B d t ning yéngi bash katipi ban kimun ependi islahatni bixeterlik kéngishidin bashlimaqchi

Birleshken döletler teshkilatining nizamnamisigha asaslan'ghanda, birleshken döletler teshkilatining bash katipi bu organning eng chong memuriy bashliqi. U 17 minggha yéqin xizmetchining kündilik xizmet ünümini we xamchottiki birnechche milyard amérika dolliriliq xirajetni idare qilidu. Yéqinda kespi diplomat we tejribilik memuriy emeldar ban kimun ependi bu wezipige saylandi.

Ban kimun ependining bash katibliq salahiyiti 61 ‏- qétimliq birleshken döletler teshkilati omum yighinida 192 dölet wekili teripidin maqullandi

B b s ning xewer qilishiche, birleshken döletler teshkilatida bu yil 7 ‏- aydin bashlap bash katib saylimi dawam qiliwatqan idi. Birleshken döletler teshkilatining bixeterlik kéngishide élip bérilghan tunji qétimliq awaz bérishte jenubiy koriyilik ban kimun ependi 15 awazning 12 sige ige bolup, hindistanliq we latowiyilik ikkini namzatni yéngip chiqti. 9 ‏- Ayning 14 ‏- küni élip bérilghan ikkinchi qétimliq awaz bérishte yene 14 awazgha érishti. Nizamname buyiche 9 awazgha érishse saylinalaytti. Ban kimun ependi 9 ‏- ayning 28 ‏- küni élip bérilghan üchinchi qétimliq awaz bérishte yene mutleq üstünlükke ériship, uni bash katibliq namzatigha körsitish maqulluqtin ötti. 10 ‏- Ayning 13 ‏- küni, ban kimun ependining bash katibliq salahiyiti 61 ‏- qétimliq birleshken döletler teshkilati omum yighinida, chawak chélish shekli arqiliq 192 döletning wekili teripidin maqullandi.

Ban kimun ependi 'zörür bolghanda men choqum mesilini hel qilidighan keskin qarar chiqirimen' dep jakarlidi

Munasiwetlik matériyallargha asaslan'ghanda, b d t ning yéngidin saylan'ghan 62 yashliq bash katipi ban kimun ependi jenubiy koriyide tughulghan. 1970 ‏- Yillirida sé'ul shehiride ali mektepning diplomatiye kespide oqughan, 1998 ‏- yilighiche amérikidiki xarward uniwérsitétining kinnidi siyasiy inistitotida magistirliq unwan alghan we jenubi koriyining hindistanda turushluq bash elchixanisida ishligen. U déplomatik alaqe baghlash, siyaset layihilesh jehetlerde yétilgendin kéyin jenubiy koriye prézidéntining siyasiy we bixeterlik bash meslihetchisi, tashqi ishlar we soda ministiri we jenubiy koriyining awstriyide turushluq bash elchisi bolghan. Emdi u birleshken döletler teshkilatining bash katipliqigha saylandi. Birleshken döletler teshkilatining yettinchi qétimliq bash katipi kofi annan wezipidin ayrilish aldida 'birleshken döletler teshkilatining bash katipliq wezipisini ötesh xuddi darwazning qil üstide méngishigha oxshaydighan xizmet' dégende, hazir wezipe ötesh aldida turghan b d t ning sekkizinchi qétimliq bash katipi ban kimun ependi 'zörür bolghanda, men choqum mesilini hel qilidighan keskin qarar chiqirimen' dep jakarlidi.

Xitay ban kimun ependini 'asiyaliq' dep alqishlighanda, amérika uni amérika bilen jenubiy koriye otturisida küchlük we yéqin ittipaqdashliq munasiwet tiklesh üchün tirishchanliq körsetken, dep alqishlighan

Shinxu'a agéntliqining xewiride bayan qilinishiche, xitay tashqi ishlar ministirlikining bayanatchisi chin'gang muxbirlarning so'allirigha jawap bergende 'b d t ning yéngi bash katipi asiyadin chiqti, bu pütün asiyaning arzusi idi. Junggo bashtin -axir asiyaliq namzatni qollap kelmekte, yene dawamliq qollaydu' dep jakarlighanda, 'jenubiy koriye uchur agéntliqi'ning buningdin yérim yil burunqi xewiride 'amérika jenubiy koriyining tashqi ishlar we soda ministiri ban kimunning b d t ning bash katib saylimigha qatnishishini qizghin qarshi almaqta. Amérikidiki péshqedem déplomatlar amérika bilen jenubiy koriye otturisida küchlük we yéqin ittipaqdashliq munasiwet tiklesh üchün tirishchanliq körsetken, shimali koriyining yadro kérzisi we amérika bilen jenubiy koriye otturisidiki erkin soda kélishimige da'ir emeliy mesililer buyiche pikir ixtilaplirini yaxshi bir terep qilghan ban kimun ependi bilen buningdin kéyin dawamliq yéqindin hemkerlishidighanliqini bildürmekte' dep bayan qilin'ghan idi.

Ban kimun ependi bixeterlik kéngishining ezalirini hazirqi 15 tin 25 ke qeder kéngeytmekchi

'An'gula xewerliri géziti'ning 19 ‏- dékabir küni nyuyorktin xewer qilishiche, b d t ning wezipe ötesh alda turghan yéngi bash katipi ban kimun ependi ötken heptining axirida, b d t ning bixeterlik kéngishide islahat élip bérip uninggha yéngi eza qoshidighanliqini bildürgen. Ban kimun ependi bundaq islahatni élip bérishning zörürlüki heqqide toxtalghanda 'bu 21 ‏- esirdiki siyasiy jughrapiyilik ré'alliqning éhtiyaji' dégen.

Ban kimun ependi özi élip baridighan islahatning tepsilati heqqide toxtalghanda 'men bash katipliq wezipining iqtidarini jari qildurup, eza döletlerdin meslihet alimen, buningdiki ortaqliqitn mesilini hel qilidighan chare hasil bolidu, bundaq yéngi chare bilen b d t da burun dawamliship kéliwatqan ehwalni yoq qilip, aldi bixeterlik kéngishining ezalirini hazirqi 15 tin adette ret qilish hoquqi bolmighan 6 ezani öz'ichige halda 25 ke qeder kéngeytimen' dep jakarlighan. (Weli)