Chölni bostan qiliwatqan - hashagha ishlewatqan déhqanning qan teri

Bahar pesli kökertish mezgili, yeni Uyghur élidimu jay jaylarda kolléktip shexsiy köchet tikip orman bina qilish pa'aliyetliri élip bérilmaqta. Seyshenbe küni shinxu'a agéntliqi aqsuda yéza kenttiki déhqanlarning sheherge kirip beste - beste köchet sétiwélip makanini kökertishke atlan'ghanliqidek bir xewerni élan qildi.
Muxbirimiz gülchéhre
2009-03-25
Share
Uyg-dixan-hashar1-305 Uyghur diyarining namelum yézisidiki uyghur déhqanlirining hashar üstidiki körünüshi.
RFA File

Mezkur uchurgha asasen aqsuning yézilirigha téléfon ulighinimizda, eslide déhqanlarning köchet tikishke mejburliniwatqanliqi shuningdek hasharning dawamlishiwatqanliqidek emeliy ehwallar ashkarlandi.

Uyghur élidiki bir qanche xitay xewer torlirida bériliwatqan xewerlerge qarighanda Uyghur élining hemme jaylirida dégüdek köchet tikip orman bina qilish pa'aliyetliri élip bérilmaqta. Orman bina qilish insanlarning yashash muhiti, tebi'et üchün intayin ehmiyetlik bolghan bir pa'aliyet elwette. Gerche insanlar üchün hayatida köchet tikip tebi'etke, hayatliqqa az bolsimu emeliy töhpe qoshush bir insaniy mejburiyet bolsimu u elwette ixtiyari élip bérilidighan bir emgek.

Shinxu'a tori qatarliq bir qanche xitayche uchur torlirigha qarisaq aqsuda nöwette déhqanlarmu yéza - yézilardin sheherge kélip köchet sétiwéliwatqanliqidek süretlik bir xewer bérildi, xewerde éytilishiche,aqsu shehri 2008 - yilida xitay boyiche gherbiy shimal rayonidiki tunji "orman sheher" bahalan'ghan sheher hésablinidiken.

Melum bolghandek aqsuning köpligen yéziliri ta - hazirgha qeder namratliqtin qutulghini yoq, bolupmu hazirqidek pesil déhqanlarning ashliq - tügülliri axirliship,yazliq térilghu teyyarliqi üchün uruq we oghutlarni sétiwalidighan, ghorigül mezgili mundaq peytte ularning beste - beste köchet sétiwélishining jiddiy hajiti barmu ?

Bu heqte bizning aqsuning qumbash yézisigha qaratqan téléfon ziyaritimizdin, telimakan qumluqining shimalidiki bu sheherning yenila déhqanlarning qan teri bilen ormanliqqa ayliniwatqanliqi, déhqanlarning hökümetning kökertish pilanini ishqa ashurush üchün, aran éshin'ghan pullirighimu köchet élip, hashargha ishlep bu makanni kökertiwatqanliqi ashkarlandi. Bu heqte ismini ashkarlashni xalimighan bir Uyghur déhqanning éytqanliri yuqurqilarni ispatlap turuptu.

Uyghur yéziliridin igilep kéliwatqan melumatlirimizdin ashkariki gerche xitay da'iriliri mejburi heqsiz emgek bolghan hashani 2005 ‏ - yilining axirghiche pütünley axirlashturidighanliqini élan qilghan bolsimu, yer sharida peqet we peqet Uyghur élide mana mushuninggha oxshash "kelkünning aldini élish qurulushi", "qumni tizginlesh", "yollarni tereqqiy qildurush", "su qurulushi" hetta "köchet tikip orman bina qilish" dégendek namlar bilen nami özgertilip dawamlashmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet