Б д т кишилик һоқуқ кеңишиниң 15 - нөвәтлик йиғинида уйғурлар мәсилиси оттуриға қоюламду?

Б д т кишилик һоқуқ кеңишиниң 15 - нөвәтлик йиғини ечилиш алдида турмақта. Йиғинға, б д т ға әза 190 дин артуқ дөләт шундақла б д т ни көзитиш салаһийитигә еришкән 200 дин артуқ кишилик һоқуқ тәшкилатлириниң вәкиллири қатнишиду.
Мухбиримиз әкрәм
2010.09.03
UNPO-yighinida-Dolqun-Eysa-305.jpg Сүрәттә, дунйа уйғур қурултийиниң баш катипи долқун әйса әпәнди бу қетимқи вакаләтсиз милләтләр тәшкилатиниң италийидә өткүзүлүватқан қурултийида.
RFA Photo / Eqide

Б д т ға әза дөләтләр вә б д т ни көзитиш салаһийитигә еришкән 200 дин артуқ кишилик һоқуқ тәшкилатлириниң вәкиллириниң қатнишиши билән, дөләтләрниң кишилик һоқуқ вәзийити һәққидә йилда үч қетим музакириләр елип берилидиған вә мунасивәтлик қарарлар қобул қилинип, кишиләрниң инсаний һәқ - һоқуқлири дәпсәндичиликкә учраватқан дөләтләр һөкүмәтлири үстидин хәлқаралиқ бесим пәйда қилидиған бу йиғинда, уйғурлар мәсилисини күнтәртипкә елип кириш, д у қ ниң узундин буянқи муһим хизмәтлириниң бири болуп кәлгәнлики мәлум.
 
Бу қетимқи кишилик һоқуқ кеңиши йиғини 9 - айниң 13 - күнидин 10 - айниң 1 - күнигә қәдәр шиветсарийиниң җәнвә шәһиридики б д т баш шитабида давам қилидиған болуп, д у қ мәзкур йиғинда уйғурлар мәсилисиниң оттуриға қоюлуши үчүн бир қанчә айлардин буян паал тәйярлиқ қилған.

8 - Айниң 30 - күнидин 9 - айниң 2 - күнигә қәдәр җәнвәдә туруп, б д т ниң мунасивәтлик хадимлири һәм һәрқайси дөләтләрниң әлчихана мәсуллири, нопузлуқ хәлқаралиқ тәшкилатлар билән учришишлар өткүзгән д у қ баш катипи долқун әйса әпәнди бу мунасивәт билән зияритимизни қобул қилип, алди билән бу қетимқи йиғинниң әһмийити тоғрисидики көз қарашлирини вә д у қ ниң елип барған паалийәтлири баян қилип өтти.
 
Долқун әйса әпәнди бу қетимқи паалийити җәрянида бир қисим ғәрб демократик дөләтлириниң әлчилири вә хәлқара кәчүрүм тәшкилатиға охшаш тәсирлик тәшкилатларниң вәкиллири билән көрүшүп, шәрқий түркистанниң нөвәттики вәзийити һәққидә мәлуматлар бәргәнликини, хитайниң күнсери әшәддилишип бериватқан кишилик һоқуқ дәпсәндичиликини пакитлири билән оттуриға қоюп, б д т 15 - нөвәтлик кишилик һоқуқ кеңиши йиғинида уйғурлар мәсилисини оттуриға елип чиқиш тоғрилиқ мәслиһәтләр елип барғанлиқини тәкитлиди.
 
Д у қ баш катипиниң билдүрүшичә, бу йил 6 - айда чақирилған б д т кишилик һоқуқ кеңишиниң 14 - нөвәтлик омуми йиғинида уйғурлар мәсилиси оттуриға қоюлған болуп, ғәрб демократик әллиригә вәкалитән уйғурлар мәсилисини күнтәртипкә елип киргән испанийә һөкүмәт вәкили хитай һөкүмити вәкиллирини қейин әһвалда қалдурған.
 
Долқун әйса әпәндиниң ейтишичә, хитай һөкүмитиниң нөвәттә уйғурлар үстидин йүргүзүватқан бастуруш сиясити ғәрб әллири һәм кишилик һоқуқ тәшкилатлири җиддий диққитидә тутуватқан бир мәсилә болуп, 15 - нөвәтлик кишилик һоқуқ кеңиши йиғинида хитай тәрәпни йәнә бир қетим осал әһвалға чүшүрүп қоюши мумкин икән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.