Sha'ir batur rozining wapati munasiwiti bilen uning sepdashlirini ziyaret

• Muxbirimiz jümening bu heqtiki toluq melumati
• Download story audio

Sha'ir batur rozi 80 – yillarda aliy mektepte oquwatqan waqitlarda.

Uyghur hazirqi zaman shé'iriyitidiki nopuzluq sha'ir we istidatliq yazghuchi batur rozi 3- ayning 26 ‏-küni alemdin ötti. El söygen wetenperwer sha'ir batur rozi, Uyghur élide qedirlinip ishlitilishke muyesser bolalmay, qisqighine 40 yilliq hayatini azap, namratchiliq, éghir rohiy we siyasiy bésim astida ötküzgen idi.

Sha'ir wapat bolghandin kiyin uning wapatigha atap Uyghur élidiki tor betliride mersiyeler toquldi we Uyghur oqurmenlerning azap- qayghuliri ipadilendi. Batur rozining sawaqdishi we hemsöhbet dosti yash sha'ir exmetjan osman ependi merhum ziyaritimizni qobul qilip, batur rozi heqqide toxtilip, öz qayghusini ipadilidi.

Anglashlargha qarighanda, ürümchi ittipaq yoli aptobus békitide yurek késili tuyuqsiz qozghalghan batur rozi yolda sunaylinip yétip qalghan. Lékin yoluchilar sha'irni bir haraqkesh bolushi mumkin dep soghuq nezer tashliship ötüp kétishken. U bu jayda shu péti yérim sa'et etirapida yatqan. Kéyin yoldin ötup kétiwatqan saxawetlik kishiler qutquzush mashinisi chaqirip uni doxturxanigha élip bérishqan bolsimu, emma sha'ir özi söygen, otida köygen bu makanidin we xelqidin menggülük widalashqan idi. Uning jesidi shuküni yurti yeken'ge yolgha sélin'ghan bolup sha'irning méyiti 28 - chésla uzitilghan.

Bu heqte uning sawaqdishi we jan-jiger dosti yash yazghuchi küresh ataxan ziyaritimizni qobul qilip, özining qarashliri we qayghusini ipadilidi. Küresh ataxan batur rozining wekillik shiridin birini diklamatsiye qilip sözini ayaqlashturdi.

Uning tuyuqsiz wapati Uyghur hazirqi zaman edebiyat sahesi üchün zor yoqitish boldi. U qaza qilip tengritéghining jenub‏- shimalidiki dilkesh dostlirining qelbini tilghighan, sepdash qelemkeshlirining közlirini nemligen bolsa, sadiq oqurmenlirini menggülük azap we séghinishta qaldurup kétp qaldi. (Jüme)