Б д т кишилик һоқоқ мутәхәссислири хитайдики зияритини башлиди

Бирләшкән дөләтләр тәшкилати кишилик һоқоқ әмәлдарлири, бәш кишилик мутәхәссисләр гурупписиниң хитайдики қанунсиз тутуп туруш мәсилисини тәкшүрүш үчүн бейҗиңға йолға чиққанлиқини билдүрди.

Бирләшкән дөләтләр тәшкилати кишилик һоқоқ комититиниң баянатчиси җузи дияз мухбиримизниң зияритини қубул қилғанда, б д т кишилик һоқоқ комититидики бәш нәпәр мутәхәссисниң хитайдики түрмә, әмгәк билән өзгәртиш мәйдани, роһий кисәлләр дохтурханиси вә тутуп туруш орунлириға берип, қанунсиз тутуш мәсилисиниң бар - йоқлиқини тәкшүридиғанлиқини билдүрди. У сөзидә мундақ диди:

- Мутәхәссисләр гурупписи19 - синтәбирдин 30 - синтәбиргичә, хитайдики бейҗиң , чиңду вә ласаларға берип тәкшүрүш елип бариду. Улар хитайдики һөкүмәт әмәлдарлири, сотчилар вә сақчилар билән пикир алмаштуриду. Улар йәнә мәһбуслар, тутуп туруш орунлири вә түрмиләрдә йетип чиққанлар билән сөһбәт өткүзиду.

Тәкшүрүлидиған орунлархалиғанчә таллиниши керәк

Бирләшкән дөләтләр тәшкилати кишилик һоқоқ комититиниң баянатчиси җузи дияз мәзкүр мутәхәссисләр гурупписиниң хитай һөкүмитиниң тәклипи бойичә бейҗиңға барғанлиқини билдүрүп, мундақ диди:

ـ Мутәхәссисләр гурупписи тәкшүридиған йәрләрниң орнини өзи таллайду һәмдә б д т кишилик һоқоқ комититиниң мунасивәтлик бәлгилимилиригә асасән һәқиқий әһваллар үстидин тәкшүрүш елип бариду. Б д т мутәхәссислириниң тәкшүрүш елип беришиға йол қойған дөләтләр бәлгилимә бойичә чоқум бирләшкән дөләтләр тәшкилати мутәхәссислириниң тәкшүрүш орнини халиғанчә таллишиға йол қоюши һәмдә уларниң хизмитигә дәхлий тәроз йәткүзмәслики керәк.

Җози диязниң көрситишичә, б д т мутәхәссисләр гурупписи хитай һәққидики тәкшүрүш доклатини киләр йили әтиязда ечилидиған бирләшкән дөләтләр тәшкилати кишилик һоқоқ комититиниң йиллиқ йиғиниға сунидикән.

ـ Бирләшкән дөләтләр тәшкилати мутәхәссислириниң хитайдики асаслиқ вәзиписи тутуп туриливатқан кишиләрниң нимә үчүн тутулғанлиқи вә уларниң тутуп турулуш шәртлириниң хәлқара өлчәмгә тошидиған - тошмайдиғанлиқини игиләш. Бирақ улар бу җәрянда йәнә қийин қистаққа елиш мәсилисиниму тәкшүриду.

Бурунқи тәкшүрүшләр кечиктүрүлгән

Баш штаби нйо-йорктики " хитай кишилик һоқоқ тәшкилати" ниң рәиси лиючиң әпәнди хитай һөкүмитиниң бу қетим б д т мутәхәссислириниң тәкшүришигә тусқунлуқ қилмаслиқини үмүд қилидиғанлиқини билдүрди. У хитай һөкүмитиниң б д т кишилик һоқоқ комитити тән җазасини тәкшүрүш әмәлдариниң бу йил алтинчи айда хитайға қилидиған сәпирини қарарсиз кичиктүргәнлики һәққидә тухтулуп, мундақ диди:

ـ Тән җазасини тәкшүрүш әмәлдари хитайға берип тәкшүрүш елип бармақчи болғанда, хитай һөкүмити " тәйярлиқимиз пүтмиди" дәп, йәнә " у зиярәт қилған мәзгилдә түрмидики хадимларни дәм елишқа қоюп берәттуқ" дәп баһанә көрсүтүп, униң зияритини кичиктүргән. Әмилийәттә тән җазасини тәкшүрүш әмәлдариниң сәпири һазирғичә кичиктүриливатиду. Ениқки хитай һөкүмити бу қетим, халиғанчә тутуп туруш мәсилисини тәкшүрүш мутәхәссислирини тәклип қилиш арқилиқ, б д т тән җазасиға қарши туруш әмәлдариниң тәкшүрүш елип беришини йоқ қилмақчи. Шоңа буни мән бир арқиға чикиниш дәп қараймән.

Б д т кишилик һоқоқ комититиниң баянатчиси җузи диязниң билдүришичә, хитай һөкүмити һазирға кәлгичә, б д т тән җазасини тәкшүрүш әмәлдариниң хитайға зиярәт қилишиниң күнтәртибини бикитмигән. (Арзу)