Méksika qoltuqigha "katrina" chapqunidin kéyin "rita" kéliwatidu


2005-09-23
Share

Amérika hawa rayi mulazimet tarmaqlirining xewer qilishiche, "rita" namliq déngiz chapquni hazir amérikining méksika qoltuqigha qarap kéliwatidu. 23 - Séntebir kéche yaki 24 - séntebir seherde téksas shitatida quruqluqqa chiqishi mumkin.

Ahaliler köchürülmekte

"Rita" ning yönülishidin qarighanda, téksas shitatining golwiston shehiri hujumgha uchrash éhtimali bar. 8 - Ayning 29 - küni "katrina" déngiz chapquni mikiska qoltuqigha hujum qilghanda nyu'orlin shehri éghir zexmilen'gen idi. Hazir "rita" din qutulup qélish üchün téksas shitatining déngiz qirghaqliridiki golwiston, xyuston sheherliridin milyonlighan ahale shimal terepke qarap karwan bolup köchmekte.

B b s ning xewer qilishiche, "rita" chapquni méksika qoltuqigha yéqinlishiwatqanda, bu rayondiki néfit ayrish shirketliri ishtin toxtighan. Ular adette her küni 560 ming bak néfit ayriytti. Déngizda néfit burghulaydighan ishchilarning köpinchisi bashqa rayonlargha köchürülgen. Peqet téksas shitatidila , herküni 350 ming bak néfit ayridighan éksan - mobil shirkitini öz ichige alghan 26 néfit shirkitining 16 si "rita" din saqlinish üchün waqtinche ishtin toxtighan. Xewerde bayan qilinishiche, emma "rita" chapquni bu rayondiki néfit ishlepchiqirishigha éghir tesir körsetmeydighanliqi mölcherlen'gen. Shunglashqa hazir néfit bahasi örlimey belki azraq töwenligen. Londondimu her bir galon gaz bahasi amérika dolliri hésabida 59 sént töwenligen.

Échinishliq eslime

Eslimilerdin melum bolushiche, hazir "rita" chapquni kéliwatqan golwiston shehiri buningdin 105 yil burun, 1900 - yil 9 - ayning 8 - küni namsiz déngiz chapqunigha uchrighan. Uningdiki 37 ming nopustin 6000 i ölüp ketken. 3600 Turalghu terk bolghan. Shuningdin kéyin, 1902 - yili bu sheher 5 métir igizliktiki toghan bilen ihatilep chiqilghan. Bu toghan eyni waqittiki chapqun sewiyisidiki 4 mitir 80 santimitirliq suni tosiwalalaytti. Eslimilerde éytilishiche, 1900 - yili uchtumtut kelgen namsiz chapqunda uchrighan ziyan mudapi'e séstimisining nacharliqidin bolghan. Eyni waqittiki hawarayishunas ishaq klayn ependi chapqunni " issiq shamal" dep qarap, özi köchüp chiqmighan. Netijide uning 50 kishilik jemetidin aran 18 kishi saq qalghan. Emdi uningdin 105 yil kéyinki bügünki künde, hawa rayi xadimliri sün'i hemra bilen resimge élish, doplér radarda ölchesh, tik uchar ayrupilanlar bilen chapqun ichige ölchigüch eswaplarni tashlap ölchesh qatarliq wastilarni qollinip chapqundin aldin melumat béridu. Bu qétim golwiston shehirining bashliqi lida tomas xanim 48 sa'et burunla sheher xelqighe 80٪ ahale köchüp chiqishi kérek dep jakarlighan.

Ümidlik izdinishler

Birleshme agéntliqining bayan qilishiche, "katrina" chapqunidin kéyin yene "rita" chapqunigha duch kéliwatqan kishiler "chapqun kélishtin burun uni yoq qilish, héch bolmighanda uning hujum küchini ajizlitish" toghrisidiki ümidini otturigha qoydi. Emma alimlarning qarishiche, chapqun nahayiti qudretlik tebi'i hadise, uning küchini ajizlitishqa urunush bihude. Burun bezi kishiler chapqun yétip kelmestin burun uni yoq qilish mumkin yaki qudriti shuninggha barawer kélidighan hawa rayi yaki bashqa birxil jisim bilen uninggha tesir körsitish mumkin, dep tesewwur qilip körgen.

Bir qétimliq chapqunda 749 adem chiqim bolghanda, eyni waqittiki prézidént ézinxawir bu tesewwurni sinaq qilishni qollap, uninggha nechche milyard dollar ajratqan bolsimu, amérika alimliri bu heqte 20 nechche yil sinaq élip bérip ünümge irishelmigendin kéyin, bu xiyaldin waz kechti.

"Rita" tiz sür'ette kelmekte

Alimlarning tetqiq qilishiche, "rita" déngiz chapqunining aylanma uzunliqi 560 kilomitir, uningdin tarqilidighan issiqliq 200 migawat éléktir küchige teng, u her 20 minutta bir qitim partlap turidu, partlash quwiti 10 milyon tonniliq yadro bombisining iqtidarigha teng. Bundaq tebi'iy hadisige qarita "küchini ajizlitish tedbiri" qollinishni oylash emeliyettin ayrilghan bir xil shirin arzu - hewestin ibaret, xalas. Shunglashqa amérikiliqlar tebi'etning küchige ten béridu we "yaratqan igem amérikini öz panayida saqlighay" dégen arzu- ümidini aghzidin chüshürmeydu.

Amérika awazining xewer qilishiche, bügün, 9 - ayning 23 - küni téksasning golwiston, xyustün shehridin shimalgha qarap mangghan milyonlighan köchmen aptomobilliri 45 - nomurluq shitatlar ara daghdam yolgha liq toldi. "Rita" chapquni hazir téksasning 300 nechche kilométir jenubidin sa'itige 135 déngiz chaqirimi ilgirileydighan shamal chiqirip, yünülüshi bezide azraq özgirip, omumen shimalgha qarap kéliwatidu. Amérika hökümiti bu etrapqa alliqachan tik uchar ayrupilanlarni we uchur -alaqe guruppilirini ewetti. Amérika déngiz armiyisining 800 neper quruqluqta jeng qilghuchi eskiri tiz qutquzushqa atlinishqa teyyar. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet