Gu'angdung ishchiliri 1 -öktebirni namayish bilen kütiwaldi

Xitay hökümiti daghdughiliq halda 1 - öktebir dölet bayrimini tebriklewatqan peytte, gu'angdung ishchiliri bu bayramni namayish ötküzüp kütüwaldi. Gerche xitay metbu'atliri bu heqte héchqandaq melumat bermigen bolsimu, emma namayishqa qatnashqan bir neper ishchi bu heqte radi'omizgha mexsus téléfon échip, bizning bu namayishtin xewerdar bolup qélishimizni hemde buni dunyagha élan qilishimizni telep qildi.

Bayramliq sowghat

Bu xewerni yetküzgen kishining éytip bérishiche, gu'angdung ölkiside her qaysi sheher, nahiyilerdin bolup jem'iy 50 tok bilen teminlesh idarisi bar bolup, hazir bu idaridiki nurghun ishchi- xizmetchiler xizmitidin boshutulush aldida turmaqtiken. Her qaysi derijilik tok bilen teminlesh idariliri, gu'angdung ölkilik tok bilen teminlesh guruhigha qarashliq bolup, bu orun 9 -ayning 27 - küni uqturush chüshürüp, bu sistémidiki her qaysi idarilerde xizmetchilerni qisqartish herikitini élip baridighanliqini élan qilghan. Bu xewer derhalla ishchi- xizmetchilerning naraziliqini qozghighan. Ular 9 - ayning 28 - künidin bashlap özliri qarashliq idarilerning aldigha yighilip tinch olturup qarshiliq bildürgen.

Radi'omizgha xewer yetküzgen ismini ashkarilashni xalimighan bu kishining éytip bérishiche, yuqirining bu pilani boyiche, bir lyen jyang sheherlik tok bilen teminlesh idarisining özidila 500 neper ishchi ishtin toxtitilidighan bolup, buningdin ghezeplen'gen ishchi- xizmetchiler özlikidin toplinip hökümetning bu pilanigha naraziliq bildürgen. U mundaq deydu:

"28, 29 we 30 -chésladin tartip 1 - öktebirgiche bu namayish dawamlashti. Lékin bayramliq dem élish waqti bir hepte dawamlishidighan bolghachqa, biz 8 - öktebir küni namayishni yene dawamlashturmaqchi. Bu namayish yene léy jow shehiridimu élip bérilghan. Méning bilidighinim bu ikki yerdiki namayish, lékin gu'angdungda bundaq tok bilen teminlesh idarisidin 50 i bar. Shunga méningche, u jaylardiki ishchi- xizmetchilermu choqum oxshash naraziliq bildüridu".

Uning éytishiche, lyen jyang sheherlik saqchi idarisi bu namayishni közitish üchün neq meydan'gha bir türküm saqchilarni orunlashturghan bolup, bu yerde saqchilar bilen namayishchilar arisida hazirghiche héchqandaq toqunush yüz bermigen. Lékin léy jow shehirining ehwali bir qeder éghirraq bolup, bu yerdiki éléktir istansisining ishchi- xizmetchiliri zawut bashliqini bir mezgil soliwalghan, kéyin saqchilar kélip uni qutuldurup chiqqan.

Ishtin boshitilidighini éniq

Biz léy jow sheherlik tok bilen teminlesh idarisigha téléfon qilduq. Emma bu yerde téléfonni alidighan adem chiqmidi. Téléfonimiz ulan'ghan lyen jyang shehirining tok bilen teminlesh idarisidiki bir xadim bu xewerning rastliqini étirap qildi. U mundaq dédi:

"Yuqiridin bizge 888 shitatliq san berdi. Buningdin éship ketkenliri ishtin boshitilidighan gep. Anglishimche, ularni imtihan élish usuli boyiche tallaydiken. Imtihandin ötelmigenlerni ishtin toxtitidiken".

Biz uningdin imtihan mezmunlirining némilerni öz ichige alidighanliqini sorighinimizda, u imtihanda, kespiy we siyasiy mezmunlarning her ikkilisi bolushi mumkinlikini bildürdi.

Buningdin sirt gu'angdung ölkiside téxi 9 - ayning bashliridila, hökümetning bir qanche kömür kanlarni étiwétishi sewebidin ishsiz qalghan shawgu'en rayonidiki 10 mingdin oshuq kan ishchisi chong kölemde namayish élip barghan idi. Xitayda naraziliq namayishlirining yüz bérishi yildin-yilgha éshiwatqan bolup, xitay jama'et xewpsizlik ministirliqining chiqarghan doklatida körsitilishiche, xitayda 10 yilning aldida bir yilda 10000 qétim namayish yüz bergen bolsa, hazir bu san téz köpiyip, 2003 - yili 58000 qétim, 2004 - yili bolsa 74000 qétim namayish yüz bergen. (Peride)