Amérika mutexessisliri xitaydiki metbu'at erkinlik mesilisi heqqide toxtaldi


2005-11-07
Share

Amérikidiki köpligen metbu'at mutexessisliri yéqinda, xitaydiki metbu'at erkinliki mesilisi heqqide toxtilip, "xitayning démokratiyige méngish yolidiki eng halqiliq mesile iqtisadning tereqqiy qilishi emes, belki metbu'atning erkin bolishi "dep körsetmekte.

Xitay hökümiti xelqning erkin pikir bayan qilishini téximu qattiq kontrol qilmaqta

Amérika dölet mejlisi kéngesh palatasi xitay ishliri komitéti ezasi mayk ependi "biz deslepte, intérnét tor betliri, sün'iy hemrah, xelq'ara radi'o istansisi qatarliqlarning köpiyishi xitay metbu'atlirini téximu roshenleshtürüp, téximu köpligen xitay xelqini heqiqiy yüz bergen ehwallardin xewerdar qilidighan boldi, dep oylighan iduq. Lékin emeliy ehwal biz oylighandek bolmidi. Xitay hökümiti kishilerning intérnét, radi'o we sün'iy hemrah arqiliq uchur igilishige türlük amallar arqiliq, qattiq tosqunluq qilip kelmekte. Ular hetta intérnét saqchilirini nöwetchilikke qoyup, xelqning erkin pikir bayan qilishini téximu qattiq kontrol qilmaqta" dep bildürdi.

Amérikidiki xitay ishliri tetqiqatchisi ten sin'gé ependi " xitaydiki axbarat erkinliki amérikining menpe'eti bilen zich munasiwetlik " dep tekitlep " démokratik tüzüm peqet axbarat erkinliki we kishilerning sözlesh erkinliki bolghan shara'itta, andin emelge ashidu. Xitayda erkin pikir bayan qilish muhiti bolmay turup, démokratiyining bolushi mumkin emes" dep körsetti.

Xitaydiki axbarat erkinliki mesilisi amérika bilen heqiqeten munasiwetlik

Nyu-yorktiki "béyjing bahari zhornili" ning bash tehriri shö wéy ependimu xitaydiki axbarat erkinliki mesilisining amérika bilen heqiqeten nahayiti munasiwetlik ikenlikini körsitip, " amérika xitaydiki axbarat erkinliki mesilisige intayin köngül bölmekte. Amérika dunya boyiche eng démokratik dölet. Biz amérikini dunyaning saqchisi désekmu bolidu. Chünki u herqandaq döletning zorawanliq tüzüm yürgüzishige qarshi. Amérika her qandaq bir döletke démokratiye heqqide baha bérishte, aldi bilen shu dölettiki xelqning sözlesh erkinlikining bar we yoqliqini alahide közde tutidu " dédi.

Shöwéy ependi söhbet jeryanida yene, axbarat erkinliki dégenning özi sözlesh erkinliki dégenlik, mesilen, kishilerning hökümetke bolghan naraziliqini we tenqidini ochuq - ashkara bayan qilishini axbarat erkinliki dep chüshensek bolidu. Lékin xitayda ta hazirgha qeder buxil erkinlik hasil bolalmidi. Xitayda axbarat erkinliki bolmighachqa, 1958 - yilidiki ongchilargha qarshi turush, medeniyet inqilabi we tyen enmin oqughuchilar herikiti qatarliq paji'elik weqeler toxtimay yüz bérip, her millet xelqighe keyni -keynidin apet élip keldi" dep bildürdi.

Muqimliqni bahane qilip metbu'at kontrol qilinmaqta

Dowéy xewerler tor bétining mes'uli xé ping ependi xitaydiki axbarat erkinliki mesilisining yildin - yilgha éghirliship kétiwatqanliqini hemde bundaq bolushidiki eng asasi seweb, atalmish jem'iyet muqimliqi üchün ikenlikini körsitip, " 17 - qurultay shundaqla olimpik yighini échilishtin ilgiri, xu jintaw barliq küchi bilen metbu'atni téximu bek kontrol qilip, jem'iyet muqimliqini saqlash bilen meshghul bolidu. Xu jintaw üchün jem'iyet muqimliqini saqlashtiki birdin - bir amal kishilerning öz aldigha xalighanche pikir bayan qilishini we maqale élan qilishini cheklesh. Eger bundaq qilmaydiken, herqaysi hökümet we partiye orunliri kontrolsiz halette qalidu" dep bildürdi.

Yéqinda "chégrisiz muxbirlar teshkilati" xitaydiki axbarat erkinliki mesilisi heqqide mexsus doklat élan qilip, axbarat erkinlik mesiliside, dunyadiki 167 dölet ichide xitay 159 - orunda turidighanliqini körsetken. Mezkur teshkilat yene xitay hökümitidin kompartiyining kaniyi dep hésablan'ghan shinxu'a agéntliqini derhal yoq qilishni telep qilghan. (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet