Заманимизда террорчилиқ билән қораллиқ тоқунуш - бихәтәрлик, тәрәққият вә әркинликниң дүшмини


2005-09-21
Share

"Көзитиш жорнили" да баян қилинишичә, б д т ниң 60 йиллиқини хатириләш мунасивити билән ечилған дөләт башлиқлири йиғини җәрянида, б д т ниң бихәтәрлик кеңиши террорчилиққа қутритиштин келип чиқиватқан хәтәрлик ақивәтләр күндин - күнгә көпийиватқан һазирқи әһвални нәзәрдә тутуп, 2005 - йили 9 - айниң 14 -күни "террорчилиққа қутритишни чәкләш тоғрисида 1624 - номурлуқ қарар" қобул қилған.

Қарарда америка қатарлиқ б д т бихәтәрлик кеңишигә әза 15 дөләтниң башлиқлири террорчилиққа қутратқучиларни қанун бойичә җазалаш үчүн бирдәк һәрикәт қоллинишқа вәдә бәргән.

Б д т бихәтәрлик кеңишиниң террорчилиққа қутритишни чәкләш тоғрисида қарар чиқиришни әнгилийә оттуриға қойған вә қарар текистини лайиһиләп чиққан. Бу қарарда, мәйли кимниң, қайәрдә вә немә мәқсәттә қутритишидин қәтий нәзәр, һәр қандақ шәклидики террорчилиқ хаһишилириниң һәммиси қаттиқ әйибләнгән.

Бәзи кишиләрниң кәлгүсидә зораванлиқ һәрикәтләрни елип беришиға йол ечиш үчүн, һазирқи террорчилиқни ақлиған, пәдәзлигән хаһишилириға қаттиқ рәддийә берилгән. Қарарда йәнә, террорчилиққа қутритидиған һәр қандақ хаһишиларға һәммә дөләтниң қаттиқ зәрбә бериши лазимлиқи, террорчилиққа четилидиған һәр қандақ кишигә панаһлиқ бәрмәслики тәкитлинипла қалмай, бәлки бу җәһәттә кимләрниң аллиқачан еғир хаталиқ өткүзгәнлики һәққидиму дәлил- испат көрситилгән.

Қарарда йәнә, б д т ға әза болған 191 дөләтниң һәммиси бу қарарға әмәл қилип, дөләтләр ара чегра бихәтәрликини күчәйтиши, террорчиларниң сахта кимлик билән чегридин киришигә йол қоймаслиқи, бу қарарниң иҗра қилиниши үчүн б д т бихәтәрлик кеңишиниң қаримиқида қурулған террорчилиққа қарши туруш комитети һәр қайси дөләтләргә яр - йөләктә болуши тәкитләнгән.

Б д т ниң бу қетимқи йиғинида, қораллиқ тоқунуштин сақлиниш җәһәттиму йәнә бир қарар қобул қилинған болуп, бу қарарму һәр қайси дөләтләрдин қораллиқ тоқунушқа елип баридиған амилларға диққәт қилишни, тәбиии байлиқларни қанунсиз булаң - талаң қилип йөткәп кетишни чәкләшни, пуқралар җәмийитини қоғдашни, тинчлиқни сақлаш қошунлирини күчәйтишни , адил вә очуқ - йоруқ сайлам елип беришни тәкитлигән.

Б д т бихәтәрлик кеңишиниң "террорчилиққа қутритишни чәкләш тоғрисида қарар" чиқарған бу йиғинда, америка президенти җорҗи буш " террорчилиқ билән қораллиқ тоқунуш бихәтәрлик, тәрәққият вә әркинликниң дүшмини. Биз һәммимиз б д т да елинған бу қарарға асасән бирдәк һәрикәт қилип, террорчиларниң иқтисадий мәнбәлирини тоңлитишимиз, уларниң сахта кимлик билән башқа дөләт чегрисидин өтүп әркин һәрикәт қилишидин , болупму кәң көләмлик қирғинчилиқ үчүн қоллинидиған һәр хил қоралларға игә болувелишидин сақлинишимиз лазим" дегән.

Аргентина призеденти нестор кирчнер " террорчилиқ хаһишлириниң һәммиси җинайәт садир қилғанлиқ. Уни ақлашқа болмайду. Милләтни, көз қарашни яки динни бананә қилип яки башқа мәқсәт үчүн һәр қандақ баһанә көрситип бигунаһ пуқраларни қирғин қилған җинайәтләрни ақлашқа һәргиз йол қоймаслиқ лазим" дегән.

Танзанийә призеденти бәнҗамин мкапа " биздә 'әл –қаидичилар' 1998 - йили америкиниң дариссаламдики әлчиханисини партлатқан бир чоң террорлуқ вәқәси йүз бәргән иди. Шуниңдин кейинму дөлитимизниң асминидин террорлуқ туманлири тарап кәткини йоқ. Һелиму пат - патла қанлиқ тоқунуш йүз берип туриду. Буни һәл қилишта бизгә башқа дөләтләр билән болған һәмкарлиқ керәк" дегән.

Роминийә президенти трайн басаску " бихәтәрлик тәдбирлирини елишта бир дөләт өз даирисидила иш қилиши мумкин әмәс, шуңлашқа хәтәрлик мәнбәси нәдә болса шу җайға бивастә зәрбә берип, йилтизини қурутуши лазим" дәп тәкитләпла қалмай, бәлки 10 - ай ичидә мунасивәтлик тәшкилатларни тәклип қилип, район даирилик һәмкарлиқ мәсилиси бойичә мәслиһәт қилидиғанлиқини билдүргән. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт