Буш җумһурийәтчиләр партийиси вәкилләр қурултийида сөз қилди


2004-09-03
Share

Америка презденти җорҗ в буш, җумһурийәтчиләр партийиси вәкилләр қурултийиниң ахирқи күнидә прездент намзатлиқини қобул қилиш билән биргә, навада өзиниң йәнә давамлиқ прездент вәзиписини қолға алса, буниңдин кейинки 4 йил ичидә орунлайдиған пиланлирини чүшәндүрүп өтти.

Буш йәнә, җумһурийәтчиләр партийсидикиләргә вә барлиқ америка хәлқиғә вәдә берип, өзиниң кәлгүсидики 4 йилда пүтүн күчи билән америка хәлқиниң баяшатлиқи вә дуня хәлқиниң бихәтәрлики үчүн тиришчанлиқ көрситидиғанлиқини билдүрди. Һәмдә өзиниң мәзкүр прездент риқабитини ениқ вә актип пилан билән елип бериватқанлиқини әскәртти.

Буш сөзидә, " бу дегәнлик техиму бихәтәр дуня бәрпа қилиш шундақла техиму үмидкә толған бир америкини бәрпа қилиш дегәнлик. Мән йәнә, һесдашлиқ туйғуси билән вә консерватип җәмийитиниң қиммәт қариши билән риқабәткә чүштүм. Мениң қаришимчә, һөкүмәт хәлқниң турмушини йетәкләшла әмәс бәлки яхшилашқа ярдәм қилиши керәк." Деди.

Буш йәнә, кәлгүси 4 йил ичидә, өз һөкүмитиниң дөләт ичидә баҗ қисқартиш, америкилиқларниң өй-җай сетивелишиға қолайлиқ яритиш, карханичиларға сода пурсити яритиш, кишиләрниң кәспий қабилийитини юқири көтириш шундақла америкиниң пенсийә вә сәһийә-сағламлиқ түзүмини яхшилаш қатарлиқ бир йүрүш тәдбирләрни қоллинидиғанлиқини билдүрди.

Прездент буш йиғинда, америкиниң кәлгүсидә террорлуққа қарши қәтий қайтмас ирадә билән давамлиқ күрәш елип баридиғанлиқини җакарлап, буниң билән бир вақитта, дуняға демократийә вә әркинликниң уруқини чечип, техиму бихәтәр вә димократик дуня бәрпа қилишқа тиришидиғанлиқини вәдә қилди. У сөзидә йәнә, демократчилар партийисиниң прездент кандидати җон кәррий (John Kerry ) ниң сияситигә һуҗум қилди.

Буш сөзидә, " униң баҗ вә дөләт хираҗити сиясити вә һөкүмәт даирисини кеңәйтип, хәлқниң пурситини кеңәйтмәслик сиясити замандин қалди. Әмма биз һазир кәлгүсигә йүзлиниватимиз вә һәргиз арқимизға қайтмаймиз." Дәп көрсәтти.

Җумһурийәтчиләр партийиси вәкилләр қурултийида сөз қилған буш йәнә, өзиниң илгирики 4 йилдин буян садир қилған бәзи хаталиқлириниму етирап қилип, униң бәзи сиясәтлириниң барлиқ америка хәлқи тәрипидин қобул қилинмиғанлиқини көрсәтти вә америка хәлқини бу қетимлиқ сайламда өзи тәрәптә турушқа чақирип, "чүнки биз риқабәткә қәйсәрлик билән йүзләндуқ. Һазир биз тарихий нишанимизни әмәлгә ашуралаймиз. Бизниң улуғ кәлгүсимиз болиду. Биз кәлгүсидә техиму бихәтәр дуня вә техиму үмидлик америка дөлитини бәрпа қилимиз. Һечқандақ нәрсә бизни буниңдин тосуп қалалмайду." Дәп билдүрди.

Америка презденти җорҗ в буш сөзини ахирлаштуруп узун өтмәй, демократчилар партийисиниң прездент кандидати җон кәррий бушниң сөзигә дәрһал инкас қайтуруп, бушниң қурултайда қилған сөзлириниң, америкиниң һәқиқәтән йеңи бир йөлүнүшкә йүзлинишкә еһтияҗлиқ икәнликини көрситидиғанлиқини һәмдә бушниң хатирисиниң мәғлуб болған бир хатирә икәнликини, әмма өзиниң кәң америка хәлқи үчүн техиму яхши келәчәк яриталайдиған бир киши икәнликини көрсәтти.

Америкиниң прездент сайлими -11 айда елип берилидиған болуп, у чаққичә бу икки прездент кандидати америкиниң һәрқайси штатлириға берип нутуқ сөзләп, сайлам авази топлайду. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт