Aqsudiki partlitish weqesi kanada metbu'atlirida keng kölemde yer aldi

Etigen sa'et 8 etrapida, aqsu shehiri égerchi yéziliq saqchixanining kocha charlash etriti partlitish hujumigha uchrighan orun körsitilgen xerite. 2010-Yili 19-awghust.

Kanadada chiqidighan nopuzluq gézitlerdin yer shari mektupliri géziti we k b k radi'osi qatarliq metbu'at wastiliri weqe heqqide tepsiliy toxtaldi shundaqla Uyghurlarning xitayning gherbide yashaydighan türki milletler sistémisigha tewe musulmanlar ikenliki, rayonda ötken yili 5 - iyunda xitay hökümitining milliy kemsitish siyasitige qarshi zor kölemlik xelq qarshiliq herikitining kötürülgenliki qatarliqlar heqqide tepsiliy melumat bérildi. Netijide, bu weqe arqiliq Uyghurlar kanada xelqige yene bir qétim tonushturuldi.

Igileshlerge asaslan'ghanda, aqsu shehiridiki shyanggang bazar, wangsen we igechi yézisi qatarliq jaylar Uyghurlar topliship olturaqlashqanliqi shundaqla diniy zatlar we yaghliq chigidighan xanim ‏- qizlarning köplüki bilen xitay hökümitini izchil rahetsiz qilip kéliwatqan rayonlar iken.

Shu wejidin yéqinqi yillardin buyan xitay hökümiti yéngi sheher rayoni berpa qilish dégen nam astida shyanggang baziri we wangsen dégen jaylardiki Uyghur ahalilirining öylirini chéqip ularni bashqa jaylargha tarqaqlashturuwetken iken.

Nöwette aqsudiki birdin - bir Uyghurlar topliship olturaqlashqan igechi yézisi kéche ‏- kündüz xitay amanliq saqchiliri teripidin közitilidighan nuqtigha aylinip qalghanliqi üchün bu jayda yashawatqan Uyghurlarning naraziliqini qozghighan.
 
Aqsuda yüz bergen partlitish weqesi munasiwiti bilen biz kanada Uyghur jem'iyitining re'isi ruqiye turdush xanim we Uyghur ziyaliysi hashimjan ependilerni ziyaret qilduq.

Ziyaritimizni qobul qilghan ruqiye turdush xanim, Uyghur diyarida ölümning mewjutluqi küreshning dawamlishiwatqanliqining belgisi ikenliki heqqide toxtaldi.

Yuqiridiki awaz ulinishidin, bu heqtiki melumatimizning tepsilatini anglaysiler.