Хитай һөкүмити чәтәл мәтбуатлирини техиму қаттиқ чәкләш һәққидә йеңи бәлгилимә чиқарди


2006.09.12

Хитай һөкүмити чәтәл учур вастилири тарқатқан һәр қандақ учурларни чәкләш вә контрол қилиш һәққидә 22 маддилиқ йеңи бәлгилимә чиқарди. Мәзкур бәлгилимидә "чәтәл мәтбуатлири арқилиқ тарқитилған һәрқандақ учур мәмликәт ичигә киргинидә чоқум алди билән шинхуа агентлиқиниң тәстиқидин өтүши керәк, чәтәл мәтбуатлириниң хитайда тарқатмақчи болған һәрқандақ хәвәрлири мәзмун җәһәттә қаттиқ тәкшүрүлүши керәк, әгәр чәттин киргән учурларда хитайниң асасий қануниға хилаплиқ қилидиған яки дөләт бихәтәрликигә, җәмийәт муқимлиқиға, диний сиясәткә вә яки миллий иттипаққа тәсир көрситидиған мәзмунлар болидикән, шинхуа агентлиқиниң уларни елип ташлаш вә бу һәқтә қаттиқ агаһландуруш бериш һоқуқи бар" дегәндәк мәзмунлар алаһидә көрситилгән.

Хитай һөкүмитиниң чәтәл мәтбуатлирини техиму қаттиқ контрол қилиш һәққидә бекиткән бу бәлгилимиси елан қилиниш билән бир вақитта, хәлқара җәмийәтниң қаттиқ наразилиқини қозғимақта. Мәсилән, явропа бирлики 11 ‏- сентәбир күни хитай даирилириниң чәтәл учур вастилири тарқатқан учурларни қаттиқ чәкләйдиған вә контрол қилидиған йеңи бәлгилимә чиқарғанлиқини қаттиқ тәнқид қилип, ''бейҗиң һөкүмитиниң чәтәл учурлирини чәкләйдиған бу хил йеңи бәлгилимини чиқарғанлиқи бундин кейинки хитай- явропа мунасивитидә интайин сәлбий рол ойнайду"' дәп көрсәткән.

Америка дөләт кабентиму бу һәқтә мәхсус баянат елан қилип, хитай һөкүмитини қаттиқ әйиблиди. Көплигән анализчилар, хитай һөкүмитиниң чәтәл мәтбуатлириға болған бу хил контроллуқини хитай тәрәққиятидики бир чоң чекиниш дәп көрсәтмәктә.

Америка -уйғур бирләшмисиниң баш секретари алим сейтоф вә канада уйғур җәмийитиниң башлиқи, дуня уйғур қурултийиниң муавин рәиси муһәммәт тохти әпәнди бу мунасивәт билән зияритимизни қобул қилип, қарашлирини оттуриға қойди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.