Amérika prézidénti jorj bush bilen xitay dölet re'isi xu jintaw söhbetleshti

Amérika prézidénti jorj bush bilen xitay dölet re'isi xu jintaw chilining paytexti santi'agoda ötküzülgen, asiya - ténch okyan iqtisadiy hemkarliq yighinida uchrushup öz - ara söhbet ötküzgen, mezkur söhbet chilining waqti sa'et 8 yérimda resmiy bashlinip, bir yérim sa'et dawamlashqan. Melum bolishiche, koriye yadro qoralliri mesilisini ténchliq yoli bir terep qilish ikki dölet rehbirining bir yérim sa'etlik söhbitning asasliq témisi hisaplinidiken.

Xitay dölet re'isi aldi bilen, prézidént bushning bir dölet prinsipi, uch xil birleshme bayanat we shuningdek teywenning musteqilliq meydanigha qarshi turush ipadilirige yuqiri baha béridighanliqini alahide otturigha qoyghan.

Prézidént bush xu jintaw bilen bolghan söhbet jeryanida, xitayning kishilik hoquq mesilisi heqqide toxtalghan, amérika awazi radi'osining xewiridin melum bolushiche, jorj bush kishilik hoquq we diniy erkinlik mesilisining yenila xitay - amérika munasiwitidiki muhim mesile ikenlikini tekitligen.

Buningdin sirt bush yene, tibetning diniy dahiysi dalay lamani alahide tilgha élip, xitayning amérika bilen kishilik hoquq söhbitini eslige keltürüshke qoshulghanliqini qarshi alidighanliqini bildürgen.

Ikki dölet rehbiri söhbet jeryanida yene, teywen mesilisi, xitay xelq pulining almashturulush qimmiti shuningdek koriye yadro qoralliri mesilisini muzakire qilghan.

Bu qétimqi yighinda, prézidént bush koriye yadro qoralliri mesilisidiki pozitsiyisini éniq körsetken bolup, u ” yadro qoralliri pilanini qet'iy bikar qilishni “ Jiddi yosunda tekitligen.

21 Döletning dölet rehberliri qatnashqan bu qétimqi yighinda xelq'ara soda we térrorchiliqqa qarshi küresh qilish asasliq muzakire qilin'ghan.

Amérika prézidénti jorj bush, yighin'gha qatnashqan her qaysi dölet rehberlirini koriyige qarita bésim ishlitishini we koriyining 6 terep söhbitige qatnishishini telep qilishni otturigha qoyghan. Chünki, koriye da'iriliri 9 - ayda ötküzülmekchi bolghan 4 - nöwetlik 6 terep söhbitige qatnishishni ret qilghanliqtin, mezkur söhbet bikar qilin'ghan idi.

Asiya ténch okyan iqtisadiy hemkarliq teshkilatining ali derijilik bashliqliri yighini axirlishish aldida birleshme bayanat élan qilghan , bayanatta, "yighin'gha ishtirak qilghan her qaysi iqtisadiy qurulmining tashqi ishlar ministirliri, ortaq yosunda asiya ténch okyan rayonidiki nuqtiliq döletler duch kéliwatqan riqabetke taqabil turushi kérek her qaysi iqtisadiy qurulmigha mes'ul rehberler zamaniwilashqan bir soda tüzümini berpa qilish üchün tirishchanliq körsitishi kérek" diyilgen . (Eqide)