Uch turpan nahiyisi yarköwrük yézisidiki apette köpligen déhqanlar éghir ziyan'gha uchridi

• Muxbirimiz eqidening bu heqtiki toluq melumati
• Download story audio

2007 - Yili 7- ayning 11 - küni pichan nahiyisidiki yézilarda yüz bergen kelkün apiti. AFP PHOTO

Uchturpan nahiyisi yarköwrük yézisida yüz bergen kelkün apitide 288 déhqan apetke uchrap, 100 din artuq öy örülüp chüshken, xitay axbarat wastiliri élan qilghan uchurlargha qarighanda buningdin kélip chiqqan iqtisadiy ziyanning qimmiti 5 milyon'gha yetken. Ya köwrük yézisi Uyghur élidiki eng namrat yézilardin biri bolush bilen birge apet köp yüz béridighan rayon hésablinidu. Gerche yerlik hökümet da'iriliri ilgiri bu jaydiki barliq déhqanlargha apetke chidamliq öylerni sélip béridighanliqi heqqide wede bergen bolsimu , bu zémindiki déhqanlar yenila apet qurbanigha aylanmaqta .

Uchturpan nahiyiside yüz bergen apette Uyghur déhqanliri éghir iqtisadiy ziyan tartti

Ikki kün ilgiri yerlik da'irilerning melumat bérishiche, uchturpan nahiyiside yüz bergen kelkün apitide 288 déhqan oxshash bolmighan derijide öy - makan, térilghu - yer we charwa - malliridin ayrilip, téximu éghir namratliqqa duch keldi. Bolupmu ya köwrük yézisi 3 ‏- kentining ahalisi apetke eng éghir uchrighan bolup, xitay axbarat wastilirining bildürüshiche, bu qétimqi apettin meydan'gha kelgen iqtisadiy ziyanning qimmiti 5 milyon yüen'ge yétidiken.

Biraq, chet'ellerdiki Uyghur közetküchiler, üch turpan nahiyiside yüz bergen ziyan qimmitining buningdin éghir ikenlikini qiyas qilishmaqta.

Gerche biz uchturpan nahiyisi ya köwrük yézisi 3 ‏- kentidiki déhqanlardin biwaste ehwal igilesh üchün köp tirishqan bolsaqmu, kelkün apitidin meydan'gha kelgen téléfon simliridiki özgirish seweblik mezkur kent ahalisi bilen alaqe baghliyalmiduq.

Shunga etraptiki qoshna yéza ahaliliridin , apet heqqide azraq melumat igiliduq. Qoshna yézilardiki déhqanlar, hökümetning apette öy makanidin ayrilghan déhqanlargha chédir öy tarqitip bergenlikini, biraq yene örülüsh éhtimalliqi bar öylerning igiliri teshwish ichide ikenlikini bildürdi.

Hökümet da'iriliri bir qanche yillar ilgiri, uch turpan nahiyisi teweside yüz bergen yer tewresh apitide bu jaydiki déhqanlarning choqum yer tewreshke oxshash apetlerge chidamliq öylerge köchürilidighanliqini wede qilghan idi. Biz déhqanlardin hökümetning mezkür wedisining emillishish ehwalini sorighinimizda, kimliki éniq bolmighan bu kishi bizge mundaq dep jawab berdi.

Uchturpan nahiyisining yer asti bayliqi xelqning apettin qutulishigha yardem körsitelmigen

Melumatlargha qarighanda, apetke uchrighan rayon xelqini apettin qutuldurush yalghuz hökümet orunliri teripidinla élip bérilmastin, belki apetke uchrimighan qoshna yéza déhqanliri hashar emgiki usuli boyiche apettin qutuldurush ishlirigha sélin'ghan .

Yer asti we üsti bayliqlirining molluqi we yérining munbetliki bilen tarixtin buyan güzel, bay zémin dep atilip kelgen uchturpan nahiyisige , xitay " gherbtiki közni qamashturidighan merwayit " dégen namni bergen.

Mezkur nahiye yene döletning we aptonom rayonning ashliq bazisi bolushtin sirt, nöwette, bu nahiyidin altun qatarliq 16 xil meden bayliqlirining 59 kani bayqalghan.

Biraq, kishini ejeplendüridighini, bu bayliqlargha ige uchturpan nahiyisining ahalisi apetlerge berdashliq béreleydighan öylerde olturush emes , belki bu nahiye xitay boyiche, dölet derijilik qutquzilidighan nuqtiliq namrat nahiyiler qatarigha kirgüzülgen . Shunga bu mesile chet'ellerdiki Uyghurlar arisida munazire peyda qilmaqta.(Eqide)