Хитайдики ақ пирамида тарихиниң сирлири

Түркийидә чиқидиған радикал гезитиниң 2010 - йили 3 - айниң 10 - күнидики санида түркийиниң сабиқ дөләт министири тәрипидин йезилған, 'хитайдики ақ пирамида тарихниң сирлири' дегән темида бир мақалә елан қилинди.
Мухбиримиз арслан
2010-03-12
Share
aq-piramida-305 Сүрәттә: ақ пирамида ичидә тартилған көрүнүшләр
Netpano.com Photo

Бу мақалида асаслиқи хитайниң шиән шәһириниң мәлум райониға җайлашқан 300 метир узунлуқтики бир пирамида һәққидә тохталған болуп, бу пирамидини иптидаий түркләрниң ясиғанлиқини вә пирамидиларниң ичидә оғуз хақанниң мумияси барлиқини билдүргән.

Мақалә мундақ башланған, Netpano.com Тор бетидә окян кәләш әпәндиниң йеңи бир мақалиси нәшр қилинди, бу мақалә, тәтқиқатчи алимларниң дәрһал тәтқиқат елип бериши керәк болған тарихи сирларни өз ичигә алған. Казим миршан вә окян кәләш әпәндиләргә охшаш кишиләрниң чоңқур тәтқиқат елип бериши билән тарихимизниң сирлири мушундақ оттуриға чиқиду.

 Әмди бу мақалидики бәзи муһим мәлуматлар һәққидә қайтидин мулаһизә қилайли. Хитайниң шиән районида, 300 метир икәнлики тилға елинған чоң бир пирамида вә әтрапида һәр хил һәҗимдә нурғун пирамидиларниң мәвҗутлуқи ипадиләнди. Бу пирамидилар америкидики пирамидиларлаға охшаш түз бир чоққиға игә. Бу пирамидиларниң 5000 - 6000 йиллиқ тарихи барлиқи тәхмин қилинмақта.
 
Мақалида йәнә мундақ дейилгән, ақ пирамидиларни 2 - дуня уруши җәрянида, америкилиқ учқучи җемес гессен һиндистандин чаңчиңға йемәклик тошуватқанда көргәнликини доклат қилған вә бу пирамидиларниң ақ таштин ясалғанлиқини тәхмин қилғанлиқини билдүргән. Шундақ қилип бу райондики чоң пирамидилар бәс - муназирә қилишқа йол ачти. Германийилик тәтқиқатчи язғучи һартвиг һаусдорф у районни зиярәт қилған вә нурғун материял вә учур топлиған һәтта бир қанчә парчә рәсим тартқан, әмма бу рәсимләр аз вә узақтин тартилған. Кейин хитай даирилири бу районда чәтәллик тәтқиқатчилар вә өзлириниң тәтқиқатчилирини шундақла археологларниң бу районда тәтқиқат елип беришини чәклигән.

Мақалида йәнә мундақ йезилған, "1954 - йили C - 54 намлиқ айропиландин тартилған тунҗи рәсим LIFE журнилида елан қилинған. Германийилик тәтқиқатчи һаусдорф бу пирамидиларла иптидаий түркләргә аит йезиқлар вә нурғун охшимиған мумиялар барлиқини сөзлигән болсиму буни испатлап берилмигәнлики үчүн бу мәлуматлар башқиларниң диққитини тартмиди. Бу һәқтә тәтқиқат елип беришқа қизиққан нурғун тәтқиқатчи вә археологлар хитай даирилиригә илтимас сунған әмма уларниң илтимаслири рәт қилинған. Пат - пат у йәргә саяһәтчи болуп барған тәтқиқатчилар пирамидиларни узақтин көргәнликини вә әтрапида йәрлик кийимләр кийишкән хитайларни көргәнликини ипадилигән. Хитай бу пирамидиларни мәхпий тутуш үчүн үстигә топа төкүп дәрәх салғанлиқи илгири сүрүлмәктә.

Мақалида билдүрүшичә йәнә окян кәләш исимлик язғучи у пирамидиларни көрүш үчүн бир уйғур тәрҗиман билән у йәргә биргә барған вә нурғун қийинчилиқларға дуч кәлгән болсиму, бир яшанған хитайға пул бериш арқилиқ у пирамидиниң ичигә кирип тәкшүрүш елип барған.

