Shenshidiki qara xumdandin bir Uyghur bala ishchi tépildi


2007-06-14
Share

Yéqinda xitay saqchiliri shenshi ölkisining yünching we jinching wadisidiki qara xumdanliqtin qullar emgikige séliniwatqan 217 neper kishini qutquzup chiqqanliqini we bularning ichide 29 neper bala ishchi barliqini jakarlidi. Xitay tor betliride élan qilin'ghan tizimlikke qarighanda bu 217 neper kishining ichide az dégende bir neper Uyghur bala bar iken. Insan tebi'iti kötergüsiz derijide xorlan'ghan qara xumdanliqtiki qullar emgikige sélin'ghan bu Uyghur zadi kim ? epsuski, pütün dunyani zil- zilge salghan bu xewerdin Uyghur aptonom rayonidiki sergerdan balilarni qutquzush merkizi bolsa xewersiz.

Adilning shenshidiki xumdanda nime ishi bar idi

Xitayning xénen ölkilik jama'et xewpsizlik nazariti peyshenbe küni shenshidiki qara xumdanliqtin qutquzup chiqqan 217 neper ademning 29 nepiri ösmür balilar ikenlikini jakarlighanda, kishiler buning ichide az dégende bir neper Uyghur yashning bar ikenlikini oylap baqmighan bolsa kérek. Shu jaydiki hökümet da'irilirining xitay tor betliride tarqatqan qarar xumdan weqesidin qutquzuwélin'ghanlar tizimlikide, adil isimlik 20 yashlardiki bir Uyghur yashning barliqini, lékin uning bilen sözlishish mumkinchiliki bolmighanliqini élan qildi.

Bu Uyghur yash zadi kim ? adilning ata - anisi qeyerde ? u shenshi töpilikidiki is- tütek we topa - chang basqan, éghir emgek shundaqla ten jazasi hem insanning izzet -hörmiti kötergüsiz haqaretler astida emgekke sélinidighan bu xumdan'gha qandaq kélip qaldi ? bu yerde qachandin béri qullar emgikige séliniwatatti ? hökümet néme üchün buni hazirgha qeder bayqiyalmidi ? bu mesililer hazirche biz we keng radi'o anglighuchilirimizgha yenila bir sir.

Xumdan weqesi depsendichilikning tipik misali

Amérikidiki analizchi lyu shawju ependi, bu weqe xitayda emgekchiler hoquqi qaysi derijide depsende qiliniwatqanliqining tipik misali, dep körsetmekte. U, " bu weqe junggoda emgekchiler hoquqi qaysi derijide depsende qiliniwatqanliqining tipik misali. Ikkinchidin, bu weqe junggoning erkinlikke, axbaratni qoyuwétishke qanchilik muhtaj ikenlikini körsetti. Chünki bu weqeni tordashlar intérnétte pash qilghandin kéyin, jem'iyette jama'et pikiri qozghap, hökümetni tedbir qollinishqa mejburlidi. Shunga intérnét erkinliki hazirqi mewjüt séstimini bösüp ötüp puqralar bilen pütünlishishtiki purset,"deydu.

Xitay metbu'atlirining xewerliride saqchilar adilning zuwanini uqalmighanliqini yazmaqta. Emma u, xitaychini bilmigenliki tüpeyli gherizini uqturalmidimu yaki eqli hushining jayida emesliki üchün gherizini bildürelmidimu ? dégen mesile aydinglashmidi. Kishini hemmidin bek epsuslanduridighini, xitayning memliket ichi we sirtida zor ghula - ghula qozghighan bu weqedin, Uyghur aptonom rayoni sergerdan balilarni qutquzush merkizi xewersiz. Bu merkezning ismini ashkarilashni xalimaydighan bir nöwetchi xadimi, " bizning bu ishlardin xewirimiz yoq. Men bu ishlarni bilmeymen," dep körsetti.

Hökümet nime qilish kérek ?

Shenshidiki qara xumdanliqlarda balilar we kishilerni qullar emgikige sélish weqesini sürüshtürüsh yéqinda xénenlik 400 neper ata - anining " balilar shenshidiki xumdanliqlargha sétiliwatidu‏ - 400 neper ata - anining qan zari" dégen chaqiriqni élan qilishi bilen bashlandi.

Xénenlik ata - anilar chaqiriqnamida adem bidiklirining perzentlirini jéngjuda shenshidiki qara xumdan igilirige 500 yüendin satqanliqini, balilarning shenshidiki tagh arisigha jaylashqan xilwet xumdanliqlarda éghir emgekke sélin'ghanliqini pash qilghan.

Uyghur aptonom rayoni xelq ishlar nazaritining ismini ashkarilashni xalimaydighan bir xadimi, xitay hökümiti adem etkeschilikige qarshi zerbe bérish nuqtisini kücheytish kérek, dep qaraydighanliqini bildürdi. U, " hökümet bundaq ishlargha zerbe bérish derijisini kücheytishi kérek. Esli bundaq ishlarni böshükide ujuqturuwétish kérek idi. Eng muhimi mesilisini hel qilish " deydu.

Saqchilar balilarni qutquzmastin ata-anilarni tosighan

Qara xumdan weqesini öz közi bilen körgüchilerning ashkarilishiche, bu yerdiki balilar éghir xorluqqa uchrapla qalmay, yene da'im ach qoyulghan we künige 14 sa'ettin köp ishleshke mejburlan'ghan we bashqurghuchilar teripidin urup yarilandurulghan , bezi balilar jan üzmey turupla tirik kömüwétilidighan ehwallar yüz bergen.

Qara xumdan weqesi dunyagha ashkarilan'ghandin kéyin, bu mesile kishilerde xitay hökümiti néme üchün hazirgha qeder bu weqeni bilelmidi ? dégen so'alni tughdurmaqta. Xénenlik 400 neper ata - anining intérnéttiki chaqiriqnamisida, beziler ata ‏- anilar perzentlirini qutquzush meqsitide shenshige barsa, saqchilar bu kishilerning balilarni qutquzushigha ruxset qilmighanliqini we bala ishchilarni sétish sodisida saqchilarning qoli barliqini ilgiri sürgen.

Uyghur aptonom rayoni xelq ishlar nazaritidiki yuquriqi xadim, "bezi ishlarni biz puqralar bilip kétishimiz tes. Saqchilar qoshunida bezi munapiqlarning bolushi pütünley mumkin. Bu türdiki saqchilar junggoda adem bidiklirige alaqidarla emes, bashqa sahelerdimu qanunsiz unsurlar bilen til biriktüridighan saqchilar bar "deydu.

Xumdanlarda téximu köp bala ishchilar bolushi mümkin

Xitay metbu'atlirining xewerlirige qarighanda, shenshidiki qara xumdanliqlarda qullar emgikige séliniwatqan bala ishchilar az dégende 1000 gha yétishi mumkin.

Shenshidiki qara xumdan weqesi buningdin 2 kün burun amérika tashqi ishlar ministirliqi adem etkeschilik sodisi heqqide doklat élan qilip, xitayni adem etkeschilik sodisining ötkili, axirqi békiti we menbesi, dep tenqid qilghandin kéyin yüz berdi. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet