Xitayda namratlar bilen baylar otturisidiki perq intayin chong


2007-08-08
Share

Tetqiqat netijilirige qarighanda, xitayda namratlar bilen baylar otturisidiki perq intayin chong bolup, bolupmu xitayning iqtisadiy tereqqiyatining éshishigha egiship, xitayning bu jehette asiya döletliri buyiche ikkinchi orunda turidighanliqi melum bolmaqta. Közetküchiler, xitayning déngiz yaqisidiki rayonlar bilen Uyghur élide bu perqning téximu éghir ikenlikini otturigha qoyup, Uyghur élide qosiqini toyghuzush imkanigha yételmeywatqan Uyghur déhqanlirining köp salmaqni igileydighanliqini, buning eksiche xitaylar arisida shexsi ayrupilan sétiwilish ehwallirining meydan'gha kelgenlikini otturigha qoymaqta.

Perqning köpiyish derijisi, népaldin bashqa barliq asiya döletliridin éship ketken

Asiya tereqqiyat bankisining tetqiqat netijisidin melum bolushiche, xitayda namratlar bilen baylar otturisidiki perqning köpiyish derijisi, népaldin bashqa barliq asiya döletliridin éship ketken.

Iqtisadiy tereqqiyatning éshishigha egiship, namratlar bilen baylar otturisidiki perq chongiyiwatqan bashqa asiya döletliri bolsa hindistan, srilanka qatarliq döletler bolup, asiya tereqqiyat bankisining qarishiche, bu döletler ma'arip, saqliqni saqlash sahelirige köplep meblegh sélishi we bu arqiliq baylar bilen namratlar otturisidiki perqni azaytishi kérek iken .

Barawersizlik zor kölemdiki yashlargha tesir yetküzgen

Gerche xitayning iqtisadiy tereqqiyati nahayiti téz tereqqi qiliwatqan bolsimu, emma bu namratlarning turmushining yaxshilinishigha héchqandaq tesir körsitelmigen. Peqet jem'iyette baylar turmishidila özgirishler meydan'gha kelgen. Asiya tereqqiyat bankisining doklatida körsitilishiche, baylar bilen namratlar otturisidiki perq yene, kishiler arisida barawersizlikni meydan'gha keltürüp, bu xil barawersizlik zor kölemdiki yashlargha tesir yetküzgen.

Barawersizlikning tesirige uchrighan yashlar yashawatqan muhit intayin nachar bolup, ular yaxshi ozuqlinish imkaniyitige ige bolalmasliq , bolupmu dawalinish we eqelli ma'arip terbiyisi bilenmu terbiyelinelmesliktek ehwallargha duch kelgen.

Uyghur ahalisining namratliq ehwali téximu yaman

Bu arida Uyghur siyasiy közetküchiliri, baylar bilen namratlar otturisidiki perqning , Uyghurlar bilen xitaylar arisida eng gewdilik nisbetni igileydighanliqini bildürmekte.

Ular, xitaydiki baylar bilen Uyghur ahalisining turmush sewiyisini sélishturushning esla mumkin bolmaydighanliqini, déngiz yaqisidiki rayonlarda yashawatqan adettiki puqralar bilen Uyghur ilidiki sheher ahalisining turmush sewyisi otturisidimu intayin zor perqler bar ikenlikini bildürmekte. (Eqide)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet