Zamanimizda térrorchiliq bilen qoralliq toqunush - bixeterlik, tereqqiyat we erkinlikning düshmini

• Muxbirimiz welining bu heqtiki melumati
• Download story audio

"Közitish zhornili" da bayan qilinishiche, b d t ning 60 yilliqini xatirilesh munasiwiti bilen échilghan dölet bashliqliri yighini jeryanida, b d t ning bixeterlik kéngishi térrorchiliqqa qutritishtin kélip chiqiwatqan xeterlik aqiwetler kündin - kün'ge köpiyiwatqan hazirqi ehwalni nezerde tutup, 2005 - yili 9 - ayning 14 -küni "térrorchiliqqa qutritishni cheklesh toghrisida 1624 - nomurluq qarar" qobul qilghan.

Qararda amérika qatarliq b d t bixeterlik kéngishige eza 15 döletning bashliqliri térrorchiliqqa qutratquchilarni qanun boyiche jazalash üchün birdek heriket qollinishqa wede bergen.

B d t bixeterlik kéngishining térrorchiliqqa qutritishni cheklesh toghrisida qarar chiqirishni en'giliye otturigha qoyghan we qarar tékistini layihilep chiqqan. Bu qararda, meyli kimning, qayerde we néme meqsette qutritishidin qet'iy nezer, her qandaq sheklidiki térrorchiliq xahishilirining hemmisi qattiq eyiblen'gen.

Bezi kishilerning kelgüside zorawanliq heriketlerni élip bérishigha yol échish üchün, hazirqi térrorchiliqni aqlighan, pedezligen xahishilirigha qattiq reddiye bérilgen. Qararda yene, térrorchiliqqa qutritidighan her qandaq xahishilargha hemme döletning qattiq zerbe bérishi lazimliqi, térrorchiliqqa chétilidighan her qandaq kishige panahliq bermesliki tekitlinipla qalmay, belki bu jehette kimlerning alliqachan éghir xataliq ötküzgenliki heqqidimu delil- ispat körsitilgen.

Qararda yene, b d t gha eza bolghan 191 döletning hemmisi bu qarargha emel qilip, döletler ara chégra bixeterlikini kücheytishi, térrorchilarning saxta kimlik bilen chégridin kirishige yol qoymasliqi, bu qararning ijra qilinishi üchün b d t bixeterlik kéngishining qarimiqida qurulghan térrorchiliqqa qarshi turush komitéti her qaysi döletlerge yar - yölekte bolushi tekitlen'gen.

B d t ning bu qétimqi yighinida, qoralliq toqunushtin saqlinish jehettimu yene bir qarar qobul qilin'ghan bolup, bu qararmu her qaysi döletlerdin qoralliq toqunushqa élip baridighan amillargha diqqet qilishni, tebi'i'i bayliqlarni qanunsiz bulang - talang qilip yötkep kétishni chekleshni, puqralar jem'iyitini qoghdashni, tinchliqni saqlash qoshunlirini kücheytishni , adil we ochuq - yoruq saylam élip bérishni tekitligen.

B d t bixeterlik kéngishining "térrorchiliqqa qutritishni cheklesh toghrisida qarar" chiqarghan bu yighinda, amérika prézidénti jorji bush " térrorchiliq bilen qoralliq toqunush bixeterlik, tereqqiyat we erkinlikning düshmini. Biz hemmimiz b d t da élin'ghan bu qarargha asasen birdek heriket qilip, térrorchilarning iqtisadiy menbelirini tonglitishimiz, ularning saxta kimlik bilen bashqa dölet chégrisidin ötüp erkin heriket qilishidin , bolupmu keng kölemlik qirghinchiliq üchün qollinidighan her xil qorallargha ige boluwélishidin saqlinishimiz lazim" dégen.

Argéntina prizédénti néstor kirchnér " térrorchiliq xahishlirining hemmisi jinayet sadir qilghanliq. Uni aqlashqa bolmaydu. Milletni, köz qarashni yaki dinni banane qilip yaki bashqa meqset üchün her qandaq bahane körsitip bigunah puqralarni qirghin qilghan jinayetlerni aqlashqa hergiz yol qoymasliq lazim" dégen.

Tanzaniye prizédénti benjamin mkapa " bizde 'el –qa'idichilar' 1998 - yili amérikining darissalamdiki elchixanisini partlatqan bir chong térrorluq weqesi yüz bergen idi. Shuningdin kéyinmu dölitimizning asminidin térrorluq tumanliri tarap ketkini yoq. Hélimu pat - patla qanliq toqunush yüz bérip turidu. Buni hel qilishta bizge bashqa döletler bilen bolghan hemkarliq kérek" dégen.

Rominiye prézidénti trayn basasku " bixeterlik tedbirlirini élishta bir dölet öz da'irisidila ish qilishi mumkin emes, shunglashqa xeterlik menbesi nede bolsa shu jaygha biwaste zerbe bérip, yiltizini qurutushi lazim" dep tekitlepla qalmay, belki 10 - ay ichide munasiwetlik teshkilatlarni teklip qilip, rayon da'irilik hemkarliq mesilisi boyiche meslihet qilidighanliqini bildürgen. (Weli)