Xitay hökümiti Uyghur élige da'ir axbaratlarni qamal qilish üchün, idare organlargha bayanatchi tesis qilmaqta

• Muxbirimiz gülchéhrening bu heqtiki melumati
• Download story audio

Béyjingdiki bir gézit botkisi. Xitayning axbarat erkinliki xatirisi xelq'ara jem'iyetning tenqid qilishigha uchrap kelmekte. AFP

Xitay hökümiti yéqindin buyan Uyghur élining her qaysi idare organlirigha mexsus axbarat élan qilish ishxanisi namida mexsus ishxanilarni tesis qilghan bolup, her qaysi derijilik hökümet, memuriy organlarda tesis qilin'ghan bu ishxana xitay we chet'el muxbirlirining munasiwetlik so'allirigha jawab bérish, axbarat élan qilish mes'uliyitini üstige alidiken.

Deslep bu xil axbarat bérish tüzümi her qaysi derijilik memuriy hökümet hem partkom we jama'et xewépsizlik organliridin bashlap yolgha qoyulghan idi. Nöwette Uyghur élide her qaysi derijilik organlarning hemmiside bu xil tüzüm bilen ish tutidighan mexsus ishxanilar qurulghan.

Xitay da'iriliri: axbarat, Uyghur élining muqimliqi bilen zich munasiwetlik

Uyghur élining hökümet tor betlirin melum bolishiche, xitay merkizi hökümitining axbarat bölümi, aptonum rayonluq partkom teshwiqat bashqarmisi qatarliq orunlar axbarat bayanatchilirini terbiyilesh kursi achqan bolup, birinchi nöwette, Uyghur élidiki asasliq nazaret derijilik idare organlardin tesis qilin'ghan 50 neper axbarat bayanatchisi -19 dikabirdin bashlap bu korusta axbarat orunlirigha uchur bérish jehette terbiyilinishke bashlighan.

Ezeldin axbaratlarni qattiq yusunda qamal qilip kelgen xitay hökümiti, bu qétim Uyghur élining idare organlirida mexsus axbarat bayanatchisi békitkenlikini," axbarat baynatchiliqini yolgha qoyghanliqimiz hökümitimizning démokratiyilishishning körünishi, uchur axbarat ishliridiki ilgharliqini, jem'iyetni idare qilishtiki ishenchisini körsitidu" dep ipade bildürmekte.

Uyghur élining axbarat sahesidiki bu özgürüshke mes'ul bolghan, Uyghur aptonum rayonluq partkom teshwiqat komitéti bashliqi li chi " axbarat, Uyghur élining muqimliqi bilen zich munasiwetlik, biz teshwiqat xizmitide axbarat bayanatchiliri arqiliq aktip orunni igilishimiz kérek, bu xizmetni estayidil, mes'uliyet bilen ishlesh kérek, chünki bu xitay hökümitining obrazigha munasiwetlik alahide xizmet" dep tekitligen.

Axbaratni téximu qattiq kontrol qilish

Adette chet'el axbarat organlirining xitayda ixtiyari ziyarette bolishi qattiq cheklen'gen, bolupmu Uyghur rayonida bu xil cheklime yenimu qattiq bolghachqa hetta téléfon arqiliq uchur igileshmu nahayiti mushkül. Jümlidin muxbirlirimiz Uyghur élidin melumat élishta ret qilish, jawab bermeslik, mes'uliyettin qéchishqa hetta soraqqa uchrashqa oxshash mu'amililerge uchrap kelmekte.

Emma meyli qandaqla bolmisun ret qilish, téniwélishqa oxshash jawablarmu axabarat orunliri üchün heqiqiqetni, emilyetni ispatlashta, toghra xewer bérishte paydiliq uchur hésablinidu, emma nöwette Uyghur élide her qaysi idare organlarda birdek axbarat bayanatchisining tesis qilinishi, axbarat orunlirining uchur igileshte biwaste axbarat bergüchilernila ziyaret qilishigha toghra kélidu. Démek uchur igilesh da'irisi yenimu tariyip qélishishitin dérek béridu.

Biz mezkur axbarat bayanatchisi tesis qilish tüzümi heqqide tepsili melumat élish üchün Uyghur aptonum rayonluq partkom teshwiqat bölümige téléfon qilghinimizda ilgirikidinmu qattiq so'al soraqqa uchriduq.

Ilgiri chet'el muxbirliri bilen birge Uyghur élide mexpi ziyarette bolghan kanadada yashawatqan güzel xanim, xitay hökümitining axbarat bayanatchisi békitish tüzümini yürgüzüshi, xitay hökümitining dunyani yalghan xewerler bilen aldishigha asanliq yaritilidu, bu Uyghur élining emeliy ehwalining téximu qattiq mexpi tutilidighanliqining bishariti dégendek endishisini ipadilidi. (Gülchéhre)