Ana sütining ewzellikliri heqqide

Xitayda bowaqlar süt parashoki mesilisi pash bolghan ikki heptidin buyan Uyghur élidimu, xitayda ishlen'gen süpetsiz zeherlik süt parashokliridin zeherlen'gen balilarning sani kündin ‏ - kün'ge köpeymekte.
Muxbirimiz gülchéhre
2008-09-24
Share
bowaq-sut-imish-305.jpg Xitaydiki melum doxturxanida dawaliniwatqan bowaq.
AFP Photo

Xitayda dangliq markiliq bowaqlar süt parashokliridimu mesile körülüp,bowaqlarning hayatigha tehdit sélip ata ‏ - anilarni tügimes ghem endishe hem azablargha duchar qiliwatqan bir peytte,kishiler ana sütining bowaqlar üchün eng bixeter, eng muwapiq ozuqluq ikenlikidek emeliyetni yenimu tonup yetmekte, igilishimizge qarighanda, jümlidin Uyghur anilarmu nöwette balilirini ana süti bilen imitishke yenimu ehmiyet bérishke bashlighan.

Nöwette anglighuchilirimiz diqqitige bolupmu yéngi ana bolghan hem bolghusi anilar semige muxbirimiz gülchéhrening teyyarlishida bowaqlarning eng yaxshi ozuqining ana süti ikenliki heqqidiki programmini sunmaqchimiz.

Bowaqlar yenila ana süti emgini yaxshi

Xitayda senlu bowaqlar süt parashoki weqesi pash bolghandin kéyinla,Uyghur élidimu nurghun balilarning xitayda ishlen'gen zeherlik süt parashokining qurbanigha aylan'ghanliqi ashkarilanmaqta. Uyghur éli sehiye nazaritining eng yéqinqi statistikisida körsitishiche, nöwette süt parashoki seweblik késelge giriptar bolghan bowaqlarning melum bolghan sani 1253ke chiqqan bolup, bu san kündin ‏ - kün'ge köpeymekte. Bu balilarning hemmisi dégüdek ikki yashtin töwen bowaqlar. Uyghur élide hazirghiche börekte tash peyda bolghan bowaqlardin sekkiz ayliq bir bowaqning ölgenliki melum.

Uyghurche tor betlerdiki mulahizilerdimu ana sütining ehmiyiti heqqide munaziriler dawam qilmaqta. Uyghur élige qaratqan téléfon ziyaretlirimizdin ispatlinishiche, ikki heptidin buyan dawam qiliwatqan mushundaq qorqunchluq xewerler Uyghur ata ‏ - anilarnimu zor endishe hem azablargha duchar qilghan. Bu mesile öz nöwitide yene balilar üchün eng bixeter hem eng muwapiq ozuqluqning yenila ana süti ikenliki, anilarning bowaqlirini yenila özlirining imitishining muhimliqigha bolghan tonushning chongqurlishishigha hemde bu heqte izdinishige yol achqan bolup, téximu köp yash anilar hemde bolghusi anilar balilirini özliri imitishning ehmiyitini yenimu tonup yetmekte iken.

Ana sütining balilar üchün eng muhim, eng éhtiyajliq shundaqla muwapiq ozuqluq ikenliki qayta ‏ - qayta ispatliniwatqan, ret qilishqa bolmaydighan ilim shundaqla dunya miqyasida anilarning perzentlirini özliri imitishi teshebbus qilinmaqta.

Emma yéqinqi yillardin buyan Uyghur aniliridimu, bolupmu sheherlerdiki xizmet qiliwatqan anilar arisidimu, " sütüm yaxshi emes, xizmitim aldirash, pigoram özgirip kétidu" dégendek köp xil seweblerni bahane qilip bowaqlirini emdürmey, süt parashoki béridighan ehwallarmu peyda bolushqa bashlighan.

Junggodiki yémekliklerge ishen'gili bolmaydu

Bu heqte ürümchidiki melum doxturxanida ikkinchi perzentini dunyagha apiride qilish aldida turghan bir yash hamildar ayal ziyaritimizni qobul qilip, xizmitining aldirashliqi seweblik dunyagha kélish aldida turghan ikkinchi balisini süt parashokida béqishni oylashqan bolsimu, senlu zeherlik süt parashoki weqesidin kéyin bu niyitidin yénip, amalning bériche perzentini özi imitishke tirishish qararigha kelgenlikini bildürdi.

Her qandaq ozuqluq ana sütining ornini basalmaydu

Nöwette bazarda ana sütide bar bolghan ozuqluq terkiplirige oxshap kétidighan éminitlar qoshulghan, süpetlik ishlen'gen bowaqlar süt parashoklirining xilliri intayin köp, gerche bu xil süt parashokliri ana sütini ölchem qilip, kala süti yaki purchaq süti asasida ishlen'gen bolsimu, emeliyet shuki, her qanche ésil süpetlik bowaqlar süt parashokidiki ozuqluq miqdari, bolupmu imunit küchini toluqlaydighan ilminitlar yenila ana sütige yetmeydu. Démek insanlar téxi %100 ana sütige oxshaydighan süt parashoki ishlepchiqiralighini yoq.

Anilarning balilirini imitishi özliri üchünmu paydiliq

Amérika wirjiniye shitatidiki balilar doxturxanisida ishlewatqan ikki perzentning anisi bolghuchi bir Uyghur séstira xanim xizmet tejribisige asasen, ana süti emgen balilarning süt parashoki emgen balilargha qarighanda saghlam bolidighanliqini.

Ana sütining ikki yashtin töwen bowaqlar üchün eng yaxshi ozuqluq hem késelning aldini élish waksinisi we köp xil iqtidarliq möjizilik dorining rolini oynaydighanliqini tonushturup, Uyghur anilirigha perzentlirini qanche uzun bolsa, shunche uzun waqitqiche imitishke tirishishini teshebbus qildi.

Ana süti bowaqlarning hezim qilishigha asan, saghlam üsüp yétilishide eng éhtiyajliq hem muwapiq bolghan, héchqandaq nerse ornini basalmaydighan ozuqluq bolupla qalmay, bala imitish yene anining saghlamliqi üchünmu oxshashla muhim rolgha ige. Shunga shert ‏ - shara'it yar berse anilarning bowaqlirini ikki yilgha qeder imitishni dawamlashturushi tewsiye qilinidu.

Ispatlinishiche, bolupmu bala tughulup alte ayghiche ana süti bilen ozuqlinishigha kapaletlik qilish, balining késelge qarshi turush yeni imunit küchini shekillendürüshi, eqli qabiliyitining saghlamliqi üchün intayin zor ehmiyetke ige iken. Shunga ana süti balilarning eng bixeter hem muwapiq ozuqluqi bolupla qalmay, hayatliqining buliqi hem késellerdin saqlinish qalqinidur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet