charisini tépip chiqish, dep körsitidu.

Dölet mejlisining tekshürüsh élip bérip, qandaq xulase chiqiridighanliqigha hazir bir néme démek baldurluq qilidu. Biraq amérikida yashaydighan xitay tor we uchur erkinlik mesililiri mutexessisi li xongku'en xitay téxnologiye karxanilirining amérikigha tehdit séliwatqanliqi rast, dep körsetti.

U: bu elwette bir xil xewp. Chünki xu'a wéy shirkitige oxshash junggodiki arqa körünüshi nahayiti murekkep bundaq bir shirketning bu xil wezipisining bolushi choqum. Junggo hökümiti we uning bixeterlik organliri choqum uninggha bundaq telepni qoyidu. Yeni uchur yighishni, singip kirishni, amérikining muhim téxnikilirini toplash we junggo herbiy terepning ishlitishige bérishni telep qilidu. Bu hemmige ayan bolghan mexpiyetlik, dep körsetti.

Biraq li xongku'en ependining ilgiri sürüshiche, bu mesilidiki achquchluq nuqta xitay karxanilirining buni qandaq élip bériwatqanliqidur. U amérika xitay karxanilirining bu ishlarni amérika qanunidiki boshluqtin paydilinip élip bériwatqanliqidin ibaret bir mesilige duch kélish éhtimalliqi mewjut, dep eskertti.

Li xongku'en mundaq deydu: bu yerdiki mesile ular bu ishlarni qandaq élip bériwatidu. Ular amérikining téxnika we axbaratigha qanuni yollar bilen ériship, bu arqiliq amérikining nazaritidin atlap ötüwatqan bolushi mumkin. Bu amérika duch kélish éhtimalliqi mewjut mesile. Chünki netijisi amérikigha ziyanliq nurghun ishlar yüz bergen. Ular amérika qanunidiki boshluqqa kiriwalghan. Junggoning bu karxanilirining nahayiti küchlük sermaye asasi bar. Ular amérikining nahayiti qabiliyetlik adwokat we boghaltirlirini yalliyalaydu. Bu kishiler amérika qanunidiki boshluqni nahayiti yaxshi bilidu. Ular bu kishiler arqiliq özi érishmekchi bolghan nersige érishishi mumkin.

Amérika awam palata istixbarat komitétining qarari xitay da'irilirining naraziliqini qozghidi. Xitay hökümiti amérikidiki xitay karxanilirining "Bazar iqtisadi prinsiplirigha" asasen meshghulat élip bériwatqanliqi, amérikining sodini "Siyasiylashturmasliqi" kéreklikini ilgiri sürgen.

Awam palata istixbarat komitétining xitay karxanilirini tekshürüsh toghrisidiki qarari prézidént obamaning hawaydiki asiya - tinch okyan iqtisadi hemkarliqining yighini we hindonéziyidiki sherqiy jenubiy asiya ittipaqining yighinida amérikining asiya - tinch okyan rayonigha qaytidighanliqini élan qilip, xitayning xelq'ara qa'ide nizamlargha ri'aye qilishqa chaqirghan sezgür bir peytke toghra kelgen.

Li xongküen ependi awam palatasining mezkur mesilisini bundaq bir peytke toghrilap otturigha qoyulushidiki sewebke öz pikrini bildürdi. U, mundaq dédi: dölet mejlisi junggogha qaritilghan dölet bixeterlik, istixbarat, jasusluq mesililiride dölet mejliside da'im zor bésimgha duch kélidu. Ular duch kélidighan bésim asasliqi sermayidarlarning bésimi. Chünki nurghun sermayidarlarning junggoda zor menpe'iti bar. Ular amérika bilen junggoning tirkiship qélishini xalimaydu. Ikki dölet dostane munasiwetni saqlisa ular junggoda soda qilalaydu........... Ularning bésimi istixbarat komitéti qatarliq amérika organlirining herikitini melum derijide cheklep kelgen. Istixbarat komitétining bu mesilini otturigha qoyushi üchün choqum muwapiq bir peytni kütüshke toghra kéletti. APEC Ning yighini, junggoning bash kötürüp, amérikining asiya - tinch okyandiki menpe'itige tehdit sélishi we amérika jama'et pikri qatarliq amillar bu mesilining hazir otturigha qoyulushigha türtke boldi.

Toluq bet