Bush jumhuriyetchiler partiyisi wekiller qurultiyida söz qildi


2004-09-03
Share

Amérika prézdénti jorj w bush, jumhuriyetchiler partiyisi wekiller qurultiyining axirqi künide prézdént namzatliqini qobul qilish bilen birge, nawada özining yene dawamliq prézdént wezipisini qolgha alsa, buningdin kéyinki 4 yil ichide orunlaydighan pilanlirini chüshendürüp ötti.

Bush yene, jumhuriyetchiler partiysidikilerge we barliq amérika xelqighe wede bérip, özining kelgüsidiki 4 yilda pütün küchi bilen amérika xelqining bayashatliqi we dunya xelqining bixeterliki üchün tirishchanliq körsitidighanliqini bildürdi. Hemde özining mezkür prézdént riqabitini éniq we aktip pilan bilen élip bériwatqanliqini eskertti.

Bush sözide, " bu dégenlik téximu bixeter dunya berpa qilish shundaqla téximu ümidke tolghan bir amérikini berpa qilish dégenlik. Men yene, hésdashliq tuyghusi bilen we konsérwatip jem'iyitining qimmet qarishi bilen riqabetke chüshtüm. Méning qarishimche, hökümet xelqning turmushini yétekleshla emes belki yaxshilashqa yardem qilishi kérek." Dédi.

Bush yene, kelgüsi 4 yil ichide, öz hökümitining dölet ichide baj qisqartish, amérikiliqlarning öy-jay sétiwélishigha qolayliq yaritish, karxanichilargha soda pursiti yaritish, kishilerning kespiy qabiliyitini yuqiri kötirish shundaqla amérikining pénsiye we sehiye-saghlamliq tüzümini yaxshilash qatarliq bir yürüsh tedbirlerni qollinidighanliqini bildürdi.

Prézdént bush yighinda, amérikining kelgüside térrorluqqa qarshi qet'iy qaytmas irade bilen dawamliq küresh élip baridighanliqini jakarlap, buning bilen bir waqitta, dunyagha démokratiye we erkinlikning uruqini chéchip, téximu bixeter we dimokratik dunya berpa qilishqa tirishidighanliqini wede qildi. U sözide yene, démokratchilar partiyisining prézdént kandidati jon kerriy (John Kerry ) ning siyasitige hujum qildi.

Bush sözide, " uning baj we dölet xirajiti siyasiti we hökümet da'irisini kéngeytip, xelqning pursitini kéngeytmeslik siyasiti zamandin qaldi. Emma biz hazir kelgüsige yüzliniwatimiz we hergiz arqimizgha qaytmaymiz." Dep körsetti.

Jumhuriyetchiler partiyisi wekiller qurultiyida söz qilghan bush yene, özining ilgiriki 4 yildin buyan sadir qilghan bezi xataliqlirinimu étirap qilip, uning bezi siyasetlirining barliq amérika xelqi teripidin qobul qilinmighanliqini körsetti we amérika xelqini bu qétimliq saylamda özi terepte turushqa chaqirip, "chünki biz riqabetke qeyserlik bilen yüzlenduq. Hazir biz tarixiy nishanimizni emelge ashuralaymiz. Bizning ulugh kelgüsimiz bolidu. Biz kelgüside téximu bixeter dunya we téximu ümidlik amérika dölitini berpa qilimiz. Héchqandaq nerse bizni buningdin tosup qalalmaydu." Dep bildürdi.

Amérika prézdénti jorj w bush sözini axirlashturup uzun ötmey, démokratchilar partiyisining prézdént kandidati jon kerriy bushning sözige derhal inkas qayturup, bushning qurultayda qilghan sözlirining, amérikining heqiqeten yéngi bir yölünüshke yüzlinishke éhtiyajliq ikenlikini körsitidighanliqini hemde bushning xatirisining meghlub bolghan bir xatire ikenlikini, emma özining keng amérika xelqi üchün téximu yaxshi kélechek yaritalaydighan bir kishi ikenlikini körsetti.

Amérikining prézdént saylimi -11 ayda élip bérilidighan bolup, u chaqqiche bu ikki prézdént kandidati amérikining herqaysi shtatlirigha bérip nutuq sözlep, saylam awazi toplaydu. (Peride)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet