Хитай, б д т кишилик һоқуқ комитети билән қанун ислаһати келишими имзалиди


2005-08-31
Share
Б д т ниң кишилик һоқуқ ишлири бойичә али комисари луис арбор

Хитай һөкүмити чаршәнбә күни бейҗиңда б д т кишилик һоқуқ комитетиниң али комисари билән, хитай қанун сестимисини б д т ниң "хәлқара пуқралар һоқуқи вә сияси һоқуқи әһдинамиси" ға маслаштуруш ислаһат елип бериш бойичә келишим имзалиди. Келишим, б д т ниң кишилик һоқуқ ишлири бойичә али комисари луис арбор билән, бир нәпәр юқири дәриҗилик хитай дипломатик әмәлдари оттурисида имзаланған.

Б д т хитайда кишилик һоқуқ тәлим - тәрбийиси елип бариду

Луис арборниң хитайда елип бериватқан зияритиниң нишани, хитай һөкүмитиниң "хәлқара пуқралар һоқуқи вә сияси һоқуқи әһдинамиси" ға тезрәк имза қоюшини қолға кәлтүрүш иди. Бирләшмә ахбарат ахбарат агентлиқиниң хәвиригә қариғанда чаршәнбә күни имзаланған келишим бойичә, б д т кишилик һоқуқ комитети хитайниң " түрмә җазаси орниға башқичә усулларни қоллиниш, җинайи ишлар қануни, адвокатлар қануни вә алақидар қанун - бәлгилимиләрни" өзгәртишигә ярдәм бериду. Оттура - башланғуч вә университетларда кишилик һоқуқи дәрси тәсис қилиш, аммиви мулазимәт орунлирида тәрбийиләш курслирини ечиш қатарлиқларни өз ичигә алиду.

Арбор, хитайдин балилар вә аялларни елип сетишқа қарши турушни тәләп қилди

Луис арборниң хитайда елип бериватқан зиярити дүшәнбә күни башланди. У, сәйшәнбә күни асия - тинч окян кишилик һоқуқи йиғинида, хитай вә шуниң қатаридики "хәлқара пуқралар һоқуқи вә сияси һоқуқи әһдинамиси" ни имзалимиған дөләтләрни, йәр шари бойичә өзлүксиз зорийиватқан аяллар вә балиларни елип- сетиш қилмишиға қарши тәдбир елишкә чақирди. Луис арбор, аяллар вә балиларни елип- сетиш қилмишини " вәһшиләрчә җинайәт," дәп әйиблигән. Арбор бу қилмишни " кишилик һоқуқниң еғиз дәриҗидә дәпсәндә қилинишидур", дәйду. Униң тәкитлишичә, адәм содиси асия районида бурунқиға қартиғанда техиму көпәйгән.

Б д т али комисари, өлүм җазаси вә әмәгәк лагирлири мәсилисини тилға алди

Луис арбор ханим шу күни хитай әдлийә министири қатарлиқ юқири дәриҗилик әмәлдарлар билән сөһбәт елип барған. Б д т али комисариниң баянатчиси диазниң "америка авази радиоси" ға тәкитлишичә, у сөһбәт җәрянида өлүм җазасини азайтиш, әмгәк билән өзгәртиш лагирлириниң мәсилисини оттуриға қойған.

Луис арбор, чаршәнбә күни җоңго кишилик һоқуқ тәтқиқат җәмийити, җоңго мейиплар бирләшмиси, бейҗиң балиларға қануни ярдәм бериш вә тәкшүрүш мәркизи, бейҗиң адвокатлар җәмийити, бейҗиң университети қанун факултетиниң аяллар һоқуқи тәтқиқати вә мулазимәт мәркизи қатарлиқ һөкүмәт тәрәп тәшкилатлар билән сөһбәт елип барди.

Кишилик һоқуқ паалийәтчилири хитай қанун ислаһатидин үмидсиз

Хәлқара кәчүрүм тәшкилатиниң шәрқий асия ишлири бойичә мәсули марк әллисен, хитай даирилириниң "хәлқара пуқралар һоқуқи вә сияси һоқуқлар әһдинамиси" ни йеқин арида тәстиқлишиға үмидсиз қарайдикән. У, хитай қанунлирида һечбир илгириләш болмиғанлиқини билдүргән иди.

Б д т мәзкур әһдинамини 1960 - йилларда мақуллиған. Әмма хитай һөкүмити буниңға 1998 - йили имза қойди. Хитай қанунлири бойичә мәзкур әһдинамә хәлқ қурултийида тәстиқланғандила күчкә игә болиду.

Хәлқ қурултийи немә үчүн "хәлқара пуқралар һоқуқи вә сияси һоқуқлар әһдинамиси" ни һазирғичә тәстиқлимайду? америка саракюз университетиниң хәлқара мунасивәтләр кәспий бойичә доктор оқуғучиси қилич қанат бу һәқтики қарашлирини оттуриға қоюп, әгәр хитай һөкүмити бу әһдинамини тәстиқлиса, хитай һөкүмити демократийини илгири сүрүши керәклики, кишилик һоқуқни қоғдиши, башқа партийиләргә вә аз санлиқ милләтләргә һоқуқ бериши керәкликини, бирақ хитайниң буларни халимайдиғанлиқини еййти.

Хитай, арборниң зиярити җәрянида кишилик һоқуқ паалийәтчилирини тәқип астиға алди

Кишилик һоқуқни яқлиғучиларниң әрз қилишичә, хитай сақчилар б д т али комисари қонған меһманханиниң әтрапини контрол қилип, кишилик һоқуқни яқлиғучиларниң луис арбор ханимға йеқинлишишини чәклигән.

Бирләшмә ахбарат агентлиқиниң илгири сүрүшичә, сақчилар хав венҗу, лю шявбо, лю ди қатарлиқ өктичиләрни нәзәрбәт қилған болуп, ройтерс ахбарат агентлиқи уларниң луис арбор билән көрүшүп, хитайниң " йүзини төкүдиған ишларни" қилип қоюшидин сақлиниш үчүн нәзәрбәнт қилинғанлиқини билдүргән.

Америка әлчиханиси: хитайниң һәрикити хәлқара әһдинамиларға хилап

Бейҗиңдики америка әлчиханиси хитайниң даирилириниң һәрикитини " хәлқара кишилик һоқуқи үлчәмлирини дәпсәндә қилиш," дәп тәнқидлигән.

Америка әлчиханисиниң аял баянатчиси, " әгәр бу хәвәр раст болса, хәлқара кишилик һоқуқ өлчәмлирини очуқ - ашкарә дәпсәндә қилиш болуп һесаблиниду," деди.

Аял баянатчиниң тәкитлишичә, америка бейҗиң һөкүмитини хитай асаси қанунидики вәдиләр бойичә кишилик һоқуқни хәлқара өлчәмләр бойичә әмәлийләштүрүшкә чақиридикән. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт