Xitay hökümiti sot xadimlirini muxbirlarning ziyaritini qobul qilishtin cheklidi

• Muxbirimiz méhribanning bu heqtiki toluq melumati
• Download story audio

Xitay hökümiti chet'el metbu'atlirining xitayda uchur tarqitishini cheklesh heqqide yéngi belgilime élan qilish bilen bir waqitta, sot mehkimiside ishleydighan sotchi we xizmetchilerning herqandaq muxbirning ziyaritini qobul qilishigha bolmaydighanliqi heqqidimu yéngi belgilime chiqardi.

Mezkur belgilimide "dölet mexpiyetliki, soda-sana'et mexpiyetliki we shexsi mexpiyetlikke a'it mezmunlar؛ yash ösmürler bilen munasiwetlik bolghan délolar, sot échilish waqti ashkarilanmighan délolar, sot échish jeryanidiki munaziriler we sot mehkimisige a'it ichki jehettin tarqitilghan höjjetler we shundaqla munasiwetlik orunlarning testiqidin ötmigen türlük jinayi ishlar délosigha a'it san sifirlar qatarliqlarning hemmisini mexpiy tutup, hergizmu metbu'at we xelq ammisigha ashkarilimasliq kérek " dep körsitilgen.

Seyshenbe küni béyjingda, xitay aliy sot mehkimisining bashliqi shyaw yang bundin kéyin xitaydiki aliy sot, ottura sot we yerlik sot orunlirida, axbarat bayanatchi we axbarat élan qilish tüzümi békitilishi kéreklikini otturigha qoydi. U sözide yene, " sotchilar özining her bir söz, herikitige intayin diqqet qilish kérek, yuqirining testiqisiz, hergizmu öz aldigha pikir bayan qilip, muxbirlarning ziyaritini qobul qilmasliqi kérek. Metbu'at xadimlirini qobul qilish yaki qilmasliq mesiliside, choqum aldi bilen axbarat -teshwiqat orunlirining bir tutash bashqurushigha boysunup, ularning testiqini élishi kérek " dep körsetti.

Béyjingdiki qanun sahaside ishleydighan bir qisim mutexessisler "xitay hökümitining sot xadimlirini muxbirlarning ziyaritini qobul qilishtin chekligenliki metbu'at orunlirining bundin kéyin sot mehkimiside yüz bériwatqan bir qisim ashkarilashqa tégishlik bolghan ishlarni éniqlishigha zor tosalghu yaritidighan boldi, ediliye organliri üstidin élip bérilidighan nazaret qilish xizmitimu kop tosalghulargha duch kélidighan boldi" dep bildürmekte.

Kanadadiki Uyghur ziyaliysi muhemmet toxti ependi xitay hökümitining sot mehkimiside ishleydighan sotchi we xizmetchilerning herqandaq muxbirning ziyaritini qobul qilmasliqi heqqide békitken yéngi belgilimisi toghrisida toxtulup, öz köz qarashlirini otturigha qoydi. (Méhriban)