Ayropilan weqesi gumandarining ismi: güzelnur turdi
2008.03.27

Xitay jama'et xewpsizlik ministirliqi bügün yeni 27 - mart küni axbarat élan qilip, 7 - mart küni ayropilan qazasi peyda qilishqa urundi dep qolgha élin'ghan 3 gumandarning birining ismini ashkarilidi. Bayanatta bildürülüshiche, gumandar 19 yashliq qiz, Uyghur, ismi güzelnur turdi. Bayanatta güzelnur turdining 7 - mart küni, ürümchi ayrodromidin béyjinggha qarap yolgha chiqqan, jenub awi'atsiye shirkitige a'it, CZ6901 nomurluq ayropilanni qazagha uchritishqa urun'ghanliqi tekrar bildürülgen.
Kucha saqchisi: 19 yashliq gulnar tursunning ehwalini bilmekchimusiz ?
19 Yashliq Uyghur qizi güzelnur turdining, ayropilan'gha bénzin qachilan'ghan ichimlik qutisi bilen chiqqanliqi,bir bénzin qutisini ayropilanning qol yuyush öyige ekirip qoyup ikkinchi qutini ekirish üchün heriket qiliwatqanda yeni bénzin'gha ot yéqishning aldida, ayropilan xizmetchiliri teripidin bayqilip chong qazaning aldi élin'ghanliqi yene bir qétim eskertilgen. Tünügün xitay axbarati mezkur qazaning aldini aldi dep qarighan jenubi awi'atsiye shirkitining xadimlirigha 67 ming dollar yeni 470 ming som mukapat bérilgenlikini xewer qilghan idi. Bügün xitay tashqi ishlar bayanatchisi chin gangmu chet'el muxbirlirining bu heqtiki so'allirigha jawab bérip, weqening dawamliq türde chongqurlap éniqliniwatqanliqini, qalghan melumatlarning bundin kéyin bérilidighanliqini bildürgen.
Weqe heqqidiki ötken heptidiki xewerlerde, weqe gumandari bolghan 19 yashliq Uyghur qizning yurtining kucha ikenliki bildürülgen idi. Biz bu munasiwet bilen, bügün kucha nahiyilik jama'et xewpsizlik idarisigha téléfon qilduq we qarshi terepke, jama'et xewpsizlik ministirliqining axbaratini xatirlitip, bu qiz heqqide némilerni bilidighanliqini soriduq. Qarshi terep délo arxipigha qarap chiqqandin kéyin, 19 yashliq gulnar tursunning ehwalini bilmekchimusiz dep soridi we azraq waqittin kéyin melumat béridighanliqini bildürdi.
Qarshi terep arxipigha qarap bildürgen isim bilen j x ministirliqining bildürgen ismi perqliq. Biz azraq waqittin kéyin qayta téléfon qilghinimizda, ular weqe heqqide melumat bérishtin waz kechti we idare rehberliki bilen körüshüshimizni bildürdi. Saqchi idarisining yene bir mes'ul xadimi bilen körüshkinimizde, bizni kuchagha bérip neq meydandin ehwal igileshke chaqirdi. Ular arqidinla, weqe heqqidiki uchurlarni axbaratta élan qilip bolghanliqini, buningdin tepsiliy uchur bérishke özining hoquqi yetmeydighanliqini bildürdi.
Biz uningdin: " undaqta, kucha jama'et xewpsizlik idarisi weqedin xewersiz dep xewer qilsaq bolamdu " dep sorighinimizda, u buninggha qétilmidi we yuqiri derijilik rehberlik bilen körüshüshimizni tewsiye qildi.
Aridin 3 hepte ötti, melumat yenila toluq emes
Aldinqi xewerlerde, xitay terep weqe gumandari bolghan 19 yashliq Uyghur qizining kichik waqtida pakistan'gha chiqip telim alghanliqini we ayropilan'gha ularning pakistan pasporti bilen chiqqanliqini bildürgen idi. Shunga biz, pakistanda ilim tehsil qilghan we yashighan hidayitullah ependidin, pakistandiki Uyghur oqughuchilarning ehwali heqqide melumat soriduq: " men oquwatqanda - 8 yilning aldida - 300din artuq oqughuchi bar idi, qizlarning sani bek az idi. Güzelnur dégen isimlik birini anglap baqmighan idim" . Pakistanda oqughan bir xanim weqe heqqide mundaq dédi: " men oqughan chaghda 8 qiz bar iduq, hemmimiz uniwérsitétta oquytuq. Undaq bir qizning ismini anglimighan idim."
Biz bügün yene kucha nahiyilik xelq hökümitining nöwetchi bölümige téléfon qilduq. Nöwetchi xadim, shundaq bir weqedin xewer tapqanliqini, weqe sadir qilghuchining ismini bilmeydighanliqini, qizni kuchadin dep anglighanliqini bildürdi."
7 - Mart ayropilan weqesi aridin 3 hepte waqit ötkinige qarimay, toluq éniqliq qazan'ghini yoq. Bezi közetküchiler, xitayning Uyghurlar üstidiki basturushlirini aqlash üchün mezkur xewer yaki weqeni yasap chiqqan bolushi mumkinlikini bildürse, yene bezi közetküchiler, xitayning heddidin tashqiri zulumigha taqet qilalmighan bir qisim kishilerning dunyaning diqqitini sherqi türkistan mesilisige tartish üchün mundaq bir weqeni tughdurup qélish éhtimalinimu perez qilmaqta. (Shöhret hoshur)
Munasiwetlik maqalilar
- Amérika alimi shon robérts xitayning Uyghurlargha térrorluq jinayiti artishigha qoshulmaydu
- Xitay saqchi da'iriliri Uyghur qizning meqsiti ayropilanni partlitish, dep élan qildi
- Gérmaniye axbaratlirida Uyghur milliy herikiti (1)
- Xitayning térrorluq hujum heqqidiki bayanati Uyghurlar toghrisidiki yéngi mulahizilerge yol achti
- Xitay tashqi ishlar bayanatchisi: "rabiye Uyghurlarning wekili emes, térrorchilarning wekili"
- Xelq'ara metbu'atlarda ayropilan weqesi'i munazire qilinmaqta
- Birleshken döletler teshkilati kambodzhada qurghan pewqul'adde sot mehkimisi qizil kéxmir rehberlirini sotlashqa bashlidi