Balilar üchün eng xoshalliq bir kün


2007-05-31
Share

"1- Iyun" balilar üchün eng xoshalliq bir kün. Chünki bu kün kelgüsining igiliri, balilargha atalghan bir kün. Bu kün ularning bayrimi. Uyghur diyarida bu künni teshnaliq bilen kütmeydighan birmu bala bolmisa kérek? balilar bayramni qandaq ötküzüsh heqqide xéli burunla her xil xam xiyallarda bolsimu, emma balilargha atalghan mushu bir künmu, köp hallarda ata -anilarning yaki chonglarning hetta mektep,hökümet orunlirining orunlashturushi bilen ötidu. Ata ‏- anilargha meslihetimiz,héch bolmighanda mushu bir kün balilargha te'elluq bolsun. Ularning köngül sözlirige qulaq salayli...

Biz balilarning, bayrimining özlirining arzusidikidek ötüshini tilesh bilen teng, töwendiki bayramliq sowghimiz arqiliq pütün Uyghur balilirigha güzel kelgüsining yar bolushini ümid qilimiz.

Balilar üchün yilda bir qétim kélidighan kün

1- Iyun balilar bayrimi küni, balilar üchün éytqanda yilda bir qétim kélidighan bu kün eng ehmiyetlik, xoshal ötküzüshke tégishlik bir kün. Bezi balilar üchün éytqanda hetta tughulghan künidinmu muhim bir kün.

Shunga ular bu künning heqiqiy xojayini bolushni oylaydu. Chünki bu kün ulargha mensup. Erkin asiya radi'osidiki barliq xizmetchiler dunyaning her qaysi jayliridiki Uyghur balilirigha bayramliq qizghin salam yollaymiz. Shundaqla radi'odiki barliq xizmetchilerning köngül sözi shuki " söyümlük balilar silerning külkenglar bizning shadliqimiz."

Pütün dunyada balilarni qoghdash, balilarning hoquq menpe'etlirige hörmet qilish, ularning saghlam ösüp yétilishige ehmiyet bérishning her qandaq dölet, millet hem insanning mejburiyiti ikenliki hemmidin köp tekitliniwatqan bugünki künde, gerche Uyghur élidimu teshwiqatta "balilar bizning kelgüsimiz, balilar hemmidin muhim... " Dégendek sho'arlar tekitlensimu balilargha emeliy köngül bölüsh yenila yétersiz.

Balilar özlirige mensup bolghan bayram künidimu, yenila chonglar yaki hökümet we mektep orunliri teripidin balilarning xushalliqi üchün emes belki siyasiy teshwiqat muddi'asi bilen orunlashturulghan tebriklesh yighini, bayramliq sen'et kéchiliki, we her xil musabiqe pa'aliyetliri arqiliq balilargha bésim hem tozaqlar qurmaqta.

Uyghur élide balilar bayrimining mezmuni, " wetenni söyüsh, partiyini söyüsh, sotsiyalizmni söyüsh" terbiyisini asas qilidu

Biz Uyghur élining türlük axbarat hemde hökümet teshwiqat wastilirining 1 - iyun balilar bayrimigha munasiwetlik uchurlirigha diqqet qilip qaraydighan bolsaq. Uyghur balilirining bu bayramni ilgirikidinmu jiddiy bir xil sün'iy pa'aliyetler iskenjiside ötküzüwatqanliqini köreleymiz.

Uyghur aptonom rayonluq ayallar birleshmisi, Uyghur aptonom rayonluq partkom teshwiqat bölümi, ma'arip nazariti qatarliq orunlar bir nechche ay ilgiri, bu yil balilar bayrimida qandaq yétekchi idiye bilen Uyghur élide pa'aliyetler élip bérilishi kérekliki heqqide her qaysi ma'arip hemde teshwiqat orunlirigha uqturush chüshürüp,mektep hemde bashqa kolléktiplargha ötküzülidighan balilar bayrimi pa'aliyetlirining üchni söyüsh yeni" wetenni söyüsh, partiyini söyüsh, sotsiyalizmni söyüsh " terbiyisini asas qilish yolyoruqini bergen idi.

Shuninggha bina'en Uyghur élide ürümchidiki bashlan'ghuch we toluqsiz ottura mekteplerdin bashlap her qaysi wilayet, sheher, nahiye, yézilardiki mekteplerdimu balilar bayrimida " üchni söyüsh " notuq sözlesh musabiqisi, " üchni söyüsh " sen'et musabiqiliri ötküzülgen. Balilar bolsa mushu musabiqilerge qatniship hemde tallinish üchün bir qanche ay burunla jiddiy teyyarliq körüshke bashlighan. Shinjang radi'o istansisining 31 - maydiki xewiride körsitilishiche, ürümchide ötküzülgen 3000 bala qatnashqan xelq'ara balilar bayrimi qosh tilliq notuq sözlesh pa'aliyetliride xitay bolmighan ottura ‏- bashlan'ghuch mektep balilirighimu xitay tilida notuq sözlesh telipi qoyulghan.

Shinxu'a torining 31 - may bergen xewiride körsitilishiche, Uyghur aptonom rayonining re'isi bolghan isma'il tiliwaldi, ürümchidiki qosh tilliq balilar baghchisida ötküzülgen balilar bayrimi pa'aliyitini közdin kechürüsh jeryanidimu balilargha siyasiy idiyiwi terbiye bérishni untumighan bolup, u bir yesli balilirigha " yaxshi öginip, siyasiy sapaliq insan bolup, kelgüside sotsiyalizm qurghuchi yaramliq iz basar bolunglar "dégen. Terbiyichilerge bolsa " ösmür‏- balilarda kichikidin bashlap junggoni, kommunistik partiyini sotsiyalizmni söyüsh idiyisini yétildürüsh kérek. Ularni kelgüside junggogha jawab qayturalaydighan ewlad qilip terbiyilesh kérek"dep tekitligen.

Balilar bayrimi munasiwiti bilen radi'omizning waqtidin paydilinip, ata ‏- ana bolghuchi yaki bowa ‏- moma bolghuchi we yaki terbiyichi ixlasmenlirimizge balilarning bayrimini özlirining arzusi buyiche ötküzüshke yol qoyushni, pendi ‏- nesihet, terbiye yaki siler ehmiyetlik dep qarighan sün'iy pa'aliyetlerge mejburlashtin xali halda, xoshal ötküzüshke shara'it yaritip bérishini semimiy ümid qilimiz. Balilarning köngül tiwi'ishige qulaq sélinglar.

Töwende, melum tor bette namsiz bir sha'ir élan qilghan " balilarning wetini " namliq shé'irni silerge sunduq. Bu misralar balilarning heqiqiy shadliqining néme ikenliki heqqide sizni oylargha chömdürse ejep emes. (Gülchéhre)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet