Хитайда намратлар билән байлар оттурисидики пәрқ интайин чоң


2007.08.08

Тәтқиқат нәтиҗилиригә қариғанда, хитайда намратлар билән байлар оттурисидики пәрқ интайин чоң болуп, болупму хитайниң иқтисадий тәрәққиятиниң ешишиға әгишип, хитайниң бу җәһәттә асия дөләтлири буйичә иккинчи орунда туридиғанлиқи мәлум болмақта. Көзәткүчиләр, хитайниң деңиз яқисидики районлар билән уйғур елидә бу пәрқниң техиму еғир икәнликини оттуриға қоюп, уйғур елидә қосиқини тойғузуш имканиға йетәлмәйватқан уйғур деһқанлириниң көп салмақни игиләйдиғанлиқини, буниң әксичә хитайлар арисида шәхси айрупилан сетивилиш әһваллириниң мәйданға кәлгәнликини оттуриға қоймақта.

Пәрқниң көпийиш дәриҗиси, непалдин башқа барлиқ асия дөләтлиридин ешип кәткән

Асия тәрәққият банкисиниң тәтқиқат нәтиҗисидин мәлум болушичә, хитайда намратлар билән байлар оттурисидики пәрқниң көпийиш дәриҗиси, непалдин башқа барлиқ асия дөләтлиридин ешип кәткән.

Иқтисадий тәрәққиятниң ешишиға әгишип, намратлар билән байлар оттурисидики пәрқ чоңийиватқан башқа асия дөләтлири болса һиндистан, сриланка қатарлиқ дөләтләр болуп, асия тәрәққият банкисиниң қаришичә, бу дөләтләр маарип, сақлиқни сақлаш саһәлиригә көпләп мәбләғ селиши вә бу арқилиқ байлар билән намратлар оттурисидики пәрқни азайтиши керәк икән .

Баравәрсизлик зор көләмдики яшларға тәсир йәткүзгән

Гәрчә хитайниң иқтисадий тәрәққияти наһайити тез тәрәққи қиливатқан болсиму, әмма бу намратларниң турмушиниң яхшилинишиға һечқандақ тәсир көрситәлмигән. Пәқәт җәмийәттә байлар турмишидила өзгиришләр мәйданға кәлгән. Асия тәрәққият банкисиниң доклатида көрситилишичә, байлар билән намратлар оттурисидики пәрқ йәнә, кишиләр арисида баравәрсизликни мәйданға кәлтүрүп, бу хил баравәрсизлик зор көләмдики яшларға тәсир йәткүзгән.

Баравәрсизликниң тәсиригә учриған яшлар яшаватқан муһит интайин начар болуп, улар яхши озуқлиниш имканийитигә игә болалмаслиқ , болупму давалиниш вә әқәлли маарип тәрбийиси биләнму тәрбийәлинәлмәсликтәк әһвалларға дуч кәлгән.

Уйғур аһалисиниң намратлиқ әһвали техиму яман

Бу арида уйғур сиясий көзәткүчилири, байлар билән намратлар оттурисидики пәрқниң , уйғурлар билән хитайлар арисида әң гәвдилик нисбәтни игиләйдиғанлиқини билдүрмәктә.

Улар, хитайдики байлар билән уйғур аһалисиниң турмуш сәвийисини селиштурушниң әсла мумкин болмайдиғанлиқини, деңиз яқисидики районларда яшаватқан адәттики пуқралар билән уйғур илидики шәһәр аһалисиниң турмуш сәвйиси оттурисидиму интайин зор пәрқләр бар икәнликини билдүрмәктә. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.