Гуаңдуң ишчилири 1 -өктәбирни намайиш билән күтивалди


2005.10.03

Хитай һөкүмити дағдуғилиқ һалда 1 - өктәбир дөләт байримини тәбрикләватқан пәйттә, гуаңдуң ишчилири бу байрамни намайиш өткүзүп күтүвалди. Гәрчә хитай мәтбуатлири бу һәқтә һечқандақ мәлумат бәрмигән болсиму, әмма намайишқа қатнашқан бир нәпәр ишчи бу һәқтә радиомизға мәхсус телефон ечип, бизниң бу намайиштин хәвәрдар болуп қелишимизни һәмдә буни дуняға елан қилишимизни тәләп қилди.

Байрамлиқ совғат

Бу хәвәрни йәткүзгән кишиниң ейтип беришичә, гуаңдуң өлкисидә һәр қайси шәһәр, наһийиләрдин болуп җәмий 50 ток билән тәминләш идариси бар болуп, һазир бу идаридики нурғун ишчи- хизмәтчиләр хизмитидин бошутулуш алдида турмақтикән. Һәр қайси дәриҗилик ток билән тәминләш идарилири, гуаңдуң өлкилик ток билән тәминләш гуруһиға қарашлиқ болуп, бу орун 9 -айниң 27 - күни уқтуруш чүшүрүп, бу системидики һәр қайси идариләрдә хизмәтчиләрни қисқартиш һәрикитини елип баридиғанлиқини елан қилған. Бу хәвәр дәрһалла ишчи- хизмәтчиләрниң наразилиқини қозғиған. Улар 9 - айниң 28 - күнидин башлап өзлири қарашлиқ идариләрниң алдиға йиғилип тинч олтуруп қаршилиқ билдүргән.

Радиомизға хәвәр йәткүзгән исмини ашкарилашни халимиған бу кишиниң ейтип беришичә, юқириниң бу пилани бойичә, бир лйән җяң шәһәрлик ток билән тәминләш идарисиниң өзидила 500 нәпәр ишчи иштин тохтитилидиған болуп, буниңдин ғәзәпләнгән ишчи- хизмәтчиләр өзликидин топлинип һөкүмәтниң бу пиланиға наразилиқ билдүргән. У мундақ дәйду:

"28, 29 вә 30 -чесладин тартип 1 - өктәбиргичә бу намайиш давамлашти. Лекин байрамлиқ дәм елиш вақти бир һәптә давамлишидиған болғачқа, биз 8 - өктәбир күни намайишни йәнә давамлаштурмақчи. Бу намайиш йәнә лей җов шәһиридиму елип берилған. Мениң билидиғиним бу икки йәрдики намайиш, лекин гуаңдуңда бундақ ток билән тәминләш идарисидин 50 и бар. Шуңа мениңчә, у җайлардики ишчи- хизмәтчиләрму чоқум охшаш наразилиқ билдүриду".

Униң ейтишичә, лйән җяң шәһәрлик сақчи идариси бу намайишни көзитиш үчүн нәқ мәйданға бир түркүм сақчиларни орунлаштурған болуп, бу йәрдә сақчилар билән намайишчилар арисида һазирғичә һечқандақ тоқунуш йүз бәрмигән. Лекин лей җов шәһириниң әһвали бир қәдәр еғиррақ болуп, бу йәрдики електир истансисиниң ишчи- хизмәтчилири завут башлиқини бир мәзгил соливалған, кейин сақчилар келип уни қутулдуруп чиққан.

Иштин бошитилидиғини ениқ

Биз лей җов шәһәрлик ток билән тәминләш идарисиға телефон қилдуқ. Әмма бу йәрдә телефонни алидиған адәм чиқмиди. Телефонимиз уланған лйән җяң шәһириниң ток билән тәминләш идарисидики бир хадим бу хәвәрниң растлиқини етирап қилди. У мундақ деди:

"юқиридин бизгә 888 шитатлиқ сан бәрди. Буниңдин ешип кәткәнлири иштин бошитилидиған гәп. Аңлишимчә, уларни имтиһан елиш усули бойичә таллайдикән. Имтиһандин өтәлмигәнләрни иштин тохтитидикән".

Биз униңдин имтиһан мәзмунлириниң немиләрни өз ичигә алидиғанлиқини сориғинимизда, у имтиһанда, кәспий вә сиясий мәзмунларниң һәр иккилиси болуши мумкинликини билдүрди.

Буниңдин сирт гуаңдуң өлкисидә техи 9 - айниң башлиридила, һөкүмәтниң бир қанчә көмүр канларни етиветиши сәвәбидин ишсиз қалған шавгуән районидики 10 миңдин ошуқ кан ишчиси чоң көләмдә намайиш елип барған иди. Хитайда наразилиқ намайишлириниң йүз бериши йилдин-йилға ешиватқан болуп, хитай җамаәт хәвпсизлик министирлиқиниң чиқарған доклатида көрситилишичә, хитайда 10 йилниң алдида бир йилда 10000 қетим намайиш йүз бәргән болса, һазир бу сан тез көпийип, 2003 - йили 58000 қетим, 2004 - йили болса 74000 қетим намайиш йүз бәргән. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.