Abliz nurekning heqiqiy hékayisi

• Muxbirimiz gülchéhrening bu heqtiki toluq melumati
• Download story audio

Buningdin on yil burun tash yürek xitay ata-anisi teripidin tashliwétilgen irsiyetlik éghir késelge giriptar qiz bowaqni, yoldin tépiwilip, béqip chong qilish jeryanida jebri-japalar chékiwatqan abliz nurekni nöwette Uyghur élide bilmeydighan kishi bolmisa kérek.Qeshqerning maralbéshi nahiyiside namrat emma razimenlik bilen yashawatqan perishte süpet bu déhqan boway yéqinda xitaydiki eng méhriban insan bolup bahalan'ghandin buyan uning nami, simasi we uning tashliwétilgen késelchan xitay qizini béqiwélish hékayiliri Uyghur élidiki teshwiqat wastiliridila emes belki xitayning merkizi téliwizisidimu pat -pat körülidighan boldi.

Emeliyette héchqandaq meqset muddi'adin yiraq, eqelliy adimiylik pezilet,musulmanliq exlaq, insaniy muhebbet bolghanliqi üchün tashliwétilgen adem balisigha méhrini bergen bu boway, xitay kompartiyisining qurulghan xatire künliride yene qaytidin, xitayning kompartiye rohigha wekillik qilidighan, milletler ittipaqliqi nemunisi süpitide teswirlenmekte.

Abliz bowayning hékayisi

Qeshqerning maralbéshi nahiyisi sériqbuya bazar yéngi awat kentide bu yil 74 yashning qarisini alghan, appaq saqalliq chéhridin méhribanliq, saddiliq, semimiylik chiqip turidighan, tipik Uyghur déhqanlirining obrazigha ige bir bowayning dawamliq Uyghurche kiyindürüp qoyulghan 10 yashlardiki bir xitay qizini qolidin tutup egeshtürüp yürgenlikini, turup -turup u newrisini ekiletkendek,u qizgha méhirlik béqip, chachlirini silap qoyuwatqanliqini körisiz.

Bu boway, bu yil xitaydiki eng méhriban insan bahalan'ghan abliz nurek, u dawamliq yétilep yürüdighan yénidin ayrimaydighan bu xitay qiz bolsa uning 10 yil ilgiri étizliqtin tépiwilip béqiwalghan xitay qizi, abliz boway u qizgha aybulaq dep isim qoyghan. Abliz boway bilen aybulaq hazir xitayning merkizi téliwéziysidimu körsitilgen cholpanlardin bolup qaldi.

Ikki yil ilgiri bolsa abliz boway a'ilisining bu tughma meqet yoli pütüklük késili bar tashliwétilgen xitay qizni ün -tonsiz béqip, dawalitish jeryanida türlük jebri-japalar chékiwatqanliqini, hetta uning késilini dawalitish yolida yerlirinimu sétiwetkenlikini héchkim bilmeytti.

Abliz boway yashawatqan teklimakan boyidiki bostanliq bolghan yéngi awat kentidiki déhqanlarning yilliq kirimi ikki ming yüen'gimu yetmeydu,abliz nurektek yashinip qalghan déhqanlarning turmushi téximu ghorigül ötidu elwette. Emma bu ésil peziletlik boway, bu béqiwalghan xitay qizini dawalitish üchün tartqan chiqimlirini, japalirini hésablimaydu,minnetmu qilmaydu. Uning üchün aybulaqning saghlam chong bolushi hemmidin muhim.

Abliz bowayning hékayisi, Uyghurlar ichidiki minglighan hékayilerning biri

Abliz bowayning xitay qizini béqiwélishidek bu hékaye, Uyghurlarda yüz bergen hem dawamliq yüz béridighan minglighan hékayilerning biri. Mana bu Uyghurlarda ewladmu ‏- ewlad dawamliship kéliwatqan qan qénigha singgen yüksek insanperwerlikning, méhribanliqining, imanliq, mömin musulmanliqining, en'eniwiy milliy exlaqining ipadilirining biri bolsa kérek.

Insaniyet jem'iyitide bolupmu xitay jem'iyitide siyasiy, iqtisadiy we bashqa menpe'et toqunushlirida insanlar arisidiki munasiwet barghanche murekkepliship sap méhri muhebbettin yiraqlishiwatqan bügünki künde, abliz boway wujudidiki bu xil insaniy burchni, sap insaniy méhri muhebbetni teshwiq qilishqa erziydu.

"Adettiki bir partiye ezasining méhribanliqi"

Emma abliz bowayning bu xil shexsi yaki siyasiy muddi'alardin yiraq, sap insaniy rohimu nöwette xitay kompartiyisi teripidin siyasiy gherezler üchün paydilinmaqta.

Chünki xitay kompartiyisi qurulghanliqini xatirilewatqan xitay teshwiqatidiki abliz nurek bolsa, ataqta méhribanliq elchisi, emeliyette bolsa, shinjang gézitide "adettiki bir partiye ezasining méhribanliqi" dégen serlewhede maqale bérilgen bolup, uningda abliz nurek Uyghur kompartiye ezalirining wekili süpitide teswirlinip, " abliz nurek on yildin buyan partiye ezalirigha xas exlaqi peziliti bilen milletler ittipaqliqining bayriqini igiz kötirip, milliy bölgünchilikke qarshi turushta, her qandaq bölgünchilik söz ‏- heriketlirige qarshi turushta bashlamchi bolup rol oynidi.

Uning bu jehette ülgilik ishligen xizmetliri bilen yéngi'awatta birmu milliy bölgünchilik weqesi yüz bermidi " dégendek jümliler bilen süpetlep, bu addi emma, ésil insanperwerlik rohigha ige insan'ghimu qesten siyasiy tüs bergen.

"U bir insan bolghanliqi üchün "

Undaqta shinjangni tesirlendurgen on shexsning biri, xitaydiki eng méhriban insan bolghan abliz nurek, xitay hökümiti teshwiq qiliwatqandek addi déhqan kompartiye ezasi bolghanliqi üchün tashliwétilgen késel bowaqni béqiwaldimu?

Bu qeshqerliq Uyghur milletler ittipaqliqini qoghdash üchün öz ata - anisi teripidin tashliwétilgen xitay qizni béqip dawalash üchün jebri ‏- japa chektimu?

Bu mömin musulman milliy bölgünchilikke qarshi turush üchün bu qizgha méhri muhebbitini ayimaywatamdu?

Bu so'allargha insanperwerlik ish izliri bilen hetta pütün xitayni tesirlendürüp méhriban insan dep bahalan'ghan, xitay hökümiti teripidin kompartiye ezalirining ülgisi qilin'ghan abliz nurek özi jawab bérishke hemmidin heqliq.

Bu tesirlik hékaye ene shu abliz boway éytqandek, "u bir insan bolghanliqi üchün " yüz berdi. Belkim bu xil ésil peziletlik semimiy kishiler oxshash jawab bérishi mumkin. Insanperwerlik we méhribanliq, qedirlinishke, ezizlinishke, medhiyilinishke munasip roh, emma xitay kompartiyisi ene shu sap insaniy peziletnimu özining menpe'eti üchün xizmet qildurmaqta. (Gülchéhre)