Bo shileyning xizmitidin qaldurulushi xitay weziyiti heqqidiki inkaslarni köpeytti

15 - Mart küni xitay merkizi hökümitining chungching shehirining partkom sékritari bo shileyni wezipisidin qaldurghanliqini élan qilishi, xelq'ara metbu'atlarda, xitayning bundin kéyinki siyaset yönilishi hem weziyet tereqqiyati heqqidiki türlük inkaslarni barliqqa keltürdi.
Muxbirimiz méhriban
2012-03-16
Élxet
Pikir
Share
Print
Bo shiley
Bo shiley
AFP

Xitay hökümiti 15 - mart küni chungching shehirining partkom sékritari bo shileyning xizmitidin qaldurulup, uning ornigha xitayning mu'awin bash ministiri jang dé jyangni teyinligenlikini élan qilghandin kéyin, ammiwi tor béketliride yene boshileyning xotuni gu keyleyning qolgha élin'ghanliqi heqqidiki uchurlarmu bérildi.

Xitayning ikki yighini yépilish murasimidin kéyin, 14 - mart béyjingda échilghan muxbirlarni kütüwélish yighinida, xitay bash ministiri wén jyabaw roytérs agéntliqi muxbirining chungching shehirining mu'awin bashliqi wang lijün weqesi heqqidiki so'aligha jawab bérip,"Hazirqi chungching sheherlik partkom hem sheherlik hökümet choqum qayta oylinip, wang lijün weqesidin estayidilliq bilen sawaq élishi kérek" dégen idi. Aridin bir kün ötüpla xitay merkizi hökümitining bo shileyni wezipisidin qaldurghanliqini élan qilishi, xelq'ara metbu'atlarda, xitayning bundin kéyinki siyaset yönilishi hem weziyet tereqqiyati heqqidiki türlük inkaslarni barliqqa keltürdi.

Bezi munazirilerde, bo shileyning wezipisidin qaldurulushi xitayda islahatning bashlan'ghanliqining bishariti ikenliki tekitlendi. Emma roytérs agéntliqi, amérika awazi radi'osi, erkin asiya radi'osi, gérmaniye dolqunliri, fransiye agéntliqi qatarliq metbu'atlarda xitayda heqiqi haldiki islahatning téxi bashlanmighanliqi ilgiri sürüldi.

Amérika awazi radi'osida 16 - mart élan qilin'ghan "Bo shileyning wezipisidin qaldurulushi xitaydiki islahatning bashlinishimu?" dégen mulahize maqaliside, "14 - Mart künidiki muxbirlarni kütiwélish yighinida, xitay bash ministiri wén jyabaw xitayning islahat yolida mangidighanliqini tekitlep, xitayning tarixtiki medeniyet zor inqilabi dewrige qaytmaydighanliqini tekitlep, medeniyet zor inqilabi modilini inkar qildi. Arqidinla 15 - mart küni "Qizil arqiliq qarigha zerbe bérish" ni teshebbus qilghuchi chungching shehirining partkom sékritari bo shiley chungchingdiki wezipisidin qalduruldi. Emma xitay weziyitini közetküchiler, bularning xitayda islahatning bashlan'ghanliqining yéterlik ispati emeslikini ilgiri sürmekte." déyildi.

Chet'el metbu'atlirida yene ötken ayda yüz bergen wang lijün weqesi hem bo shileyning wezipisidin qaldurulush weqesi qatarliqlarning xitayning yuqiri qatlam emeldarliri ichidiki guruhwazliq kürishining sirtqi dunyagha ashkarilan'ghan qismi ikenliki ilgiri sürüldi.

En'giliye iqtisad gézitining 16 - mart küni élan qilghan "Bo shiley xitay emeldarlar qatlimidiki küreshning qurbanigha aylandi" namliq maqalide, xitay hakimiyet qatlimidiki jang zémin terepdarliri bilen xu jintaw terepdarliri ottursidiki guruhwazliq kürishide,chungching shehirining partkom sékritari

Bo shiley qurbanliq qilindi. Jyang zémin terepdarliridin bolghan bo shiley, özining ilgiriki eng ishenchlik shiriki wang lijünning amérika konsulxanisidin yardem tiligenliki weqesi seweblik, xu jintaw terepdarlirigha qol sélish pursiti yaritip bérip, ikki guruh ottursidiki küreshte qurbanliq qilindi" déyildi.

En'giliye b b s agéntliqida bügün élan qilin'ghan bo shiley heqqidiki bir mulahizide, xitay hökümet emeldarlirining bo shiley weqesi heqqide toxtalghinida, köp qétim "Merkizi hökümet bilen idiyide birdeklikni saqlash", "Xitayning chong omumiy weziyitini chiqish qilish"ni tekitligenliki tilgha élinip, xitay merkizi hökümitining birlikni teshebbus qilip, bo shileyge oxshash alahide modil tikleshke urun'ghan emeldarlarning öz aldigha alahide yol tutushigha yol qoymaydighanliqi ilgiri sürüldi.

Xitay weziyitini közetküchilerning qarishiche, nöwette xitay weziyiti tolimu nazuk dawalghush halitide turghan bir peytte, xelq arisidiki naraziliq heriketlirining köpiyishi, tibet, Uyghur, mongghul qatarliq xitay bolmighan milletlerning xitay hökümitige bolghan qarshiliq heriketlirining küchiyishi, shundaqla xitayning özining hakimiyet qatlimidiki ziddiyetlerning keskinlishishi qatarliq mesililerni xitay weziyitining dawulghush ichide turuwatqanliqining ispati déyishke bolidiken.

Toluq bet