Bush yene bir qarar prézidéntliqqa saylandi

• Muxbirimiz erkinning bu heqtiki programmisi
• Download story audio

Bush saylamda ghelibe qildi

Seyshenbe küni ötküzülgen amérika saylimida prézidént jorji bush, reqibi démokratlar prézidént namzati jon kerriyni meghlup qilip, saylamning axirqi ghelibisini qolgha keltürdi. Jorji bush omumi biletning ٪ 51 ge ériship, ٪ 49 ge érishken jon kerriyni meghlup qildi. Jon kerriy charshenbe küni chüshtin burun prézidént bush bilen téléfonda körüshüp, saylamda meghlup bolghanliqini qobul qilghan.

Jon kerriy meghlubiyitini étrap qildi

Jon kerriy shu küni amérikining sherqiy déngiz qirghiqi waqti bilen sa'et 2:00 lerde massachuséts shtatining merkizi bostonda démokratlargha söz qilip, saylamda meghlup bolghanliqini étirap qildi.

Prézidént bushning saylamda ghelibe qilghanliqini tebrikligen jon kerriy, jumhuriyetchiler bilen démokratlarni hemkarliqqa chaqirip, iraqta ghelibe qilishning ehmiyitini tékitlidi. U " amérika saylimining yaxshi teripi bar déyilse, saylamdin kéyin utturup qoyidighan bir terepning yoqliqidur. Etigen oyghan'ghanda hemmimiz oxshashla bir amérikiliq bolimiz" dep körsetti.

Özining hazirmu massachuséts shtatidin amérika kéngesh palata ezasi ikenlikini tekitligen démokratlar namzati, "kürishimiz bu yerde toxtap qalmaydu, belki dawam qilidu" dep sözlidi. Qollighuchilirining saylam jeryanidiki tirishchanliqigha rehmet éytqan jon kerriy, saylam jeryanida amérika xelqini téximu yéqindin tonush pursitige érishkenlikini eskertip " saylam yene bolidu, ghalibiyet waqti kélidu, silerning gheyritinglar we saylam bilitinglar dunyani özgertidighan waqit kélidu, biz buning üchün tirishimiz" didi. U axirida " tengri amérikini panahida saqlisun" dep xitap qildi.

Bush amérikiliqlarni ittipaqliqqa chaqirdi

Jon kerriydin kéyin shu küni chüshtin kéyin sa'et 3:00 ler bilen bu qétimqi saylamning ghalibi amérika prézidénti jorji bush amérika xelqighe söz qildi. Prézidént bush, dimokratlar prézidént namzati jon kerriyni saylam jeryanida jushqun pa'aliyet élip bérish bilen maxtap, " amérika jakarlidi, men xelqimning mendin kütken ümidi we ishenchisidin chongqur tesirlendim" dep körsetti. Bu ishench bilen özlirige amérika xelqi üchün xizmet qilish mejburiyiti artilghanliqini ilgirisürgen jorji bush, bu yolda eng zor tirishchanliq körsitidighanliqini tekitlep, " biz bir dölet, bizni ortaq asasi qanun we ortaq teqdir baghlap turidu. Bizning birlik we hemkarliqimiz astida amérikining ulughliqining chéki yoq" dep eskertti.

Jorji bush " bu döletning téximu küchlik we yaxshi bolushi üchün men silerning qollishinglargha muhtaj" dep körsetti. Prézidént bush bu qétimqi saylamning tarixiy xaraktérlik saylam ikenlikini eskertip, kelgüsi 4 yil ichide amérika iqtisadini kücheytish, salametlik sughurtisini islah qilish, ma'aripni yaxshilash jehetlerde tirishchanliq körsitidighanliqini bildürdi. Iraq we afghanistan weziyitining yaxshilinishi üchün küch serp qilidighanliqini tekitlidi.

Uyghurlarning namzatlar heqqidiki qarishi perqlinidu

Bu qétimqi saylam memliket ichi we sirtidiki Uyghurlarni öz ichige alghan tashqi dunyaning engdiqqitini qozghighan saylam boldi. Amérika Uyghur jem'iyitining bash katipi alim séytof, saylamda jorji bushning ghelibe qilghanliqi Uyghurlarning menpe'etige muwapiq dep körsetti.

Biraq bezi Uyghurlarning amérika prézidént namzatliri mesilisidiki meydani bashqiche bolup, wetendiki Uyghurlarni qilghan téléfon ziyaritimizde ular öz közqarashlirini ipadilidi.