Bush qesem bérip wezipe tapshuriwaldi


2005-01-20
Share
Amérika prézidénti bush ayali we ikki qizi bilen amérika aliy sotining bashliqi wilyam rinkiwistning aldida qesem bermekte. AFP >>Chongaytip körüng

1- Ayning 20-küni amérika qoshma shitatlirining paytexti washin'gton shehiride jorjiW bushning ikkinchi qétim amérikining prizdéntiliq wezipisini tapshuruwélish qesemyat murasimi ötküzüldi.

JorjiW bushning wezipe tapshurwélish qesemyat murasimining kün tertipi nahayiliq etrapliq orunlashturulghan bolup, prizdént bush we uning ayali lawra xanimning ammiwi pa'aliyiti diniy murasimgha qatnishish bilen bashlandi. Diniy murasim axirlashqandin kéyin, bush we ayali dölet mejlisi binasining aldidiki qesem bérish murasimi meydanigha kélip, sehnidin orun aldi.

Mezkur murasim nahayiti daghdughuluq ötküzilgen bolup, jorjiW bush qesem bérish nutqi sözleshtin ilgiri munasiwetlik dölet rehberliri söz qilip, amérikining yéqindin buyanqi siyasetliri we her sahe boyiche qolgha keltürgen muweppeqeyetliri heqqide toxtaldi.

Washin'gton waqti sa'et 12 de jorjiW bush sol qolini "injil"ning üstige qoyup turup, resmi qesemyad qildi, qesemni amérika qoshma shitatliri aliy sotining bashliqi willi'am renkwist qobul qildi. Texminen besh minutqa sozulghan qisqa ötküzilgen bu qesem bérishke uning ayali we qizlirimu ishtirak qilghan bolup, hörmet topliri we güldüras alqish sadalar ichide jorjiW bushning amérika qoshma shitatlirining 43-nöwetlik prizdéntiliq wezipisini yene töt yilliq möhlet bilen resmi tapshuriwalghanliqi jakarlandi.

Bushning nutqi erkinlik mesililirige qaritilghan

Arqidin, prizdént bush resmiy wezipe tapshuriwélish nuqti sözlidi. Prizdént bushning nutqi asasliqi erkinlik mesililirige qaritilghan bolup, u öz sözide démokratiyini qollap, mustebit tüzümni axirlashturushning amérikining siyasiti bolup qalidighanliqini, tekitlep mundaq deydu:

"Dunyadiki téchliqqa bolghan eng yaxshi tilek pütün dunya yüzide erkinlikini kéngeytishtin ibaret, amérikining siyasiti her qaysi memliketler we medeniyetlerdiki démokratik heriketler we institutlarning tereqqiyatini qollash arqiliq axirqi hésabta dunya yüzide mustebitlikni yoqitishtin ibaret".

Prizdént bush on nechche minutqa sozulghan qisqa amma nahayiti mezmunluq mezkur qesemyad nutqida yene amérikining öz siyasiy tüzümini bashqa döletlerge mejburlap tangmaydighanliqini emma, bashqa döletlerning özlirige muwapiq ipadilesh usulini tépishigha yardem béridighanliqini tekitlep mundaq dédi:

" Burundinla kontrol qilish adetlirige ige bolup kelgen hökümetlerning rehberliri shuni bilishi lazimki, öz ademlirige xizmet qilish üchün biz ulargha ishench qilishni ögütishimiz kérek, ilgharliq we adalet yolida qeddinglarni kötiringlar, amérika siler bilen birge"

Bushning sözi amérikining ichkiy siyasitigimu qaritilghan

U amérikining dölet ichi siyasiy weziyiti heqqide toxtilip, özining amérika xelqining éhtiyajlirini qamdashni shuningdek ulargha kéliwatqan tehdidlerni yoqitishni arzu qilidighanliqini bildürdi. Shuningdek amérika xelqini 11-séntebir weqesidin kéyinkige oxshashla ittipaqlishishqa dewet qildi.

19-Yanwar, bush ayali we ikki qizi barbara (sol) we jénna (soldin 2-) bilen washin'gtonda. AFP >>Chongaytip körüng

JorjiW bush ümidwarliq bilen tolghan nutqida yene erkinlikning bir tarixiy yölünüsh ikenliki, jümlidin amérikining erkinlik tarixidiki eng zor muweppeqeyetlerni qolgha keltüreleydighanliqini tekitlidi.

Prizdént bush yene özining ikkinchi qétimliq wezipe ötesh jeryanida amérika jemiyitide ijtima'iy parawanliq qatarliqlarni öz ichige alghan xelqqe paydiliq bir qatar islahatlarni élip baridighanliqini bildürdi.

Prizdéntning wezipe tapshuriwélish nutqi muhim ehmiyetke ige

Amérika prizdéntining qesem bérip wezipe tapshuriwélish murasimi ötküzüsh hemde qesemyad nutqi sözlesh amérikining 1-nöwetlik prizdéntidin étibaren en'enige aylan'ghan adet bolup, prizdéntning nutqi adette murasimni eng yuqiri pellige kötiridu. Bu nutuqlarda amérikining ichki we tashqi siyasiy yölünüshi ekis ettürilgen bolup, amerika tarixidiki meshhur prizdéntlardin washin'gton, linklon, ruzwélt , kénnidy we bashqilarning nutuqliri eyni dewrning dunya we amérika weziyiti bilen biwaste munasiwetlik bolghan idi.

Xewerlerge qarighanda bushning bu qétimqi wezipe tapshuriwélish murasim pa'aliyiti üchün 40 milyon amérika dolliri chiqim qilin'ghan bolup, nahayiti heywetlik we daghdughuluq ötküzülgen .Bu qétimqi murasimda yene bixeterlikni qoghdash ishlirighimu yuqiri derijide köngül bölün'gen bolup, köpligen saqchi we herbiy qisimlar hemde bixeterlikni qoghdash xadimliri ishqa sélinip, murasim pa'aliyiti mezgilide türlük jinayi heriketler we térrorluq hujumliridin mudapi'e körüsh chariliri etrapliq körülgen.

Bezi mölcherlinishlerge qarighanda paytext washin'gton shehirige kélip, murasimni körgüchilerning sani 500 ming etrapida bolghan . (Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet