8-مارت خانىم قىزلار بايرىمى مۇناسىۋىتى بىلەن تۈرك دۇنياسى ئاياللار دوستلۇق ۋە ھەمكارلىق جەمئىيىتى، تۈركىيە ۋە قازاقىستاننىڭ ئورتاق ئۇنىۋېرسىتېتى بولغان ئەخمەت يەسەۋى ئۇنىۋېرسىتېتى قاتارلىق ئورۇنلارنىڭ بىرلىشىپ ئۇيۇشتۇرۇشى بىلەن تۈرك دۇنياسى ئاياللار كېچىلىكى ئۆتكۈزۈلدى.
بۇ كېچىلىككە ئازەربايجان، تۈركمەنىستان، ئۆزبېكىستان، قىرغىزىستان، قازاقىستان، تۈركىيە قاتارلىق دۆلەتلەردىن كەلگەن ۋەكىللەردىن باشقا تاتار، ئۇيغۇر، ئىراق تۈركمەنلىرى، ئىران ئازەرىلىرى قاتارلىق تۈركىي خەلقلەرمۇ كېچىلىكتە ئايرىم - ئايرىم بۆلمىلەر ئېچىپ ئۆزلىرىنىڭ مەدەنىيىتىنى، يېمەك-ئىچمەكلىرىنى ۋە ئۆرپ - ئادەتلىرىنى تونۇتتى.
كېچىلىكتىكى ئۇيغۇر بۆلمىسىدە ئۇيغۇرلارنىڭ مىللى كېيىم-كېچەكلىرى، چالغۇ-ئەسۋابلىرى، ئۇيغۇرلار تونۇشتۇرۇلغان كىتاپ ژورناللار قويۇلدى. ئۇيغۇرلارنىڭ يېمەك-ئىچمەكلىرىدىن سامسا ۋە پولو مېھمانلارغا سۇنۇلغان بولۇپ، يىغىن ئىشتىراكچىلىرى ئۇيغۇر تاماقلىرىنى ئىشتىياق بىلەن يېدى.
بۇ ھەقتىكى مەلۇماتلارنى، تۈركىيىدىكى ئىختىيارى مۇخبىرىمىز ئەركىن تارىمدىن ئاڭلاڭ.