Хитай һөкүмити, аптоном районниң 50 йиллиқи һарписида уйғур мустәқилчилирини бастурушни күчәйтти


2005-08-26
Share

Хитайниң уйғур елидә елип бериватқан "3 хил күчләргә зәрбә бериш" яки "қаттиқ зәрбә бериш" һәрикәтлири кишиләргә йеңилиқ болмисиму, лекин йеқиндин бери, уйғур аптоном райони қурулғанлиқиниң 50 йиллиқи һарписида уйғур елидики сиясий муқимлиқни сақлаш паалийити техиму чиң тутулуп, или вилайити вә ақсу вилайәтлиридә, хитай һөкүмитиниң "бөлгүнчи", "қанунсиз диний тәшвиқат елип барған" вә " террорчи" дегән әйибләшләр билән уйғурларни тутқун қиливатқанлиқи һәққидики хәвәрләр арқа-арқидин тарқитилишқа башлиди.

Техи пәйшәнбә күнила уйғур аптоном райони рәиси исмайил тиливалдиниң һәмраһлиқида бейҗиңдики ахбарат елан қилиш йиғиниға кәлгән партком секритари ваң лечүән, аптоном райони қурулғанлиқиниң 50 йиллиқи һарписидики зәрбә бериш һәрикитидә, уйғур паалийәтчи абдулла қурбан башчилиғидики бир гуруппини қолға чүшүрүп, абдулла қурбанни нәқ мәйданда етип өлтүргәнликини хәвәр қилди. Әмма бу хәвәр буниң алдида хитайниң һечқандақ мәтбуатлирида елан қилинип бақмиған иди.

Ваңниң билдүрүшичә, абдулла қурбан исимлик бу киши ақсудики, уйғур елиниң мустәқиллиқини тәрғип қилидиған бир тәшкилатниң башлиқи болуп, хитай сақчи даирилири бу тәшкилатқа 4-5 йилниң алдидила көз ташлиған, шундақла хитай сақчилири 2000 - йили 8 - айниң 7 - күни кучада бу тәшкилат турушлуқ җайға бесип кирип, абдулла қурбанни тутушқа урунған болсиму, лекин абдулла сақчилар билән қораллиқ тоқунушуп, җамаәт хәвпсизлик идарисиниң хитай башлиқи чең пинни етип өлтүргән.

Ваң йәнә, абдулла қурбанниң у қетимлиқ тоқунушта қечип қутулғанлиқини, әмма униң башқа һәмраһлириниң сақчилар тәрипидин етип өлтүрүлгәнликини билдүрди. Униң ейтишичә, шундин буян абдулла қурбанни тутуш буйриқи чиқирилған болуп, бу йил 7 - айниң 18 - күни униң техичә ақсуда икәнлики паш болғандин кейин, сақчилар 8 - айниң 22 - күни у турушлуқ җайға бастуруп киргән.

Ваң лечүән сөзидә йәнә, абдулла қурбанниң сақчилар тәрипидин байқалғандин кейин, өз қол астидики икки кишини етип өлтүрүп, андин сақчиларға қарап оқ чиқарғанлиқини, шу сәвәптин сақчиларниң ахири уни етип өлтүргәнликини билдүрди. Шундақла һазир абдулла қурбанниң 10 ға йеқин әгәшкүчилири хитай сақчилири тәрипидин тутуп турулмақта икән.

Биз бу һәқтә мәлумат игиләш үчүн ақсу вилайәтлик җамаәт хәвпсизлик идариси вә һәр қайси наһийилик сақчи идарилири билән алақилаштуқ. Мухбиримиз пәридәниң бу һәқтики тәпсилий мәлуматлирини юқиридики аваз улинишидин аңлаң. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт