Birleshken döletler teshkilati islahati we kofi annan

Birleshken döletler teshkilati islahatchilar guruppisining re'isi shundaqla taylandning sabiq bash ministiri bényarachun peyshenbe küni birleshken döletler teshkilati bash sékritari kofi annan'gha "téximu bixeter dunya: bizning ortaq mes'uliyitimiz" dégen témida 95 betlik islahat doklatini sundi.

Közetküchiler bu doklatning b d t qurulghandin buyanqi eng yüreklik bilen tüzülgen bir parche islahat layihisi ikenlikini ilgiri sürmekte. Islahatchilar guruppisi tüzgen 101 türlük islahat teklipi yene, b d t bixeterlik kéngishini kéngeytish layihisinimu öz ichige alghan.

Kofi annan heqqide so'allar soraldi

Bu munasiwet bilen ötküzülgen muxbirlarni kütüwélish yighinida, bényarachun we norwigiyining sabiq bash ministiri groblutran sirtqa mezkur doklatni resmiy jakarlap, muxbirlarning bu heqtiki su'allirigha jawap berdi. Emma xelq'ara jem'iyet nöwette néfitke ashliq tégishish programmisida bayqalghan setchilikke bekrek köngül bölgechke, muxbirlar asasliqi b d t bash sékritari kofi annanning wezipisidin istipa bérish yaki bermeslik mesilisige a'it su'allarni sorashti.

B d t islahatchilar guruppisining re'isi bényarachun özining kofi annan'gha bolghan hörmitini ipadilep, "biz yenila annanning adil kishi ikenlikike ishinimiz. Méningche b d t hazir tarixiy ehmiyetke ige halqiliq peytte turidu. Shunga biz uning islahat musapisigha rehberlik qilip, biz sun'ghan teklip layihini emeliyleshtürishini ümid qilimiz" dédi.

Oxshimighan inkas

Amérika kéngesh palatasi ezasi norm kolmén charshenbe küni amérika wolsichit 8ornilida, birleshken döletler teshkilatining bash sékritari kofi annanning wezipisidin istipa bérishi kéreklikini otturigha qoyghan bolup, bu tizdinla xelq'ara jem'iyitining diqqitini tartqan idi. Arqidinla rusiye, xitay, en'gliye, fransiye we gérmaniye qatarliq nurghun döletler kofi annanni qollaydighanliqini ipadilep, uning b d t bash sékritarliqigha layiq kishi ikenlikini bildürdi.

Xitayning meydani

Xitayning b d t diki elchisi wang gu'angya, xitay hökümitining annanni yaxshi xizmet qiliwatidu dep qaraydighanliqini we uninggha qilin'ghan hujumning adil emeslikini eskertip, annanning kélerki ikki yilda qilishqa tégishlik yene muhim wezipilirining barliqini bildürdi.

Amérika axbarat agéntliqining bildürishiche, amérika prézidénti jorj w bush peyshenbe küni b d t bash sékritari kofi annanning wezipisidin istipa bérish mesilisige tutqan meydanini éniq ipadilimisimu, lékin néfitke ashliq tégishish programmisi üstidin ochuq we adil tekshürüsh élip bérish kéreklikini tekitlidi. Kolmen tarmaq tekshürüsh komititi ikki hepte awal, b d t ning néfitke ashliq tégishish programmisi üstide élip barghan tekshürishige asasen, iraqning sabiq prézidénti sadam hüseyinning, néfitke ashliq tégishish programmisini öz ichige alghan b d t ning iraqqa bérilgen iqtisadiy jazalirigha xilap halda qanunsiz 21 milyard amérika dolliri toplighanliqini ashkarilighan idi. Shundaqla buning bilen birge, kofi annanning oghli kojo annanning néfitke ashliq tégishish programmisigha munasiwetlik shiwitsariyidiki bir shirkettin 125 ming amérika dolliri pul alghanliqimu melum boldi.

Kofi annanning ipadisi

Kofi annan düshenbe küni bu heqte muxbirlarni kütiwélish yighini chaqirip, oghlining bundaq qilghinidin özining tolimu "heyran qalghanliqi we epsuslan'ghanliqi" ni bildürdi. Kofi annanning wezipisidin istipa bérishi kéreklikini otturigha qoyghan amérika kéngesh palata ezasi norm kolmen néfitqa ashliq tégishish programmisidiki bu setchilikning " b d t tarixida körülgen kölimi eng chong saxtipezlik weqesi" hésablinidighanliqini tekitlidi. Emma bu arida birleshken döletler teshkilati bash shitabidiki 3 mingdin oshuq xizmetchi xadim birlikte imza qoyup xet sunup, kofi annanni qet'iy qollaydighanliqini ipadilidi.