Xitay - qirghinchiliq xaraktérlik qorallarni qisqartish we kontrol qilish mesilisi boyiche aq tashliq kitab élan qildi


2005-09-01
Share

Xitay dölet kabinti peyshenbe küni "jonggoning herbiy hazirliqlarni kontrol qilish, qisqartish we aldini élish toghrisidiki aq tashliq kitabi" ni élan qilip, xelq'ara herbiy hazirliqlarni kontrol qilish we qisqartish tirishchanliqigha ehmiyet béridighanliqini bildürdi. Yadro qorallarni cheklesh we üzül - késil yoqutushni teshebbus qilish bilen birge, amérikini teywen'ge bashqurulidighan bomba satmasliqqa agahlandurdi.

Xitayning yadro qorallirini tereqqiy qildurushi özini mudapi'e qilishken

Aq tashliq kitabta körsitilishiche, xitaylar 1964 - yili tunji qétimliq yadro qorallar siniqi élip barghandin kéyin, xelq'ara jem'iyetke yadro qorallarni omumi yüzlik cheklesh we üzül – késil yoqitishni otturigha qoyghan. Aq tashliq kitapta xitay hökümiti 1964 -yildin kéyin yadro qorallarni yoqutushni teshebbus qilghan bolsimu, lékin ularning nime üchün 1996 - yilghiche 47 qétim yadro sinaq élip barghanliqini tilgha almidi. Emma xitayning yadro qorallarni tereqqiy qildürüshdiki meqsidi mudapi'e üchün, dep tekitligen.

Xitay yadro qorallirini aldi bilen ishletmeydu

Xitay tashqi ishlar ministirliqi herbiy hazirliqlarni kontrol qilish idarisining bashliqi jang yenning muxbirlarni kütüwélish yighinida tekitlishiche, jonggo herqandaq waqit we her qandaq ehwalda yadro qorallirini aldi bilen ishletmeydiken. Jang yen, xitayning shertsiz yadro qorallirigha ige bolmighan döletler we rayonlarda yadro qorallirini ishletmeydighanliqini we shundaqla yadro qorallirini ishlitish toghrisida tehdit salmaydighanliqini bildürdi.

Jang yen " jonggo yadro qorallar mesiliside bashtin - axirghiche özini tutuwélish pozitsiyisi tutup keldi. Yadro qorallirigha ige döletler ichide jonggo eng az yadro siniqi élip barghan dölet. Jonggo ilgirimu yadro qorallar musabiqisigha qatnashmighan, buningdin kéyinmu qatnashmaydu" dédi.

Géniral ju chingxu, yadro qorallarni ishlitish bilen tehdit salghan

Yéqinda xitay dölet mudapi'e uniwérsitétining ilmiy mudiri général mayor ju chingxuning, eger amérika teywen mesilisige arlashsa, jonggo uninggha yadro qorallar bilen zerbe bérishi kérek, dégen sözi amérikida zor ghul - ghula peyda qilghan idi.

Amérika dölet mudapi'e ministiri donald ramsféld, ju chingxuning sözi xitay da'irilirining resmi meydanigha wekillik qilmasliqini ümid qilimen, dégen.

Xitay teywenni bashquruludighan bomba mudapi'e künliki astigha élishqa qarshi

Aq tashliq kitabta teywen mesilisi heqqide toxtilip, teywen mesilisi jonggoning tüp menpe'etige chétilidu, dep körsetti. Aq tashliq kitabta tekitlinishiche, xitay her qandaq döletning her qandaq usullar bilen teywen'ge bashqurulidighan bomba sétish yaki uni bashqurulidighan bomba mudapi'e qalqini bilen teminleshke qarshi turidiken.

Jang yen " bu ehwal döletler arisidiki munasiwetke, rayonning bixeterlikige tesir körsitidu shundaqla bu bashqurulidighan bomba téxnikisining kéngiyip kétishini keltürüp chiqirishi mumkin. Shuning üchün biz alaqidar döletlerning bu jehette éhtiyatchan bolushini ümid qilimiz," deydu.

Közetküchilerning tekitlishiche, jang yenning sözidiki alaqidar döletler amérika bilen yaponiyini közde tutidiken. Bu yilning bashliri yaponiye tashqi ishlar ministiri bilen dölet mudapi'e ministiri washin'gtonni ziyaret qilghanda amérika bilen yaponiye, teywen boghuzini amérika - yaponiye bixeterlik shertnamisining mudapi'e künliki astigha alghanliqini jakarlighan idi.

Jang yen xitayning bi'ologiyilik qorallargha igilikini ret qildi

Jang yen, xitayning bi'ologiyilik qorallarni tereqqi qildurush programmisi barliqini ret qildi.

Amérika tashqi ishlar ministirliqining seyshenbe küni élan qilin'ghan bu heqtiki bir doklatida, xitayning 50 - yillardin qalghan bi'ologiyilik qorallar programmisidiki bezi mehsulatlar we eslihelirning hazirghiche saqliniwatqanliqini ilgiri sürgen. Jang yen, amérika tashqi ishlar ministirliqining doklatini " emeliyetke uyghun emes, mes'uliyetsizlerche heriket," dédi. Emma sabiq sowét ittipaqi mutexessislirining ashkarilishiche, 1980 - yillarning bashlirida Uyghur aptonom rayonining korla etrapidiki bir herbiy bi'ologiye tejribixanisidin mininggir wirusi chiqip kétip, etraptiki yerlik puqralarda mininggit késilining tarqilishini keltürüp chiqarghan.

Jang yen xitayning herbiy xam chotidiki artishni aqlidi

Jang yen, jonggoning herbiy xam chotni jiddi kontrol qiliwatqanliqini bildürdi. Emma xitayning yilliq herbiy xam choti yéqinqi 10 nechche yildin béri yiligha 10 ٪ tin artuq sür'et bilen köpeymekte. Xitayning 2005 - yildiki herbiy xam choti 29 milyard 900 milyon dollar bolup, 2004 - yilgha qarighanda 12 ٪ köpeygen.

Amérika dölet mudapi'e ministirliqining doklatida, xitayning emeliyettiki herbiy xam choti 70 milyard dollardin ashidighanliqini ilgiri sürgen. Xitayning herbiy xam chotni üzlüksiz köpeytish herikiti diplomatiye jehettiki til qisinchiliqini yaratmaqta. Mutexessislerning tekitlishiche, bir tereptin tinch tereqqi qilishni tekitlesh, yene bir tereptin herbiy xam chotni üzlüksiz köpeytish, xitayning semimilikige guman tughdurmaqtiken. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet