Söyümlük anilar, bayriminglargha mubarek bolsun !!


2007-05-13
Share

Anilar bayrimi munasiwiti bilen, anilargha qilin'ghan sowgha, yaponiye, tokyo. Mother's Day at a Tokyo flower shop, 09 May 2007 / AFP PHOTO / Yoshikazu TSUNO

Ana, u dunyada eng ulugh insan. Dunyada anining baligha bolghan muhebbitidinmu sap, minnetsiz, küchlük muhebbet bolmas. Anini ulughlash, anini hörmet qilish Uyghurlarning örp -adet, edep ‏- exlaq, medeniyitige singgen nahayiti chongqur bir terep, gerche héyt ‏- bayram, türlük örp ‏- adet murasimlirimizda anilargha alahide hörmet bildürüsh, anilarni yoqlash bir adet bolsimu, epsus Uyghur aniliri üchün mexsus bayram yoq idi. Nöwette xelq'araliq anilar bayrimining pütün dunyadiki her qaysi eller we milletlerge ortaq bir bayram bolup shekillinishi bilen Uyghurlarmu anilar bayrimida özini tuqqan, béqip östürgen anilirining méhnitige, gül destilerni, sowghatlarni tutup türlük usullar bilen minnetdarliqini bildüridighan boldi.

Silerge bext ‏- sa'adet, xatirjemlik yar bolghay !

Méhnetkesh Uyghur anilirimiz üchün bizningmu bayramliq sowghimiz bar elwette. Töwende muxbirimiz gülchéhre -13 may xelq'araliq anilar bayrimigha atighan sowghimizni silerge uzatmaqchi, ana wetendiki barliq anilargha salam!!! silerge bext ‏- sa'adet, xatirjemlik yar bolghay !

Essalamu eleyküm söyümlük Uyghur aniliri, bayriminglargha mubarek bolsun. Siler hörmet töride bibaha insan, siler bir qolida böshükni, yene bir qolida dunyani tewritishke qadir méhriban insan. Perishte kebi anilar siler, siler eqil buliqi, siler barliq ijad, barliq dastan, barliq medhiyilerning menbesi.Guzellik bashlan'ghan jay, qedirdan anilar, silerning baghringlarning kenglikidin wetennimu ana deymiz.

Silerge béghishlan'ghan medhiyilerning chéki yoq, siler bir ömür perzentinglar üchün özenglarni béghishlaysiler, emma ulardin héch minnetdarliq kütmeysiler, baliliringlarning bexti silerning bayriminglar bolup kelgen. Uyghur aniliri hemmidin japakesh, méhnetkesh, minnetsiz anilardindur, ular balilirini tughup qatargha qoshushni burchi dep bilip balilirining otida köyüp, süyide éqip barliqini béghishlighandin sirt, hetta balilirining balilirighiche méhrini ayimaydu, newriliri hetta chewrilirinimu köz qarchughisidek ayap etiwarlap baqidu. Shunga bizde anining bergen bir témim sütige yette qétim heremge yüdüp aparsimu azliq qilidu deydighan kelimiler bar.

Söyümlük Uyghur aniliri silerningmu heqiqy dunyawi bayriminglar bar, gherb döletliride her yili may éyining ikkinchi yekshenbe küni anilar bayrimi süpitide intayin daghdughiliq ötküzilidu.

Anilar bayrimining kélip chiqish tarixi

Anilar bayrimi amérikida -1864 yilidin -1948 yilghiche bir ömür toy qilmay apisi bilen yashighan ena jarwisning anisi ölüp kétip,ikki yildin kéyin yene -1907 yili anisigha qattiq qayghusi bilen séghinishini, minnetdarliqini bildürüsh üchün dostlirigha anilargha hayat waqtida ularning ejrige, muhebbitige minnetdarliq bildürüshning zörürlikini éytip, buning üchün, anilar üchün mexsus bayram künini békitish kéreklikini tewsiye qilish bilen bashlinip téz arida pütün amérika hemde yawrupada tarqilishqa bashlighan. 1913 - Yili amérika dölet mejlisi her yili may éyining ikkinchi yekshenbe künini anilar küni qilip békitish qararini testiqlighan. Mana bügünki kün'ge kelgende anilar bayrimini döletlik bayram qilip békitken döletler 43ke köpeydi. Shundaq, bu bayram her qaysi ellerde her qaysi milletlerde ortaq qarshi élinip, tebi'iy halda qobul qilinmaqta. Chünki anilarning ejri her qachan yerde qalmaydu, anigha minnetdarliq bildürüsh her bir insanning burchi, bu bayram anilar üchün bayramla bolupla qalmay yene, perzentlerge minnetdar bolushni, hörmetni, muhebbetni ipadileshni ögitidighan heqiqy terbiyiwiy ehmiyetlik bir kün bolup kelmekte.

Anilargha rexmet éyting!

Méhriban minnetsiz anilar bügünkidek bayram künidimu belkim baliliri özlirige bayramliq élip kelgen sowghatqa qarap, güllerge qarap, özining balilirigha singdürgen ejridin emes, belki balilirining hörmitini qilghanliqidin tesirlinip köz yéshi qilishi mumkin,bizning shundaq anilirimiz bar, balisi " ejringizge rehmet ana " dise "nimishqa aware bolisen balam, bundaq qilmisangmu, rehmet éytmisangmu men dégen anang tursam" deydighan, chünki ular baliliri üchün küyüp‏ - öchüshni, japa chékishni özining muqeddes burchi dep bilidu, bizning shundaq anilirimiz bar,eger balilirining minnerdarliqigha érishelmisimu renjimeydighan,peqet köz yéshini körsetmey étikige sürtüp balilirini körse aptaptek échilip jénim balam deydighan, balilirini saq ‏- salamet, bextiyar körsila shuning özi Uyghur aniliri üchün kupaye. Ene shu ular üchün eng xoshalliq bayram, radi'o anglighuchi dostum, eger siz bala bolsingiz, aningiz üchün siz menggü bala, bügün aningiz üchün néme qilip berdingiz ? güldeste tizalmisingizmu uning baghrigha balilarche özingizni éting, qollirigha söyüng....

Siz ata bolsingiz, perzentingizning anisigha minnetdarliqingizni, muhebbitingizni yetküzöshnimu unutmang, xislitingizdin perzentler telim alsun, anini qedirlesh, ularning ejirige jawab qayturush ewladlargha udum qalsun.

Eger ana bolsingiz, bügün bir kün bolsimu aram éling ana, bügün sizning bayrimingiz, pütün dunya sizni qutluqlaydu. (Gülchéhre)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet