Balilar oyunchuqi shirkiti - mattél, xitayda ishlen'gen bir milyondin artuq oyunchuqni yighiwélish uqturushi chiqardi

• Muxbirimiz jümening bu heqtiki toluq melumati
• Download story audio

Bash shtabi nyu-yorkqa jaylashqan balilar oyunchuqi shirkiti: mattél, bixeterlik mesilisi tüpeyli xitayda ishlen'gen bir yérim milyon danige yéqin balilar oyunchuqlirini yighiwélish uqturushi chiqardi. Melum bolushiche, xitayda ishlen'gen mezkur oyunchuqlargha ishlitilgen sirda, ademge ziyanliq köp miqdarda qoghushun terkibi bayqalghan.

"Xitayda ishlen'gen" dégen xet agahlandurush belgisi bolup qaldi

Xitayda ishlen'gen sana'et we yémek- ichmek buyumlirida bixeterlik mesilisi köplep körülüshke bashlighandin kiyin, dunya miqyasida, "xitayda ishlen'gen" dégen xetning özila bir xil agahlandurush belgisi bolup qélishqa bashlidi.

Mushu yili baharda, amérikida ermek haywanlarning xitayda ishlen'gen haywanat yémeklikini yep zeherlinip ölüp kétish hadisisi körülgendin bashlap amérikida xitayda ishlen'gen mehsulatlargha qarita bir xil agah bolush tuyghusi shekillen'gen we amérika dora- dermek we yimek-ichmek bashqurush idarisi uqturush chiqirip, nurghun haywanat yémeklirini yighiwalghan idi.

2- Awghust peyshenbe küni dunyadiki eng chom oyunchuq shirkiti mattél, özi bazargha salghan, emma xitayda ishlen'gen oyunchuqlarda bixeterlik mesilisi sadir bolghanliqi seweblik pütün dunya miqyasida keng kölemlik yéghiwélish uqturushi chiqirip axbarat élan qildi.

Melum bolushiche, bu nöwet mattél shirkiti yighiwalmaqchi bolghan oyunchuqlarning sani bir yérim milyon etrapida bolup, mezkur oyunchuqlargha ishlitilgen sirning terkibide ademge ziyanliq qoghushun maddisi bayqalghan.

Hazir wirginiye shitatida xizmet qiliwatqan doxtur forteyjining bildürüshiche, qoghushun bir xil éghir meden madda bolup u ademning, bolupmu kichik balilarning nérwa tügünlirige zexmet yetküzüp, balilarda malixulya késellikini peyda qilidiken hemde, chonglarda qan we ménge binormal haletlirini shekillendüridiken , qoghushun bilen yaki uningdin hasil bolghan shulta bilen uzun muddet uchrashqanda börek késili we bashqa ichki eza késellirini keltürüp chiqiridiken.

Mattél shirkitining aptomatik téléfon uchurigha qarighanda, yighiwélish uqturushi chiqirilghan oyunchuqlar 2007- yili 5- ayning 1-künidin 8- ayning 1 ‏- künigiche pütün amérika miqyasida sétilghan mallarni öz ichige alidiken.

100 Minggha yéqin oyunchuq en'gliyide sétilghan

Mattél shirkiti ijra'iye re'isi robért ékér, xéridarlardin kechürüm soraydighanliqini bildürüp: "biz bu yighiwélish uqturushi chiqirilghan oyunchuqlarning tesirige uchrighan her bir xéridardin kechürüm soraymiz " dédi we xéridarlar bilen shirket arisida yétildürülgen ishenchni saqlap qélish üchün, hazir yüz bergen mesililerni tüzitip mesililerni tekshürüp bir terep qilidighanliqini ipadilidi.

Uningdin bashqa, mattél shirkitining hemshire shirkiti: féshir prays shirkitimu yawropagha satqan 83 xil mehsulatini yighiwélish uqturushi chiqarghan bolup, b b s ning bu heqtiki melumatigha qarighanda 100 minggha yéqin bu xildiki oyunchuq en'gliyide sétilghan iken.

Bu nöwet yighiwélish uqturushi chiqirilghan oyunchuqlar ichide, teyyarliq sinip oyunchuqliri, amérika we bashqa gherb elliridiki kichik balilar arisida qizghin qarshi élinidighan, altun chach qiz barbiy, ékspéditsiyichi dora, künjüt ( sim-sim) kochisi programmisidiki obrazlardin, chong qush, élmo qatarliqlar bar.

Mattél shirkiti xadimliri, xitayda ishlen'gen bu oyunchuqlarda hazirche zeherlen'gen yaki zeximlen'gen ehwallar körülmigen bolsimu, ular ata-anilarni bu oyunchuqlarni ishletmeslikke dewet qilghan.

Melum bolushiche, hazir amérika bazarliridin yighiwélinish élani chiqirilghan 1 milyon'gha yéqin mehsulatning 30 pirsenti dukanlargha sélin'ghan.

Xitay mehsulatlirining 99 pirsenti bixeterlik ölchimige toshidighanliqini bildürdi

Iqtisad waqti gézitide 2- awghust bérilgen xewerde, xitay merkizi süpet tekshürüsh idarisining xadimi wey chu'angjungning éytqanlirini neqil keltürüshiche , u, mehsulatlarning süpitini östürüshte, bashqa döletler bilen hemkarliship xizmet élip baridighanliqini bildürgen.

2- Awghust, xitayning munasiwetlik tarmaqliri chet'ellerge éksport qilghan xitay mehsulatlirining 99 pirsenti bixeterlik ölchimige toshidighanliqini we xitay mehsulatlirining bixeterlikini téximu östürüsh üchün amérika terep bilen yéqindin hemkarliship ishleydighanliqini bildürgen bolsimu, emma, iqtisad gézitining shangxeyde turushluq muxbiri jef da'irning bazar ammiwi radi'osigha shangxeydin bergen melumatigha qarighanda, xitay da'iriliri mattél shirkiti élan qilghan bu yighiwélish uqturushigha nisbeten téxi konkrétni inkas qayturmighan.

Aldinqi ayda béyjing da'iriliri, gherb metbu'atliri xitay mallirida saqlan'ghan mesililerni mubalighe qiliwetti dep, gherb metbu'atlirini eyibligen we bu ayning béshida, özlirining éksport mehsulatlirining süpitini östürüsh jehette heriket qolliniwatqanliqini körsetmekchi bolghan hem ikki shirketni taqighan, munasiwetlik xadimlarni qolgha alghan idi. (Jüme)