Үрүмчидики шимиго дәряси еғир дәриҗидә булғанмақта


2005-07-13
Share

11 - Июл күни үрүмчи тәңритағ тор бетидә берилгән хәвәрдә көрситилишичә, йеқинқи йиллардин буян, үрүмчи шимиго йезисини кесип өтидиған шимиго дәря еқини әтрапида хилму хил дуканлар вә чоң- кичик завутлар селинған болуп, мәзкур завутлардики паскина сулар бивастә бу еқиниға төкүлүп кәлгән.

Дәря әхләт төкүш орниға айланған

Буни аз дәп, шимиго йезисидикиләр мәзкур дәря еқинини мәхсус әхләт төкүш еқинға айландурувалған. Улар һәр түрлүк ташландуқ нәрсиләрни су бойлириға дөвиләп, паскина суни бивастә мушу дәря еқиниға башлайдикән. Һәтта икки деһқан аилиси мәзкур дәря еқини үстигә һаҗәтхана салған болуп, гәндә - сүйдүк қатарлиқлар бивастә суға чүшкән.

Мәзкур дәря еқини бойиға селинған пиластик материяллар пишшиқлап ишләш завути әтрапидики 30 нәччә түп қараяғач дәрихи пүтүнләй қуруп кәткән болуп, шимиго районлуқ мәмурий қанун иҗра қилиш идарисиниң башлиқи ху шөфиңниң билдүрүшичә, дәл мушу булғанған су түпәйлидин бу йәрдики дәл - дәрәхләр қуруп кәткән икән.

Тәңритағ тор бетидә берилгән мәлуматта ейтилишичә, шимиго дәря еқининиң еғир дәриҗидә булғиниши, әтраптики башланғуч мәктәп оқуғучилириниң саламәтликигә зор тәсир йәткүзгән.

Нормал оқутушқа еғир тәсир йәткүзгән

Шимиго дәря еқини мәзкур җайдики 64 - башланғуч мәктәп қороси ичидин еқип өткәчкә, төвән синип оқуғучилири давамлиқ бу суда қол ююдикән. Һәтта мевә -чивиләрниму мушу суда ююп йәйдикән. Мәктәп мудириниң билдүрүшичә, мәктәп ичини кесип өткән бу суниң пуриқи интайин сесиқ болуп, оқуғучилар дәрс вақтида деризиләрни ечишқиму җүрәт қилалмайдикән.

Һөкүмәт хадиминиң җаваби

Биз мәзкур райондики дәря еқининиң бу дәриҗидә болғанғанлиқидики сәвәбләрни техиму ениқ билиш үчүн, шимиго районлуқ мәмурий қанун иҗра қилиш идарисиға телефон қилдуқ. Зияритимизни қобул қилған исмини мәлум қилишни халимиған бир нәпәр ишхана хадими бухил әһвалниң һәқиқәтән наһайити еғир икәнликини, һәмдә мәзкур идарә йеқиндин буян шимиго әтрапидики рәсмийити йоқ қанунсиз селинған өйләрниң һәммисини чеқип бир тәрәп қилғанлиқини, лекин бәзибир завут - карханиларни бир тәрәп қилиш үчүн, муһит асраш идариси вә сода санаәт идарисиниң тәстиқи керәкликини мәлум қилди.

Зияритимизни қобул қилған бу ишхана хадими өзиниң кичикидин тартип шимиго дәряси бойида ойнап чоң болғанлиқини сөзләп келип, әйни чағда, мәзкур дәря еқини әтрапи аилиликләр наһайити аз болған, муһити интайин гүзәл бир бағча икәнликини, кейин болса әтрапиға олтурақлашқан кишиләрниң көпийиши билән тәң, семонт завути вә тоқумчилиқ фабрикиси, йимәк ичмәк дукини қатарлиқ чоң - кичик завутлар кәйни - кәйнидин селинип, муһитниң зор дәриҗидә булғинишини кәлтүрүп чиқириватқанлиқини ашкарилиди.

Шимиго районлуқ мәмурий қанун иҗра қилиш идарисиниң башлиқи ху шөфиңниң мәлум қилишичә, һазир мәзкур дәря еқини әтрапидики 5 километрлиқ җайниң өзигә селинған һәр хил чоң - кичик завутлар сани 60 қа йәткән. Буниңдин башқа йәнә: бир бөлүм идарә вә шәхсиләр дәря еқини әтрапиға қанунсиз һалда нурғун қурулушларни салған. (Меһрибан)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт