Ақсуда ечилмақчи болған сот ' кечиктүрүлгән болуши мумкин '

Биз түнүгүн исмини ашкарилашни халимиған бир радио аңлиғучимизниң радийомизниң уйғур бөлүмигә учур йоллиған учуриға асасән, һәм сотлинидиған балиниң ағинисидин игилигән учурға асасән, 2009 - йили 5 - айниң 27 - күни(чаршәнбә күни ) ақсу шәһиридә очуқ сот ечилип, бултур олимпик мәзгилидә тутқун қилинған уйғурлар устидин очуқ сот ечилмақчи икәнлики һәққидики хәвәрни бәргән идуқ.
Мухбиримиз миһрибан
2009-05-27
Share

Түнүгүн кечә ( йәни ақсуда сот ечилмақчи болған мәзгилниң өзидә ) биз ақсу шәһәрлик сот мәһкимисигә телефон қилдуқ. Әмма телефонимизни алған сот идарисиниң хадими бизгә, өзиниң олимпик мәзгилидә тутулған бу кишиләр устидин ечилидиған бу сот һәққидә хәвири йоқлуқини деди.

Бугун әтигән, бу иштин хәвири бар бир уйғур радиомизниң уйғур бөлүмигә телефон қилип, бизниң тунугун бәргән хәвиримизни аңлиғандин кейин, өзиниң олимпик мәзгилидә қолға елинған бу балиларниң әһвалини суруштургәнликини, әмма бу балилар һәққидә сот ечилғанлиқи һәққидә ениқ учурға игә болалмиғанлиқини, бу һәптә идаридин дәм елишқа қоюп бәргини учун, келәр дүшәнбигичә бу иш тоғрисидики хәвәрни радиомизға йәткузуп берәләйдиғанлиқини ейтти.

Биз сүрүштүрүш арқилиқ олимпик мәзгилидә қолға елинған балилардин турғун әқилниң акисиниң телефон номурини тепип, униң билән иниси вә униңға охшаш сиясий җинайәт билән қолға елинған, башқа балилар устидин бүгүн ечилмақчи болған сотниң әһвали үстидә сөһбәт өткүздуқ.

Сөһбәт җәрянида у өзиниң һазир үрүмчидә әмәсликини, шуңа түнүгүн сот ечилидиғанлиқи һәққидики хәвәрни аңлиғандин кейин, дәрһалла ақсуға қайталмиғанлиқини, қалған туғқанлириниң бу сот һәққидә һечқандақ уқтуруш тапшурувалмиғанлиқи үчүн бу сотқа бармиғанлиқини баян қилип, сотниң бәлким кечиктурулгән болуши мумкинликини яки сотниң йепиқ һаләттә мәхпий ечилған болуши мумкинликини баян қилди.

Сөһбәт җәрянида у бизгә һазир сияси җинайәтчиләр үстидин ечиливатқан сотниң илгирики йиллардикидәк, пүтүн хәлқни йиғип чоң мәйданда очуқ сот ечилип әмәс, бәлки сот идарисиниң ичидила йепиқ һаләттә ечиливатқанлиқини, нурғун кишиләрниң йоқап кәткән яки тутуп кетилгән уруқ - туғқанлири үстидин җаза һөкум қилинғанлиқини уларға кесим елан қилинип болғандин кейин андин хәвәр тапидиғанлиқини, сот җәрянида адвокат яллиған һаләттиму адвокатниң һечқандақ роли болмайдиғанлиқини баян қилди.

Хитайда ечилидиған сотларда, адвокатларниң ролиниң йоқлуқини, зияритимизни қобул қилған мәлум сот идарисиниң бир сотчи хадимиму етирап қилған болуп, у хитайда елип берилидиған сотниң пәқәтла һөкумәтниң қараринила җакарлаш болуп, сотчиниң дилониң әмәлий әһвалиға қарап әмәс, бәлки юқиридин бекитилгән кисимнила оқуп беридиғанлиқини, өзиниң вә өзигә охшаш қанун орнида ишләйдиған уйғурларниң еғир бесим ичидә яшаватқанлиқини баян қилған иди.

Уларниң баянидин уйғур елидә елип бериливатқан сотларда җинайәт гумандари дәп қаралған кишиниң сот җәрянида өзини ақлаш һоқуқиниң йоқлуқини, намда уларға адвокат сәпләп берилгән болсиму, әмма уларға берилидиған җаза кисими алдин бекитивәткән қарар бойичә, сотчи тәрипидин елан қилиниш биләнла тугәйдиғанлиқидәк тәңсизлик амиллири ашкариланди.

Гәрчә биз бугун олимпик мәзгилидә тутқун қилинған балиларниң сот әһвали һәққидә ениқ учурға еришәлмигән болсақму, әмма уйғур елидики сотларниң һәқиқий маһийитини тонуш имканийитигә игә болдуқ.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт