Xelq'aradiki teshkilatlar axbarat erkinliki mesiliside xitaygha bésim ishletmekte

• Muxbirimiz méhribanning bu heqtiki melumati
• Download story audio

8 - Ayning 8 - küni, "xelq'ara chégrisiz muxbirlar teshkilati" ning ikki neper wekili xelq'ara olimpik komitétining bash shitabigha bérip, mezkur komitét emeldarigha 4000 din artuq kishining imzasi qoyulghan murajet xétini sundi.

Chégrisiz muxbirlar teshkilati xelq'ara olimpik komitétidin axbarat erkinliki mesilisi heqqide xitaygha yéterlik bésim ishlitishni telep qildi hemde 2008 - yili échilidighan olimpik yighini jeryanida, xitay hökümitining herqaysi döletlerdin barghan muxbirlargha toluq erkinlik bérip, ularning ixtiyari, erkin melumat bérishige yol qoyushini telep qildi.

Olimpik komitétigha murajet xéti sun'ghan ikki neper wekilning biri chégrisiz muxbirlar teshkilatining asiya bölümi mes'uli lobsér ependi bolup, u sözide " béyjingda échilidighan olimpik tenterbiye yighinigha 3 yil qalghan bundaq bir mezgilde, xelq'ara muxbirlar teshkilatining olimpik komitétigha xet yézip, xitay hökümitidin chet'ellik muxbirlargha köngüllük xizmet shara'iti yaritip bérishni telep qilishi nahayiti zörür bir ish" dep bildürgen.

Xitayda xelq'ara pa'aliyetlerde axbarat téximu kontrol qilinidu

Nyo-yorktiki xitay kishilik hoquq teshkilatining re'isi lyuchin, xelq'ara chégrisiz muxbirlar teshkilatining xitaydiki axbarat erkinliki mesilisi heqqide mexsus olimpik komitétigha xet yézip murajet qilishidiki sewebler heqqide toxtilip mundaq dédi :

" Menche, xelq'ara chégrisiz muxbirlar teshkilati xitaydiki emeliy ehwallarni öz közi bilen körgechke bundaq teleplerni otturigha qoyghan. Chünki xitayda herqandaq bir xelq'ara pa'aliyet ötküzülgende, metbu'at sahesi qattiq kontrol qilinip, emeliy ehwallar yoshurun qalidu. Xitay hökümiti özining xelq'aradiki abroyigha tesir yetküzmeslik üchün, bir qisim ijtima'iy mesililerni yoshurushqa tirishidu. Del mushu sewebler tüpeylidin, xelq'ara chégrisiz muxbirlar teshkilati olimpik komitéti arqiliq xitay hökümitige bésim ishlitip, ularning olimpik yighini échilish jeryanida, chet'el muxbirlirining erkin - azade ziyaret qilip, melumat bérishige yol qoyushini telep qilghan".

Xitay, qilghan wediside turmidi

Ziyaritimizni qobul qilghan xitay kishilik hoquq teshkilatining re'isi lyuchin, xitay hökümitining bundin 5 yil ilgiri, olimpik murasimini ötküzüsh hoquqigha ige bolush üchün kishilik hoquq mesilisini yaxshilash toghrisida wede qilghanliqini, lékin bu 5 yil jeryanida xitaydiki kishilik hoquq mesiliside ilgirilesh bolmay, eksiche chékinish yüz bériwatqanliqini tekitlep, " hazir olimpik yighinining échilishigha 3 yil waqit qaldi, bundaq peytte, biz xelq'ara olimpik komitéti arqiliq, xitay hökümitini peqet axbarat erkinliki mesilisidila emes, belki kishilik hoquq mesilisidimu agahlandurishimiz kérek, xitaydiki axbarat we kishilik hoquq qatarliq mesililer peqet, xelq'ara bésimning küchiyishi we xitay xelqining tirishchanliqi arqiliq andin yaxshilinishi mumkin ' dep körsetti.

Xitay, dunyadiki muxbirlarni qamaydighan eng chong türme

Xelq'ara chégrisiz muxbirlar teshkilati xitayni " dunyadiki muxbirlarni qamaydighan eng chong türme" dep körsetken.

Mezkur teshkilatning melum qilishiche, hazirning özide xitay türmiliride yatqan muxbirlar sani 100 din ashqan bolup, ularning köp sandikisi uzun muddet qamaq jazasi bérilgenler bolup hésablinidiken.

Xelq'ara chégrisiz muxbirlar teshkilati asiya ishliri bölümining mes'uli lobsér ependi kelgüsi 3 yil ichide, mezkur teshkilat xelq'ara olimpik komitéti arqiliq xitay hökümitige izchil bésim ishlitip, xitaydiki axbarat erkinlikini yaxshilashqa tirishidighanliqini bildürdi.

Xelq'ara olimpik komitétining bayanatchisi deywis ependimu 2008 - yili béyjingda échilidighan 17 künlük olimpik tenterbiye yighini jeryanida, mezkur teshkilatning peqet yighinning bixeter échilishighila emes, belki yighin échilish jeryanida bérilidighan xewer we melumatlarning toghra hem éniq bolushighimu tirishchanliq körsitidighanliqini bildürdi. (Méhriban)