Altaydiki qéyin derixi boz yer échish sewebidin qurup ketti

Xitay metbu'atliri yéqinda, peqet altay wilayitidila saqlinip qalghan eng axirqi 160 tüp yawa shor qéyin derixining qurup ketkenlikini xewer qildi. Igiligen uchurlardin melum bolushiche, bu qéyinlar shu yerdiki xitay köchmenlirining qéyinzarliq etrapida boz yer échip, qéyinzarliqning su menbesining üzülüp qélishi seweblik qurup ketken iken.
Muxbirimiz mihriban
2010-10-15
Share
Attaydiki-qeyin-derixi-baghchisi-305 2009 - Yili 10 - iyulda, http://bbs.tiexue.net Torigha qoyulghan bu süret, altay shehirining gherbiy shimaligha jaylashqan qéyin derixi baghchisidin bir körünüsh.
http://bbs.tiexue.net Din élindi.

Matériyallardin melum bolushiche, qéyin derixi in'glizche "white Birch Tree" dep atilidighan bolup, sibiriye, xitayning sherqiy shimalidiki xéylongjang ölkisi, mongghuliye hem Uyghur élining altay wilayiti qatarliq shimaliy asiya rayoni Hem sherqiy yawropa döletlirige tarqalghan iken.

Altay wilayitige tarqalghan yawa shor qéyin derixi, qéyin derixi a'ilisidiki shorluqta ösüshke chidamliq, terkibidiki tuz miqdari %1.74 Tin yuqiri shor tupraqta mewjut bolup turalaydighan birdinbir qéyin a'ilisidiki ösümlük bolup, ziyandash hasharetlerning ziyinigha az uchraydighan alahidilikke ige . Bu derex peqet altay rayonidila saqlinip qalghini üchün, dunya boyiche qoghdilidighan ösümlükler türige kirgüzülgen derex türi hésablinidiken. Xitaydimu 1984 - yili yawa shor qéyin derixi 2 - derijilik qoghdilidighan derex dep békitilgen. Emma bu yil 2010 - yil küz peslige kelgende, yerlik altayliqlar "aq qéyin" dep atishidighan bu derexning altay wilayiti tewesidiki eng axirqi 160 tüpimu pütünley qurup ketken.

Xitayning tengritagh torining 11 - öktebirdiki xewiridin ashkarilinishiche, "köp yillardin buyan ünümlük qoghdalmighanliqtin hem bultur qish we bu yil etiyazdiki qélin qarliq hawarayining tesiri tüpeylidin , altay shehirining alaqaq yézisidiki tuz köl boyida ösken eng axirqi 160 nechche tüp yawa shor qéyin derixining hemmisi qurup ketken."

Xewerde déyilishiche, altay wilayetlik ormanchiliq téxnikisi ornining bashliqi wang jyen muxbirgha séntebirning otturilirida, bu orunning xadimlirining alaqaq yézisidiki tuz kölge bérip yawa shor qéyin derixining ösüsh ehwalini tekshürüp körgenlikini, ötken yillarning mushu mezgilide shor qéyin ormanliqi altun rengge kirgen bolsa, bu yil qurup qaqshal bolup ketken bir parche qéyin ormanliqini körgenlikini bildürgen.

Matériyallardin melum bolushiche, altay wilayitidiki qurup ketken yawa shor qéyin derixi alaqaq yézisidiki tuz kölning jenub , shimal ikki qirghiqigha tarqalghan. Yawa shor qéyinzarliqining kölimi eslidinla az bolup, xitayning altay rayonigha jaylashqan 10 ‏- déwiziyisining qéyinzarliq etrapida köplep boz yer échishi, déhqanchiliq meydani qurushi netijiside , ötken esirning 80 - yillirigha kelgende altay wilayitining balbaghay yézisidiki qéyinzarliq yoqilish girdabigha kélip qalghan. 1984 - Yili xitay hökümiti altaydiki yawa shor qéyin derixini dölet boyiche qoghdilidighan 2 - derijilik ösümlük dep en'ge alghan. Emma qoghdash tedbirliri yaxshi bolmighini üchün , qéyinzarliq kölimi barghanche tariyip, 1996 - yilgha kelgende 400 tüp derex saqlinip qalghan.

 Igiligen uchurlardin melum bolushiche, qéyinzarliq etrapidiki xitay köchmenlirining tériqchiliq qilishi seweblik, qéyinzarliqning birdin -bir su menbesi bolghan tuz kölning su yüzi töwenlep, tuz kölge tayinip ösüwatqan qéyinzarliqtiki derex sani 160 tüpke chüshüp qalghan. Bultur qish bu yil etiyazda, altay wilayitide yaghqan qélin qar érigendin kéyin, alaqaq yézisidiki tuz kölning süyi qayta örligen. Netijide qéyinlar sümürüwalidighan tuz miqdarimu ziyade köpiyip ketken. Qélin qar , uzaqqa sozulghan töwen témpératura , uzun mezgil shor sugha chiliship qélish qatarliq amillar eng axirqi 160 tüp yawa shor qéyin derixinimu pütünley qurutuwetken.

Ejeblinerliki shuki, tengritagh toridiki xewiride hazir altay wilayitidiki yawa shor qéyinzarliqining pütünley qurup ketkenliki xewer qilinish bilen bille, yene ormanchiliq idarisining 1996 - yili qéyinzarliqtin bashqa jaygha yötkesh arqiliq 6 tüp qéyin derixini saqlap qalghanliqi zor netije süpitide ormanchiliq meydanining kadiri wang jyenning aghzidin: "hélimu yaxshi, 1996 - yili altay ormanchiliq tarmaqliri yawa qéyin'gha qarita yötkep qoghdash élip barghan. Hazir, altay az uchraydighan ösümlük bayliqi béghigha yötkelgen alte tüp shor qéyin derixining ösüsh ehwali yaxshi bolup, hazir alte métirdin ashti" dep bayan qilin'ghan.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet