Хитай һөкүмити сот хадимлирини мухбирларниң зияритини қобул қилиштин чәклиди


2006-09-13
Share

Хитай һөкүмити чәтәл мәтбуатлириниң хитайда учур тарқитишини чәкләш һәққидә йеңи бәлгилимә елан қилиш билән бир вақитта, сот мәһкимисидә ишләйдиған сотчи вә хизмәтчиләрниң һәрқандақ мухбирниң зияритини қобул қилишиға болмайдиғанлиқи һәққидиму йеңи бәлгилимә чиқарди.

Мәзкур бәлгилимидә "дөләт мәхпийәтлики, сода-санаәт мәхпийәтлики вә шәхси мәхпийәтликкә аит мәзмунлар; яш өсмүрләр билән мунасивәтлик болған делолар, сот ечилиш вақти ашкариланмиған делолар, сот ечиш җәрянидики муназириләр вә сот мәһкимисигә аит ички җәһәттин тарқитилған һөҗҗәтләр вә шундақла мунасивәтлик орунларниң тәстиқидин өтмигән түрлүк җинайи ишлар делосиға аит сан сифирлар қатарлиқларниң һәммисини мәхпий тутуп, һәргизму мәтбуат вә хәлқ аммисиға ашкарилимаслиқ керәк " дәп көрситилгән.

Сәйшәнбә күни бейҗиңда, хитай алий сот мәһкимисиниң башлиқи шяв яң бундин кейин хитайдики алий сот, оттура сот вә йәрлик сот орунлирида, ахбарат баянатчи вә ахбарат елан қилиш түзүми бекитилиши керәкликини оттуриға қойди. У сөзидә йәнә, " сотчилар өзиниң һәр бир сөз, һәрикитигә интайин диққәт қилиш керәк, юқириниң тәстиқисиз, һәргизму өз алдиға пикир баян қилип, мухбирларниң зияритини қобул қилмаслиқи керәк. Мәтбуат хадимлирини қобул қилиш яки қилмаслиқ мәсилисидә, чоқум алди билән ахбарат -тәшвиқат орунлириниң бир туташ башқурушиға бойсунуп, уларниң тәстиқини елиши керәк " дәп көрсәтти.

Бейҗиңдики қанун саһасидә ишләйдиған бир қисим мутәхәссисләр "хитай һөкүмитиниң сот хадимлирини мухбирларниң зияритини қобул қилиштин чәклигәнлики мәтбуат орунлириниң бундин кейин сот мәһкимисидә йүз бериватқан бир қисим ашкарилашқа тегишлик болған ишларни ениқлишиға зор тосалғу яритидиған болди, әдилийә органлири үстидин елип берилидиған назарәт қилиш хизмитиму коп тосалғуларға дуч келидиған болди" дәп билдүрмәктә.

Канададики уйғур зиялийси муһәммәт тохти әпәнди хитай һөкүмитиниң сот мәһкимисидә ишләйдиған сотчи вә хизмәтчиләрниң һәрқандақ мухбирниң зияритини қобул қилмаслиқи һәққидә бекиткән йеңи бәлгилимиси тоғрисида тохтулуп, өз көз қарашлирини оттуриға қойди. (Меһрибан)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт