Арзугүл турсун йәңгиди, оғлиниң исми үмид

Арзугүл турсун йәкшәнбә күни чүштә дадамтудики йезилиқ дохтурханиға елип келингән. Дуняға көз ечиштин аввал 3 қетим өлүм тәһдитигә дуч кәлгән бовақ, саәт 12 дин 40 минут откәндә дуняға көз ачқан. Арзугүл турсун аилиси, көп җәңги - җидәлләр билән дуняға кәлгән бу пәрзәнтигә "үмид" дәп исим қойған.
Мухбиримиз шөһрәт һошур
2009-02-13
Share
Uyghur-ayalliri-bowaq-305.jpg 2008 - Йили 31 - ийулда тартилған бу сүрәттә, ақсудики намәлум бир гуруппа уйғур айаллири вә бир бовақ.
AFP Photo

Арзугүл турсунниң дадиси турсунҗан һәсән бизгә, бу хәвәрни мундақ йәткүзди: арзугүл турсун һамиләсни қутқузуш үчүн һамилә үч айлиқ вақтида бир қетим мәһәллидин ғайип болған. Йеза кадирлири аилисидикиләргә бесим ишләткәндин кейин аилисигә қайтип кәлгән. Йеза кадирлири уни 11 ‏ - ноябир күни су дәрваза дохтурханисиға мәҗбурий елип барған . Бу чағ һамилиәниң 6 ай 15 күнлук вақти болуп, һамилә опиратсийә қилинмақчи болған.

Уйғур миллий һәрикитиниң рәһбири рабийә қадир ханим әркин асия радиоси мухбириниң бу һәқтики мәлумати арқилиқ әһвалдин хәвәр тапқандин кейин, дәрһал һәрикәткә келип америкидики алақидар орунларни инсаний ярдәмгә чақирған. Буниң билән америка дөләт мәҗилиси әзалиридин кирс смит әпәнди хитайға наразилиқ билдүргән вә уларни опиратсийидин ваз кечишкә чақирған.

Бу арилиқта, арзугүл дохтурханидин қачқан. Буниң билән ғулҗа шәһәрлик сақчи хадимлири 22 саәт тәкшүрүш вә өй ахтуруш елип берип, арзугүлни панаһланған йеридин тепивалған.

Сақчилар уни у қетим или областлиқ ана - балилар дохтурханисиға қамиған. Дохтурхана 18 ‏ - ноябир күни әтигәндә уни опиратсийә қилмақчи болған. Арзигулниң дадиси опиратсийә тохтамиға мәҗбурий қол қойдурулған.

Бу вәзийәт радиода елан қилинғандин кейин, рабийә қадир ханим хәлқара җамаәтни йәнә бир қетим һәрикәткә чақирған вә алақидар орунлар билән бу һәқтә йүз туранә көрүшкән. Буниң нәтиҗисидә америка дөләт мәҗилиси әзалиридин крис смит вә җой питис әпәндиләр бирләшмә баянат елан қилип, хитайға тәкрар наразилиқ билдүргән вә америкиниң бейҗиңдики баш әлчисигә телефон қилип, баш әлчини вәқәгә қол селишқа чақирған. Баш әлчи әтиси әтигәндә хитай ташқи ишлар министирлиқи билән бу һәқтә сөзлишидиғанлиқини билдүргән. Нәтиҗидә, хитай арзугүл турсунни опиратсийә қилиш қараридин ваз кәчкән вә дохтурханидин қоювәткән.
 
Арзигул турсун бүгүн әтигән дохтурхана рәсмийәтлирини тамамлап, дадамту йезисиниң булақ мәһәллисидики аилисигә қайтқан.

Нөвәттә арзугүл турсун вә оғли үмидниң саламәтлик әһвалиниң нормал икәнлики мәлум, әмма, арзугүл аилисиниң туғут җәрянида дохтурхана вә һөкүмәт хадимлири тәрипидин қандақ муамилигә учриғанлиқи мәлум әмәс. Чүнки туғуттин бир қанчә күн аввал, арзугүл вә йолдишиниң телефони сақчилар тәрипидин тақиветилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт