Ürümchidiki shimigo deryasi éghir derijide bulghanmaqta

• Muxbirimiz méhribanning bu heqtiki toluq melumati
• Download story audio

11 - Iyul küni ürümchi tengritagh tor bétide bérilgen xewerde körsitilishiche, yéqinqi yillardin buyan, ürümchi shimigo yézisini késip ötidighan shimigo derya éqini etrapida xilmu xil dukanlar we chong- kichik zawutlar sélin'ghan bolup, mezkur zawutlardiki paskina sular biwaste bu éqinigha tökülüp kelgen.

Derya exlet töküsh ornigha aylan'ghan

Buni az dep, shimigo yézisidikiler mezkur derya éqinini mexsus exlet töküsh éqin'gha aylanduruwalghan. Ular her türlük tashlanduq nersilerni su boylirigha döwilep, paskina suni biwaste mushu derya éqinigha bashlaydiken. Hetta ikki déhqan a'ilisi mezkur derya éqini üstige hajetxana salghan bolup, gende - süydük qatarliqlar biwaste sugha chüshken.

Mezkur derya éqini boyigha sélin'ghan pilastik matériyallar pishshiqlap ishlesh zawuti etrapidiki 30 nechche tüp qarayaghach derixi pütünley qurup ketken bolup, shimigo rayonluq memuriy qanun ijra qilish idarisining bashliqi xu shöfingning bildürüshiche, del mushu bulghan'ghan su tüpeylidin bu yerdiki del - derexler qurup ketken iken.

Tengritagh tor bétide bérilgen melumatta éytilishiche, shimigo derya éqinining éghir derijide bulghinishi, etraptiki bashlan'ghuch mektep oqughuchilirining salametlikige zor tesir yetküzgen.

Normal oqutushqa éghir tesir yetküzgen

Shimigo derya éqini mezkur jaydiki 64 - bashlan'ghuch mektep qorosi ichidin éqip ötkechke, töwen sinip oqughuchiliri dawamliq bu suda qol yuyudiken. Hetta méwe -chiwilernimu mushu suda yuyup yeydiken. Mektep mudirining bildürüshiche, mektep ichini késip ötken bu suning puriqi intayin sésiq bolup, oqughuchilar ders waqtida dérizilerni échishqimu jür'et qilalmaydiken.

Hökümet xadimining jawabi

Biz mezkur rayondiki derya éqinining bu derijide bolghan'ghanliqidiki seweblerni téximu éniq bilish üchün, shimigo rayonluq memuriy qanun ijra qilish idarisigha téléfon qilduq. Ziyaritimizni qobul qilghan ismini melum qilishni xalimighan bir neper ishxana xadimi buxil ehwalning heqiqeten nahayiti éghir ikenlikini, hemde mezkur idare yéqindin buyan shimigo etrapidiki resmiyiti yoq qanunsiz sélin'ghan öylerning hemmisini chéqip bir terep qilghanliqini, lékin bezibir zawut - karxanilarni bir terep qilish üchün, muhit asrash idarisi we soda sana'et idarisining testiqi kéreklikini melum qildi.

Ziyaritimizni qobul qilghan bu ishxana xadimi özining kichikidin tartip shimigo deryasi boyida oynap chong bolghanliqini sözlep kélip, eyni chaghda, mezkur derya éqini etrapi a'ililikler nahayiti az bolghan, muhiti intayin güzel bir baghcha ikenlikini, kéyin bolsa etrapigha olturaqlashqan kishilerning köpiyishi bilen teng, sémont zawuti we toqumchiliq fabrikisi, yimek ichmek dukini qatarliq chong - kichik zawutlar keyni - keynidin sélinip, muhitning zor derijide bulghinishini keltürüp chiqiriwatqanliqini ashkarilidi.

Shimigo rayonluq memuriy qanun ijra qilish idarisining bashliqi xu shöfingning melum qilishiche, hazir mezkur derya éqini etrapidiki 5 kilométrliq jayning özige sélin'ghan her xil chong - kichik zawutlar sani 60 qa yetken. Buningdin bashqa yene: bir bölüm idare we shexsiler derya éqini etrapigha qanunsiz halda nurghun qurulushlarni salghan. (Méhriban)