Сөйүмлүк анилар, байримиңларға мубарәк болсун !!


2007.05.13
Share on WhatsApp
Share on WhatsApp

Hkg577224-MD-200.jpg
Анилар байрими мунасивити билән, аниларға қилинған совға, японийә, токйо. Mother's Day at a Tokyo flower shop, 09 May 2007 / AFP PHOTO / Yoshikazu TSUNO

Ана, у дуняда әң улуғ инсан. Дуняда аниниң балиға болған муһәббитидинму сап, миннәтсиз, күчлүк муһәббәт болмас. Анини улуғлаш, анини һөрмәт қилиш уйғурларниң өрп -адәт, әдәп ‏- әхлақ, мәдәнийитигә сиңгән наһайити чоңқур бир тәрәп, гәрчә һейт ‏- байрам, түрлүк өрп ‏- адәт мурасимлиримизда аниларға алаһидә һөрмәт билдүрүш, аниларни йоқлаш бир адәт болсиму, әпсус уйғур анилири үчүн мәхсус байрам йоқ иди. Нөвәттә хәлқаралиқ анилар байриминиң пүтүн дунядики һәр қайси әлләр вә милләтләргә ортақ бир байрам болуп шәкиллиниши билән уйғурларму анилар байримида өзини туққан, беқип өстүргән анилириниң меһнитигә, гүл дәстиләрни, совғатларни тутуп түрлүк усуллар билән миннәтдарлиқини билдүридиған болди.

Силәргә бәхт ‏- саадәт, хатирҗәмлик яр болғай !

Меһнәткәш уйғур анилиримиз үчүн бизниңму байрамлиқ совғимиз бар әлвәттә. Төвәндә мухбиримиз гүлчеһрә -13 май хәлқаралиқ анилар байримиға атиған совғимизни силәргә узатмақчи, ана вәтәндики барлиқ аниларға салам!!! силәргә бәхт ‏- саадәт, хатирҗәмлик яр болғай !

Әссаламу әләйкүм сөйүмлүк уйғур анилири, байримиңларға мубарәк болсун. Силәр һөрмәт төридә бибаһа инсан, силәр бир қолида бөшүкни, йәнә бир қолида дуняни тәвритишкә қадир меһрибан инсан. Пәриштә кәби анилар силәр, силәр әқил булиқи, силәр барлиқ иҗад, барлиқ дастан, барлиқ мәдһийиләрниң мәнбәси.Гузәллик башланған җай, қәдирдан анилар, силәрниң бағриңларниң кәңликидин вәтәнниму ана дәймиз.

Силәргә беғишланған мәдһийиләрниң чеки йоқ, силәр бир өмүр пәрзәнтиңлар үчүн өзәңларни беғишлайсиләр, әмма улардин һеч миннәтдарлиқ күтмәйсиләр, балилириңларниң бәхти силәрниң байримиңлар болуп кәлгән. Уйғур анилири һәммидин җапакәш, меһнәткәш, миннәтсиз анилардиндур, улар балилирини туғуп қатарға қошушни бурчи дәп билип балилириниң отида көйүп, сүйидә еқип барлиқини беғишлиғандин сирт, һәтта балилириниң балилириғичә меһрини айимайду, нәврилири һәтта чәврилириниму көз қарчуғисидәк аяп әтиварлап бақиду. Шуңа биздә аниниң бәргән бир темим сүтигә йәттә қетим һәрәмгә йүдүп апарсиму азлиқ қилиду дәйдиған кәлимиләр бар.

Сөйүмлүк уйғур анилири силәрниңму һәқиқй дуняви байримиңлар бар, ғәрб дөләтлиридә һәр йили май ейиниң иккинчи йәкшәнбә күни анилар байрими сүпитидә интайин дағдуғилиқ өткүзилиду.

Анилар байриминиң келип чиқиш тарихи

Анилар байрими америкида -1864 йилидин -1948 йилғичә бир өмүр той қилмай аписи билән яшиған әна җарвисниң аниси өлүп кетип,икки йилдин кейин йәнә -1907 йили анисиға қаттиқ қайғуси билән сеғинишини, миннәтдарлиқини билдүрүш үчүн достлириға аниларға һаят вақтида уларниң әҗригә, муһәббитигә миннәтдарлиқ билдүрүшниң зөрүрликини ейтип, буниң үчүн, анилар үчүн мәхсус байрам күнини бекитиш керәкликини тәвсийә қилиш билән башлинип тез арида пүтүн америка һәмдә яврупада тарқилишқа башлиған. 1913 - Йили америка дөләт мәҗлиси һәр йили май ейиниң иккинчи йәкшәнбә күнини анилар күни қилип бекитиш қарарини тәстиқлиған. Мана бүгүнки күнгә кәлгәндә анилар байримини дөләтлик байрам қилип бекиткән дөләтләр 43кә көпәйди. Шундақ, бу байрам һәр қайси әлләрдә һәр қайси милләтләрдә ортақ қарши елинип, тәбиий һалда қобул қилинмақта. Чүнки аниларниң әҗри һәр қачан йәрдә қалмайду, аниға миннәтдарлиқ билдүрүш һәр бир инсанниң бурчи, бу байрам анилар үчүн байрамла болупла қалмай йәнә, пәрзәнтләргә миннәтдар болушни, һөрмәтни, муһәббәтни ипадиләшни өгитидиған һәқиқй тәрбийивий әһмийәтлик бир күн болуп кәлмәктә.

Аниларға рәхмәт ейтиң!

Меһрибан миннәтсиз анилар бүгүнкидәк байрам күнидиму бәлким балилири өзлиригә байрамлиқ елип кәлгән совғатқа қарап, гүлләргә қарап, өзиниң балилириға сиңдүргән әҗридин әмәс, бәлки балилириниң һөрмитини қилғанлиқидин тәсирлинип көз йеши қилиши мумкин,бизниң шундақ анилиримиз бар, балиси " әҗриңизгә рәһмәт ана " дисә "нимишқа аварә болисән балам, бундақ қилмисаңму, рәһмәт ейтмисаңму мән дегән анаң турсам" дәйдиған, чүнки улар балилири үчүн күйүп‏ - өчүшни, җапа чекишни өзиниң муқәддәс бурчи дәп билиду, бизниң шундақ анилиримиз бар,әгәр балилириниң миннәрдарлиқиға еришәлмисиму рәнҗимәйдиған,пәқәт көз йешини көрсәтмәй етикигә сүртүп балилирини көрсә аптаптәк ечилип җеним балам дәйдиған, балилирини сақ ‏- саламәт, бәхтияр көрсила шуниң өзи уйғур анилири үчүн купайә. Әнә шу улар үчүн әң хошаллиқ байрам, радио аңлиғучи достум, әгәр сиз бала болсиңиз, аниңиз үчүн сиз мәңгү бала, бүгүн аниңиз үчүн немә қилип бәрдиңиз ? гүлдәстә тизалмисиңизму униң бағриға балиларчә өзиңизни етиң, қоллириға сөйүң....

Сиз ата болсиңиз, пәрзәнтиңизниң анисиға миннәтдарлиқиңизни, муһәббитиңизни йәткүзөшниму унутмаң, хислитиңиздин пәрзәнтләр тәлим алсун, анини қәдирләш, уларниң әҗиригә җаваб қайтуруш әвладларға удум қалсун.

Әгәр ана болсиңиз, бүгүн бир күн болсиму арам елиң ана, бүгүн сизниң байримиңиз, пүтүн дуня сизни қутлуқлайду. (Гүлчеһрә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.