Awstraliyide, Uyghur yashliri putbol musabiqisi we Uyghur medeniyet kéchiliki ötküzdi


2007.04.09

Uyghur yashliri putbol musabiqisi we Uyghur medeniyet kéchilikini teshkilligen awstraliye Uyghur jem'iyitining re'isi we dunya Uyghur qurultiyining awstraliyidiki wekili hösen ependi bu qétim sidnéy shehiride ötküzülgen Uyghur yashliri putbol musabiqisining awstraliyide ötküzülgen üchinchi qétimliq putbol musabiqisi ikenlikini bildürdi. Uning éytishiche, awstraliyining adalhayd, milborn we sidnéy qatarliq üch chong shehiride Uyghur putbol komandisi qurup, Uyghur yashliri putbol musabiqisi ötküzüshning asasliq meqsiti, xitay hökümitining ghuljida Uyghur yashlar meshripining Uyghur yashliri arisida putbol musabiqisi ötküzüshini chekligenlikini lenetlesh we 1997‏- yili fiwral éyida xitay hökümiti teripidin qirghin qilin'ghan Uyghur yashlirini xatirilesh we ularning rohini shad qilishtin ibaret iken.

Awstraliyining sidnéy shehiride ötküzülgen Uyghur yashliri putbol musabiqisi we Uyghur medeniyet kéchilikige awstraliye parlamént ezalirimu qatnashqan bolup, lori fogisun Uyghur medeniyet kéchilikining échilishida qilghan sözide, Uyghurlarning öz medeniyiti, saz-muzikisi, naxsha-usulliri bilen köp milletlik awstraliye jem'iyitige yéngi bir medeniy bayliq qoshqanliqini bildürgen. U shundaqla xitay hökümitining nöwette sherqiy türkistan xelqighe qarita élip bériwatqan siyasitini yaxshi bilidighanliqini we awstraliye Uyghur jem'iyitining xitay hökümitining kishilik hoquq depsendichiliklirini pash qilish toghrisida élip bériwatqan pa'aliyetlirini qollaydighanliqini tekitligen.

Uyghur medeniyet kéchilikige qatnashqan sidnéy rayonluq sheher bashliqi barbara féri xanim, kéchilikte qilghan sözide, "bügünki sorun'gha qatnishish üchün adalhayd we milborn sheherliridin kelgen kishilerning küpinchisining yashlardin teshkil tapqanliqi méni sherqiy türkistan mesilisining kilechikidin ümidlendürdi. Bügünki sorun'gha qatnashqanlarning 70 pirsentidin köpreki yashlar, men buni körüp rohlandim. Silerning dawayinglar aqsap qalmaydiken" dégen.

Dunya Uyghur qurultiyining awstraliyidiki wekili we awstraliye Uyghur jem'iyitining re'isi hösen ependining bildürüshiche, téxi yéqindila awstraliyide qurulghan Uyghur ansambili orunlighan oyunliri we naxsha-usulliri bilen Uyghur kéchilikige qatnashqanlarning yüksek alqishigha érishken.

Bu qétimqi Uyghur yashliri putbol musabiqisida sidnéy Uyghur yashliri putbol komandisi alahide maharet körsitip, chémpi'onluq longqisini alghan. Ikki ming dollargha teyyarlan'ghan longqa dunya Uyghur qurultiyining wekili we awstraliye Uyghur jem'iyitining re'isi hüsen ependi teripidin sidnéy Uyghur yashliri putbol komandisining kapitanigha teqdim qilin'ghan. (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.