B d t xitayni qush zukam wirusi toghrisida agahlandurdi

Dunya sehiye teshkilatining körsitishiche, xitayning gherbiy shimalida chingxey ölkisidiki qushlarda bayqalghan 5N1 tipliq ejellik qush zukam wirusining tarqilish ehwali, xitay hökümitining bu heqtiki doklatigha qarighanda köp éghirken.

Ölgen qushlar hökümet melumatidin besh hesse köp

Yéqinda chingxey ölkisidiki weqe yüz bergen rayonlarda tekshürüsh élip barghan dunya sehiye teshkilatidiki mutexessisler, qush zukamida ölgen köchmen qushlarning sani xitay hökümitining doklatidiki sandin besh hesse köp, dep körsetti.

Dunya sehiye teshkilatining ashkarilishiche, bu yil 4 - aylarda qush zukam wirusida ölgen chingxey kölidiki köchmen qushlarning sani 5000 gha yétidiken. Xitay hökümiti bu yil 5 - ayda qush zukam wirusida ölgen qushlarning sani 1000 etrapida, dep élan qilghan idi.

Dunya sehiye teshkilati xitayni tekshürüsh élip bérishke chaqirdi

Dunya sehiye teshkilatining yuqiri derijilik mutexessisi doktor. Juliy xollning tekitlishiche, bu ejellik qush zukam wirusining köchmen qushlarda tunji qétim bu qeder zor kölemde bayqilishi bolup hésablinidu. U, "wirustiki özgürüsh uning öltürüsh iqtidarini kücheyishke bashlighan. Buning insanlargha qandaq tesir körsitidighanliqini hazirche bilmeymiz," dédi.

Juliy xoll , xitay da'irilirini köchmen qushlar etraptiki döletlerge köchüshtin burun, qushlar topi üstidin H5N1 tipliq qush zukam wirusi tejribisi élip bérishke chaqirghan. U, " bizning bu jaydiki qushlar üstidin tetqiqat élip bérish arqiliq qaysi qushlarning wirus élip yüridighan, qaysilirining élip yürmeydighanliqini bilish pursitimiz bar. Pursitimiz nahayiti cheklik, peqet 2 - 3 ayla waqtimiz bar," dep körsetti.

Qushlardiki wirusning ademlerge tarqilish mümkinchiliki bar

Emma mutexessisler, chingxey kölidiki qushlar etraptiki jaylargha köchüsh jeryanida özidiki wirusni bashqa haywanlargha yuqturush mumkinchiliki bar, dep endishe qilmaqta.

Dunya sehiye teshkilatining xitayda turushluq wekili xenk békidamning fransiye axbarat agéntliqigha tekitlishiche, chingxeyde bayqalghan qush zukam wirusi kishini pewqullade endishige salidiken. U, " bu qushlar ming kilométir uzunluqqa uchalaydu, bu ehwal bezi mesililerni tughdurushi mumkin," dep tekitlidi.

Sherqiy - jenubiy asiyada qush zukam wirusigha qarshi on milyonlighan oy qushliri öltürüldi. Mutexessislerning tekitlishiche, qush zukam wirusi bu wirus bilen yuqumlan'ghan haywanlar yaki qushlargha yéqinlashqan kishilerge yuqudiken. 2003 - Yildin béri wéytnam, tayland we kambodzhalarda 54 kishi mezkur wirusni yuqturuwélip ölgen.

Xitaylar d s t ning Uyghur aptonom rayonida tekshürüsh élip bérishigha ruxset qilmidi

Mezkur wirus Uyghur aptonom rayonining chöchek we sanji sheherliridiki baqmichiliq pérmilirida arqa- arqidin bayqaldi. Xitay hökümiti bir tereptin ehwalni dunya sehiye teshkilatigha melum qilip, késellik ehwalining kontrol qilin'ghanliqini bildürgen bolsa, yene bir tereptin Uyghur aptonom rayonidiki Uyghurche we xitay tilida chiqidighan metbu'atlarda késel tarqalghanliqini xewer qilmidi shundaqla dunya sehiye teshkilatining Uyghur aptonom rayonidiki késel tarqalghan jaylarni tekshürüsh telipini ret qildi.

Qush zukam wirusi yer shari xaraktérlik apet peyda qilalaydu

Tibb'iy mutexessisler, qush zukam wirusining insanlargha téximu asan yuqudighan haletke kélishidin endishe qilmatiken. Chünki bu ehwalda qush zukam wirusi yer shari boyiche nechche milyon insanning ölüshini keltürüp chiqirishi mumkin. Xitay hökümiti chingxey köli etrapidiki radi'usi 50 kilométir kélidighan da'irini apet rayoni, dep élan qilghan.

Dunya sehiye teshkilatidiki mutexessislerning bildürüshiche, xitay da'iriliri hazirgha qeder 12 qush bilen ikki adem üstidin tekshürüsh élip barghan. B b s ning ilgiri sürüshiche, qush zukam wirusi bilen yuqumlan'ghan qushlar az uchraydighan yawayi qushlar bolup, da'iriler bu qushlarni öltürüshke qiymighan.

Xitay amatidinni öy qushlirigha ishletkenlikini ret qildi

Béyjing hökümiti ilgiri xitayda bayqalghan yuqumluq késellerni yoshurush bilen eyiblen'gen idi.

Xitay hökümiti 2003 - yili xitayda sars késili tarqan'ghanliqini yoshurghandin kéyin, mezkur késellik bashqa döletlerge tarqilip, dunya boyiche 800 kishining ölüshini keltürüp chiqarghan. Ötken hepte xitay hökümiti dihqanlarni ademlerge ishlitidighan wirusqa qarshi turush dorisi bilen haywanlirini dawalap, qush zukan wirusining aldini almaqchi bolghanliqini ret qildi.

Mutexessislerning agahlandurushiche, ademler ishlitidighan wirusqa qarshi turush dorisini öy haywanlirigha ishlitish, mezkur dorining ademlerge tesir qilish küchini ajizlitiwétidiken. (Erkin)