Мақалида билдүрүшичә язғучи у пирамидиниң ичигә киргәндин кейинки көргәнлирини тәсвирләп мундақ язған: "яшанған бир хитай ишарәт қилип, қолимиздики чирағни бир тәрәпкә тутушимизни тәләп қилди, биз чирағни у тәрәпкә туттуқ вә у йәрниң бир қәбрә ичи икәнликини чүшәндуқ, униң ичидә икки метирға йеқин узунлуқта бир мумия бар иди, буни көрүп техиму һаяҗанлинип кәттуқ, мумияниң беши тәрәптә бир қурам ташта һәр хил ишарәт бәлгилири вә йезиқларни көрдуқ, ай - юлтуз вә бөриниң беши бар иди. Әң әҗәблинәрлики, тамда үч метир узунлуқта мәрмәр таштин ясалған бир һәйкәл бар иди. Һәйкәлниң қош мүңгүзи яки антеннаға охшаш икки тал нәрсә бар иди. Бешиниң там оттурисида йәнә ай юлтуз бәлгиси көзгә көрүнди. Биз бу йәрдә көргән һәр шәйини бизни башлап кәлгән хитайға билдүрмәстин рәсимгә тарттуқ. Униң ичидә 7, 8 минут қалдуқ, бизни башлап кәлгән яшанған хитай бизни тезрәк чиқишқа алдиратти, биз у йәрдә йәнә бирдәм қелип, тәкшүрүш елип беришни тәләп қилдуқ, әмма яшанған хитай тәлипимизни рәт қилип, аччиқлашқа башлиди, пәс тәрәпкә пәләмпәй билән чүшидиған бир йолни көрдуқ вә у йәргә киришни тәләп қилдуқ, яшанған хитай, у йәргә чүшүшниң бәк қийин икәнликини, чүшкәндин кейин чиқишниң техиму қийин икәнликини, бу йәрдин дәрһал чиқишимиз керәкликини сөзлиди, хитайниң чиң турувелиши вә аччиқлап кетишидин биз пәскә чүшәлмидуқ, әмма чирағ билән әтрапқа қарап чиқтуқ, тамларда йезиқлар вә шәкилләр билән үсти - үстигә тизилған вә бир биригә чаплишип кәткән тахтиларни көрдуқ. Буларни көрүп бәк һаяҗанландуқ. яшанған хитайниң дәп беришичә, у пәскә чүшәлмигән пәләмпәйниң төвән тәрипидә болса, пәләмпәйләрдин пәскә чүшкәндә, у йәрдә башқа бир мумияниң барлиқини вә униң һеч бузулмиғанлиқини униңдин башқа йәнә миңлиған вивиска - тахтиларниң барлиқини заман өткәнсери бу тахтиларниң йиқилип бир - биригә чаплишип қалғанлиқини вә бу пирамидиниң оғуз хақанниң мазири икәнликини билдүрди. Униңдин башқа йәнә нурғун мазарларниң барлиқиниң вә һәммисиниң тақақлиқ икәнликини сөзлиди. Кичик вақтида бир қанчә мазарниң ичини көргәнликини, кейин бәзилириниң өрүлүп кәткәнлик сәвәбидин етилип қалғанлиқини аңлатти."

Бу мақалә узун вә тәпсилий йезилған болуп, аптор намик кәмал зайбәк әпәнди мақалини қисқичә хуласиләп мушу йәрдә ахирлаштурған.

 Хитайниң шиән райониға берип тәтқиқат елип барған язғучи окян кәләш әпәнди Netpano.com Тор бетидә 2010 - йили 3 - айниң 3 - күни 'ақ пирамидиларлаға йошурунған һәқиқәтләр' намлиқ тәтқиқат мақалисини елан қилған болуп, бу мақалә мундақ башланған, он төт ай узун вә җапалиқ тиришиш арқилиқ қолға кәлгән бу тәтқиқатларни түрк вә дуня җамаитиниң диққитигә сунимән. Хитай зулуми астида һаятидин айрилған шәрқий түркистанлиқ уйғур қериндашлиримизға алаһидә рәһмәт тиләймән вә уларни әсләймән, бу тәтқиқатни уларға беғишлаймән.

 Бүгүнки күнгичә нурғун талаш - тартиш пәйда қилған 'ақ пирамидилар' һәққидә нурғун муназириләр елип берилди. Бәзиләр бу тоғра деди, бәзиләр тоғра әмәс ялған деди, бәзи тәтқиқатчилар болса, хитай, бу пирамидилардики интайин муһим мәлуматларниң оттуриға чиқип қалмаслиқи үчүн тиришип келиватқанлиқини вә буниң үчүн бу пирамидиларни вә ичидики мәлуматларни мәхпий тутуватқанлиқини илгири сүрди.

Тәтқиқатчи окян кәләш әпәнди пирамидиларниң ичидә көргәнлирини рәсимгә тартқан болуп, у рәсимләрниму интернет торда елан қилған. У рәсимләрдин әң диққәт тартқан сүрәт болса ай юлтуз бәлгиси. Тарихта өткән көктүрк дөлитиниң пулидиму ай юлтуз мәвҗут икән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт