Айропилан вәқәси гумандариниң исми: гүзәлнур турди


2008.03.27

XitayAryupilani-200.jpg
Үрүмчи айродромидин бейҗиңға қарап йолға чиққан, җәнуб авиатсийә ширкитигә тәвә, CZ6901 номурлуқ айропилан билән охшаш түрдики айрупилан. AFP Photo

Хитай җамаәт хәвпсизлик министирлиқи бүгүн йәни 27 ‏ - март күни ахбарат елан қилип, 7 ‏ - март күни айропилан қазаси пәйда қилишқа урунди дәп қолға елинған 3 гумандарниң бириниң исмини ашкарилиди. Баянатта билдүрүлүшичә, гумандар 19 яшлиқ қиз, уйғур, исми гүзәлнур турди. Баянатта гүзәлнур турдиниң 7 ‏ - март күни, үрүмчи айродромидин бейҗиңға қарап йолға чиққан, җәнуб авиатсийә ширкитигә аит, CZ6901 номурлуқ айропиланни қазаға учритишқа урунғанлиқи тәкрар билдүрүлгән.

Куча сақчиси:‏ 19 яшлиқ гулнар турсунниң әһвалини билмәкчимусиз ?

19 яшлиқ уйғур қизи гүзәлнур турдиниң, айропиланға бензин қачиланған ичимлик қутиси билән чиққанлиқи,бир бензин қутисини айропиланниң қол ююш өйигә әкирип қоюп иккинчи қутини әкириш үчүн һәрикәт қиливатқанда йәни бензинға от йеқишниң алдида, айропилан хизмәтчилири тәрипидин байқилип чоң қазаниң алди елинғанлиқи йәнә бир қетим әскәртилгән. Түнүгүн хитай ахбарати мәзкур қазаниң алдини алди дәп қариған җәнуби авиатсийә ширкитиниң хадимлириға 67 миң доллар йәни 470 миң сом мукапат берилгәнликини хәвәр қилған иди. Бүгүн хитай ташқи ишлар баянатчиси чин гаңму чәтәл мухбирлириниң бу һәқтики соаллириға җаваб берип, вәқәниң давамлиқ түрдә чоңқурлап ениқлиниватқанлиқини, қалған мәлуматларниң бундин кейин берилидиғанлиқини билдүргән.

Вәқә һәққидики өткән һәптидики хәвәрләрдә, вәқә гумандари болған 19 яшлиқ уйғур қизниң юртиниң куча икәнлики билдүрүлгән иди. Биз бу мунасивәт билән, бүгүн куча наһийилик җамаәт хәвпсизлик идарисиға телефон қилдуқ вә қарши тәрәпкә, җамаәт хәвпсизлик министирлиқиниң ахбаратини хатирлитип, бу қиз һәққидә немиләрни билидиғанлиқини соридуқ. Қарши тәрәп дело архипиға қарап чиққандин кейин, 19 яшлиқ гулнар турсунниң әһвалини билмәкчимусиз дәп сориди вә азрақ вақиттин кейин мәлумат беридиғанлиқини билдүрди.

Қарши тәрәп архипиға қарап билдүргән исим билән җ х министирлиқиниң билдүргән исми пәрқлиқ. Биз азрақ вақиттин кейин қайта телефон қилғинимизда, улар вәқә һәққидә мәлумат бериштин ваз кәчти вә идарә рәһбәрлики билән көрүшүшимизни билдүрди. Сақчи идарисиниң йәнә бир мәсул хадими билән көрүшкинимиздә, бизни кучаға берип нәқ мәйдандин әһвал игиләшкә чақирди. Улар арқидинла, вәқә һәққидики учурларни ахбаратта елан қилип болғанлиқини, буниңдин тәпсилий учур беришкә өзиниң һоқуқи йәтмәйдиғанлиқини билдүрди.

Биз униңдин: " ундақта, куча җамаәт хәвпсизлик идариси вәқәдин хәвәрсиз дәп хәвәр қилсақ боламду " дәп сориғинимизда, у буниңға қетилмиди вә юқири дәриҗилик рәһбәрлик билән көрүшүшимизни тәвсийә қилди.

Аридин 3 һәптә өтти, мәлумат йәнила толуқ әмәс

Алдинқи хәвәрләрдә, хитай тәрәп вәқә гумандари болған 19 яшлиқ уйғур қизиниң кичик вақтида пакистанға чиқип тәлим алғанлиқини вә айропиланға уларниң пакистан паспорти билән чиққанлиқини билдүргән иди. Шуңа биз, пакистанда илим тәһсил қилған вә яшиған һидайитуллаһ әпәндидин, пакистандики уйғур оқуғучиларниң әһвали һәққидә мәлумат соридуқ: " мән оқуватқанда - 8 йилниң алдида - 300дин артуқ оқуғучи бар иди, қизларниң сани бәк аз иди. Гүзәлнур дегән исимлик бирини аңлап бақмиған идим" . Пакистанда оқуған бир ханим вәқә һәққидә мундақ деди: " мән оқуған чағда 8 қиз бар идуқ, һәммимиз университетта оқуйтуқ. Ундақ бир қизниң исмини аңлимиған идим."

Биз бүгүн йәнә куча наһийилик хәлқ һөкүмитиниң нөвәтчи бөлүмигә телефон қилдуқ. Нөвәтчи хадим, шундақ бир вәқәдин хәвәр тапқанлиқини, вәқә садир қилғучиниң исмини билмәйдиғанлиқини, қизни кучадин дәп аңлиғанлиқини билдүрди."

7 ‏ - Март айропилан вәқәси аридин 3 һәптә вақит өткинигә қаримай, толуқ ениқлиқ қазанғини йоқ. Бәзи көзәткүчиләр, хитайниң уйғурлар үстидики бастурушлирини ақлаш үчүн мәзкур хәвәр яки вәқәни ясап чиққан болуши мумкинликини билдүрсә, йәнә бәзи көзәткүчиләр, хитайниң һәддидин ташқири зулумиға тақәт қилалмиған бир қисим кишиләрниң дуняниң диққитини шәрқи түркистан мәсилисигә тартиш үчүн мундақ бир вәқәни туғдуруп қелиш еһтималиниму пәрәз қилмақта. (Шөһрәт һошур)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.