Burhan zununning ölümi chet'ellerde yashawatqan Uyghurlarni qayghugha chömdürdi

• Muxbirimiz eqidening bu heqtiki toluq melumati
• Download story audio

Merhum burhan zunun Uyghur naxsha - muzikilirigha hérismen bir yigit idi.

Yawropa döletliride siyasiy panahliq telepliri ret qiliniwatqan Uyghurlar, nöwette nurghun qiyinchiliqlargha duch kelmekte. Burhan zunun mana mushundaq qiyinchiliqlar tüpeyli yash hayatidin ayrildi.

Gérmaniyide siyasiy panahliq telipi ret qilin'ghanliqtin, norwégiyige bérip qayta siyasiy panahliq telep qilishqa mejbur bolghan Uyghur yash burhan zununning siyasiy panahliq telipi norwigiye teripidinmu ret qilin'ghan. Charisiz qalghan burhan, gérmaniye bilen norwigiye arisida uyaqtin - buyaqqa qéchip yürüshke mejbur bolghan. Bu jeryanda u daniye saqchiliri teripidin qolgha élin'ghan we türmide qaza qilghan. Biraq saqchilarning "özini öltürüwaldi " dégen hökümi nöwette, chet'ellerde yashawatqan Uyghurlarning gumanini qozghidi. Uyghurlar bir tereptin, daniye hökümitidin mezkur sirliq ölümning tégi - tektini échip bérishini telep qilsa yene bir tereptin uning rohigha du'a qilip, xetme-qur'an oqup, nezir ‏- chiraq ötküzmekte.

Dunya Uyghur qurultiyining bash katipi dolqun eysa we bu teshkilatning fondi re'isi ablikim idris hemde awstraliye Uyghur komitétining re'isi shuningdek merhum burhan zununning qéyin akisi hüsen ependiler bir qanche kündin béri daniyide hökümet orunliri bilen yüz turane körüshüp, bu ölüm weqesining qandaq kélip chiqqanliqi heqqide sürüshtürüsh élip barmaqta.

Amérika Uyghur birleshmisi, daniye hökümitige xet yézip, burhan zununning ölüm sewebliri toghrisida éniq jawap bérishni telep qildi.

Bu arida yeni 11 ‏- yanwar küni shwétsiye Uyghur medeniyet merkizi, stokholm shehiride 200 ge yéqin Uyghurni bir arigha jem qilip, merhumning rohigha atap nezir ‏- chiraq ötküzdi.

Igilishimizche, daniyide bu paji'elik ölümning seweblirini éniqlash üchün heriket élip barghan dunya Uyghur qurultiyining dolqun eysa qatarliq wekilliri daniyidiki munasiwetlik orunlar bilen körüshüp, éniq bir jawap élip üchün pütün tirishchanliqini körsetmekte iken.

Burhan zununni, yéqindin tonuydighan, amérika Uyghur birleshmisining re'isi nury türkel ependi bu weqe heqqide toxtilip, burhan zununnning ölümidin könglining nahayiti yérim bolghanliqini bildürdi we burhan zuninning Uyghurlargha xas edep exlaq we peziletlik yigit ikenlikini, eslep ötti.

Shwétsiye Uyghur medeniyet merkizining re'isi farux ependi, shiwitsiyidiki Uyghurlarning, burhan zunun üchün nezir ötküzgendin bashqa yene, yéqin arida shiwitsiyide turushluq daniyining bash elchixanisi aldida namayish élip baridighanliqini bildürdi.

Bu heqtiki tepsili melumatlarni, muxbirimiz eqidening mexsus programmisidin anglang.